खोज

पाल्पा, ३ मंसिर ।

आइतबार हुने प्रतिनिधि सभा र प्रदेश सभा सदस्यका लागि निर्वाचनमा पाल्पा जिल्लामा रहेका सवै मतदान केन्द्रमा निर्वाचनको तयारी पुरा भएको छ ।

२ प्रतिनिधि सभा र ४ प्रदेश सभा निर्वाचनका लागि पाल्पामा सम्पन्न गर्न १ हजार ९ सय ७२ कर्मचारी र ७ सय ९ जना प्रहरी र १ हजार २ सय १५ म्यादी प्रहरी खटिएका छन् । जिल्ला निर्वाचन कार्यालयका प्रमुख रुक्मागत अर्यालले ११८ मतदान स्थलमा तयारी पुरा भएको वताए ।

यसैबीच पाल्पामा नमुना मतदान केन्द्रको रुपमा तानसेन वडा नं.२ मा सवै महिला कर्मचारी र सुरक्षाकर्मी खटिएका छन् । मतदानमा खटिएका कर्मचारीले निर्वाचनलाई स्वच्छ निष्पक्ष र भयरहित वातावरणमा सम्पन्न गराउन सवै तयारी पुरा गरेका छन् । वुथ निर्माण, सवै खाले मतदाताहरुको लागि छुट्टाछुट्टै लाईन वस्ने स्थल निर्माण, निषेधित क्षेत्र लगायतका स्थल निर्माण साथै विभिन्न आचारसंहिताका व्यानर पम्प्लेट टास पुरा गरेका छन् ।

जिल्ला निर्वाचन कार्यालय पाल्पाले एउटा नमुना मतदान केन्द्र वनाउनै भनेर महिला कर्मचारीहरु मात्र त्यस केन्द्रमा खटाएको हो । नमुना मतदान केन्द्र रहेको पाल्पा तानसेन २ रेडक्रसको निर्वाचन अधिकृत मिना ढकालले सवै महिला कर्मचारी र सुरक्षाकर्मीले निर्वाचनलाई सफलतापूर्वक सम्पन्न गराउने प्रतिवद्धता गरेको बताइन् । १६ जना महिला कर्मचारी र १२ जना सुरक्षाकर्मी सहित २८ जनाले मतदान केन्द्र सम्हाल्ने ढकालले वताइन् ।

पाल्पामा २ लाख १ हजार ३ सय २६ जना मतदाता छन् । प्रतिनिधि सभा र प्रदेश सभाको लागि ४४ जना उम्मेदवार चुनावी प्रतिस्पर्धामा उत्रिएका छन् । जस मध्ये ६ जना प्रतिनिधि निर्वाचित हुनेछन् ।

मतगणना स्थल समेत निर्माण सम्पन्न भैसकेको र मतगणनाका दिन आमजनतालाई सुसुचित गराउनलाई जिल्ला निर्वाचन कार्यालय पाल्पा र पत्रकार महासंघ पाल्पाको समन्वयमा संचार डेस्क समेत निर्माण गरिएको छ ।