खोज

प्यूठान, ४ मंसिर ।

प्यूठानमा ५५ दशमलव ११ प्रतिशत मत खसेको छ । आइतवार भएको प्रतिनिधि तथा प्रदेशसभा निर्वाचनमा कुल १ लाख ५९ हजार ७ सय ६० मतदातामध्ये ८८ हजार ४७ मत खसेको जिल्ला निर्वाचन कार्यालय प्यूठानका जिल्ला निर्वाचन अधिकारी देविराम पाठकले जानकारी दिए ।

उनका अनुसार खसेको मतमा महिला ५० हजार ८६ र पुरुष ३७ हजार ९ सय ६१ जना छन् । जिल्लाभर ८१ हजार ९ सय ९० जना महिला मतदाता थिए भने ७७ हजार ७ सय ६९ जना पुरुष मतदाता थिए । जिल्लाभर महिलाहरुको सहभागीता उल्लेखनीय देखिएको छ । जिल्लाका कुल २ सय २३ वटा मतदान केन्द्रबाट मतदान भएको थियो ।

गाउँ गाउँबाट मतपेटिका सदरमुकाम खलंगामा ल्याउने प्रक्रिया शुरु भएको छ । राती अबेरसम्म मतपेटिका खलंगामा पुग्ने छन् र सोमवारदेखि मतगणना हुने निर्वाचन कार्यालयले जनाएको छ ।

जीवनभर राजनीति एउटा दलको गर्ने र निर्वाचनमा भोट हाल्दा फरक दललाई गर्नुपर्ने बाध्यकारी व्यवस्थाले गर्दा निर्वाचनमा मतदाताको उत्साहमा कमी हुँदै गएको प्यूठानका नागरिक समाजका अगुवाहरुले प्रतिक्रिया दिएका छन् ।

‘जनताको भावना विपरित नेताले मात्र चुनावी गठवन्धन गर्दा एकखालको निराशा जनतामा छ’,लामोसमयदेखि सामाजिक संघ संस्थाको नेतृत्व गर्दै आएका खलंगाका नागरिक समाजका अगुवा विजयकुमार श्रेष्ठले भने,‘अब नीतिगत रुपमै दलहरुबीच चुनावी गठवन्धन गर्न नहुने व्यवस्था गरियो भने मतदानमा उत्साह हुनसक्छ ।’

सरकार चलाउनकै लागि दलहरुले जवरजस्त बहुमत लिन खोज्नु पनि मतदाताको वितृष्णा रहेको उनको बुझाई छ । प्यूठानमा राष्ट्रिय जनमोर्चा र नेपाली कांग्रेसबीच लामोसमयदेखि राजनीतिक तिक्तता भएको र गिलास चिन्हमा भोट हाल्नुपर्ने बाध्यतालाई जनताले मन नपराएको पाइएको हो ।