खोज

गुल्मी, ९ मंसिर
नेपाली काँग्रेका उम्मेदवार डा. चन्द्र भण्डारी दोश्रो पटक प्रतिनिधि सभा सदस्यमा निर्वाचित बनेका छन । २०६४ सालदेखि एमाले नेता प्रदिप कुमार ज्ञवालीसँग चुनावी प्रतिस्पर्धा गर्दै आएका भण्डारी २०७० र २०७९ गरी दुई पटक निर्वाचित भएका हुन् । मुख्य निर्वाचन अधिकृत वसन्तराज पौडेलले भण्डारीलार्ई विजयी भएको घोषणा गर्दै निर्वाचित भएको प्रमाणपत्र प्रदान गरेका थिए ।

प्रतिनिधि सभामा गुल्मी क्षेत्र नं. १ वाट विजयी भएका भण्डारीले ३३ हजार ७ सय ४४ मत प्राप्त गरेको मुख्य निर्वाचन अधिकृत वसन्तराज पौडेलले जानकारी दिए । भण्डारीसँगै एमालेवाट प्रतिस्पर्धा गरेका प्रदीप कुमार ज्ञवालीले ३२ हजार १ सय ५२ मत प्राप्त गरेका थिए । भण्डारीले १ हजार ५ सय ९२ मतान्तरले ज्ञवालीलाई पछि पार्दै जित निकालेका हुन् ।

ज्ञवाली मतगणना स्थलमै पुगेर भण्डारीलाई खादा ओढाएर बधाई दिएका थिए । भण्डारीलाई बधाईको अवसरमा हार्दिकता साट्दै ‘फुटबल चलिरहेको छ, दुई÷दुई गोल भयो ।’ भन्दै मिठो ठट्यौली पारामा कुरा गरेका थिए । ज्ञवाली र भण्डारीको यो चौंथो प्रतिस्पर्धा हो । ज्ञवाली भण्डारीसँगको प्रतिस्पर्धामा ०६४ र ०७४ मा विजयी बनेका थिए ।

०६४ देखि ज्ञवालीसँग प्रतिस्पर्धामा गरेका भण्डारीले ०७० र ०७९ मा दुई पटक जित निकाल्न सफल बनेका हुन । १ लाख १९ हजार २ सय ८८ जना मतदाता रहेको यस क्षेत्रमा ७० हजार ६ सय १७ जना मतदान प्रक्रियामा सहभागी बनेका थिए ।

पराजय भोगे पनि जनताकोे सेवामा सधै समर्पित रहने छु ः ज्ञवाली
प्रतिनिधिसभा निर्वाचनमा पराजित भएपछि एमालेका उमेदवार प्रदीप कुमार ज्ञवालीले प्रतिकूल परिणामको जिम्मेवारी सबै आफ्नै काँधमा लिने बताएका छन । उनले जनताको विश्वासलाई मत परिणाममा बदल्न नसकेकोमा क्षमा माग्दै आफु संसद भवन भित्र पुग्न नसके पनि मुलुक र आन्दोलनको उज्ज्वल भविष्यप्रति कुनै सन्देह नरहेको बताए ।

प्रतिनिधि सभा सदस्यको निर्वाचनमा झिनो मतान्तरले नेपाली काँग्रेसका उमेदवार चन्द्र भण्डारीसँग पराजित भएपनि नेता ज्ञवालीले सामाजिक सञ्जाल मार्फत उक्त कुरा व्यक्त गरेका हुन । नेता ज्ञवालीले कहाँ कमीहरु रहन गए भन्ने कुरा समय क्रममा समिक्षा हुने बताउँदै गुल्मी क्षेत्र नं १ बाट व्यक्त गरेकोे माया, सद्भाव र अमूल्य मतका लागि मतदाताहरुप्रति हृदयदेखि नै आभार व्यक्त गरेका छन् ।

‘निर्वाचन अभियानका क्रममा प्राप्त वृद्ध बुवाआमाहरुको आशीर्वाद, युवाहरुको उर्जा र कलिला नानीहरुका आँखामा प्रतिविम्बित निश्छल माया अनि बैशाखी टेकेर र अरूको सहारा लिएर भए पनि मतदान केन्द्रमा आई भोट हाल्नु हुने अपाङ्गता भएका व्यक्तिहरूको अवर्णनीय विश्वास मेरा निम्ति हमेसा प्रेरणाका स्रोत बनिरहने छन,’ ज्ञवालीले भने ।

आफ्नो सिङ्गो जीवन राष्ट्र र जनताको हित, जिल्लाको समग्र विकास र जिल्लावासीहरुको सेवामा समर्पित रहेको भन्दै ज्ञवालीले ओराली र उकाली यात्रालाई अभिन्न अङ्ग भएको बताउँदै सफलता र विफलतालाई जिन्दगीका अविभाज्य हिस्सा भएको बताएका छन । ‘वैधानिक रुपमा जनप्रतिनिधिको भूमिकामा नरहे पनि तपाईंको मनको प्रतिनिधिका रुपमा दुःख सुखका हरेक पलमा तपाईंहरुले मलाई आफ्नो साथमा पाउनु हुनेछ’ उनले भनेका छन । ज्ञवालीले प्रतिनिधिसभा सदस्यका रुपमा निर्वाचित भएका गठबन्धनका उम्मेदवार डा.चन्द्र भण्डारीलाई वधाई तथा सफल कार्यकालका लागि शुभकामना समेत दिएका थिए ।