खोज

सल्यान, ८ मंसिर ।

सल्यानको प्रतिनिधिसभा तथा प्रदेशसभा निर्वाचनका सबै सिटमा गठबन्धनका उम्मेदवारहरुले जीत दर्ता गराएका छन् । एक मात्रै प्रतिनिधिसभा रहेको सल्यानमा गठबन्धनका साझा उम्मेवार एकीकृत समाजवादीका उपमहासचिव प्रकाश ज्वाला विजयी भएका छन् ।

कुल ८४ हजार २२ मत खसेको सल्यानमा ज्वालाले ३५ हजार ७ सय मतका साथ विजयी भएका हुन् । उनका प्रतिद्वन्द्वी स्वतन्त्र उम्मेदवार राजेन्द्र बहादुर शाहले १९ हजार ७ सय ८९ मत ल्याएका छन् । शाह कांग्रेसबाट राजीनामा दिएर गठबन्धन विरुद्ध चुनाव लडेका थिए । ज्वालाले शाहलाइ १५ हजार ९ सय ११ मतको फराकिलो अन्तरले हराएका हुन् ।

नेकपा एमालेका उम्मेदवार राजेन्द्रवीर रायले १३ हजार ०२९ मत प्राप्त गरेका छ्न । प्रतिनिधि सभा तर्फ जम्मा खसेको ८३ हजार ६ सय ७४ मत मध्ये सदर मत ७६ हजार ३ सय ५ र बदर ७ हजार ३ सय ६९ रहेको थियो ।

प्रदेशसभा (१) मा शर्मा र (२) मा अधिकारी

यस्तै दुई वटा प्रदेश सभा रहेको सल्यानमा गठबन्धनकै उम्मेदवार विजयी भएका छ्न । सल्यान ‘१’ बाट नेकपा माओवादी केन्द्रबाट भिम प्रकाश शर्मा विजयी भएका छन् । उनले निकटतम प्रतिद्वन्दी नेकपा एमालेका कुल बहादुर गिरिलाई ८ हजार ०१८ मतान्तरले हराउँदै विजयी भएका हुन । शर्माले २२ हजार २ सय ४३ मत र गिरिले १४ हजार २ सय २५ मत प्राप्त गरेका छ्न् । प्रदेश ‘१’ तर्फ खसेको ४१ हजार १ सय ७६ मत मध्ये ३८ हजार ८ सय २८ सदर र २ हजार ३ सय ४८ बदर मत रहेको मुख्य निर्वाचन अधिकृतको कार्यालय सल्यानले बताएको छ ।

यस्तै प्रदेश सभा ‘२’ बाट पनि गठबन्धन तर्फबाट नेपाली कांग्रेसका सुरेश अधिकार विजयी भएका छ्न । उनले निकतम प्रतिद्वन्द्वी नेकपा एमालेका गुलावजंग शाहलाइ ३ हजार ७ सय ९० मतान्तरले पछि पार्दै विजयी भएका हुन् । अधिकारीले २० हजार ४ सय ८ मत प्राप्त गरेका छ्न भने शाहले १६ हजार ६ सय १८ मत प्राप्त गरेका छ्न । खसेको जम्मा मत ४१ हजार ९ सय ६७ मध्ये ४० हजार ६९ मत सदर र १ हजार ८ सय ९८ मत बदर रहेको थियो ।

संसदीय निर्वाचनमा नेपाली कांग्रेसले सल्यानमा २८ वर्षपछि निर्वाचन जितेको हो । २०५१ सालको आम निर्वाचनपछि सल्यानमा कांग्रेसले संसदीय चुनाव जितेको थिएन । यसपटक गठबन्धनको बलमा कांग्रेसले सल्यान प्रदेशसभा (२) मा निर्वाचन जितेको हो ।