खोज

दाङ, १ मंसिर ।

आगामी मंसिर ४ गते हुने प्रतिनिधिसभा र प्रदेशसभा सदस्य निर्वाचनका लागि उम्मेदवारहरुको चुनावी सभा सम्मेलन अन्तिम चारणमा पुगेको छ । गत असोज २३ गते उम्मेदवारी दर्ता गरेदेखि जनताको नजिक पुगेका उम्मेदवारको प्रतिक्षाको घडी समाप्त हुँदै छ ।

प्रतिनिधिसभा सदस्य निर्वाचनका लागि दाङ क्षेत्र नं १ बाट गठवन्धनका तर्फबाट शहरी बिकास मन्त्री मेटमणी चौधरी र नेकपा एमालेका तर्फबाट शान्ता चौधरी मुख्य प्रतिष्पर्धामा छन् । उनीहरु दुबैजना २०७४ को निर्वाचनबाट प्रत्यक्ष र समानुपातिक सभाषद भएका थिए ।

यस्तै नागरिक उन्मुक्ति पार्टीबाट सुरेन्द्र चौधरी, नेपाली काँग्रेस विपीबाट अशोक खड्का, नेपाल मजदुर किसान पार्टीबाट गणेशभक्त खर्बुजा, हाम्रो नेपाली पार्टीबाट गंगा चौधरी (सत्गौवा) प्रतिष्पर्धामा छन् । चौधरी २०७४ को निर्वाचनमा नेकपा एमालेको समानुपातिक सभाषद भएकी हुन् । राष्ट्रिय स्वतन्त्र पार्टीबाट देवराज पाठकको उम्मेदवारी दर्ता भएको छ ।

यसैगरी लोकतान्त्रिक समाजवादी पार्टी नेपालबाट प्रतिमा बुढा मगर, संघीय लोकतान्त्रिक राष्ट्रिय मञ्च थरुहटबाट रुक्मिणी चौधरी, राष्ट्रिय प्रजातन्त्र पार्टीबाट लिली बुढाथोकी, मंगोल नेशनल अर्गनाइजेशन पार्टीबाट शोभाराम बुढा र स्वतन्त्रबाट चन्द्रमणि न्यौपाने चुनावी मैदानमा छन् ।

निर्वाचन क्षेत्र नं १ को (१) बाट प्रदेशसभा सदस्यमा नेकपा एमालेबाट गंगाराम भट्टराई, नेकपा माओवादी केन्द्रबाट लुम्बिनी प्रदेशका स्वास्थ्य जनसंख्या तथा परिवार कल्याण मन्त्री इन्द्रजीत थारु बीचमा कडा प्रतिष्पर्धा रहेको छ । निर्वाचन क्षेत्र नं. १ को (२) मा नेपाली कांग्रेसबाट अनुराग खड्का, (उनी नेपाली कांग्रेसका नेता खुमबहादुर खड्काका छोरा हुन् ) नेकपा एमालेबाट कुलबहादुर खत्री क्षेत्री बीच कडा प्रतिष्पर्धा रहेको छ ।

दाङ क्षेत्र नं. १ मा देउखुरीका राप्ती, गढवा राजपुर गाँउपालिका, लमही नगरपालिका र घोराही उपमहानगरपालिकाको १,२,३ र ५ नम्वर वडा पर्दछन् । दाङ निर्वाचन क्षेत्र न १ को (१) मा ७० हजार २६७ र (२) मा ६४ हजार ४६६ जना मतदाता रहेको कार्यालयले जानाएको छ । दाङमा क्षेत्र नम्बर १ को (१) मा २४ वटा मतदान स्थल र ७८ वटा मतदान केन्द्र कायम गरिएको छ । त्यसैगरी क्षेत्र नम्बर १ को (२) मा २७ मतदान स्थल, ७४ मतदान केन्द्र रहेको क्षेत्र नं. १ का निर्वाचन अधिकृत मानवहादुर विस्टले जानकारी दिए ।

प्रतिनिधिसभा सदस्यका लागि नेकपा एमालेको तर्फबाट पार्टीका महासचिव एवम् लुम्बिनी प्रदेशका पूर्व मुख्य मन्त्री शंकर पोखरेल र सत्तापक्षीय गठबन्धनको तर्फबाट नेकपा माओवादी केन्द्रकी पोलिटव्यूरो सदस्य एवं पूर्व सामान्य प्रशासन मन्त्री रेखा शर्मा प्रमुख प्रतिष्पर्धी छन् । आफ्ना अपुरा भएका कामलाई संघीय सरकार मार्फत पुरा गराउने र दंगाली जानताको चाहना अनुसार काम गर्ने पोखरेलले प्रतिबद्धता जनाएका छन् । २०७४ को निर्वाचनमा दाङ २ (१) बाट उनी प्रदेशसभामा विजयी भएका थिए ।

संघीय सरकारको सामान्य प्रशासन मन्त्री भैसकेकी रेखा शर्मालाई प्रतिपष्र्धीको रुपमा छन् । दाङकी छोरी भएकाले यस क्षेत्रमा विकास गर्ने लक्ष्य लिएर मैदानमा आएको शर्माको भनाई छ । २०६४ र २०७४ को निर्वाचनमा समानुपातिक सभासद बनेकी शर्मा यो निर्वाचनमा प्रत्यक्ष निर्वाचनमा उत्रिएकी हुन् ।

नेपाली कांग्रेस वीपीका गोविन्दप्रसाद शर्मा, नेकपा मालेका नेत्रप्रसाद पाण्डे, राष्ट्रिय प्रजातन्त्र पार्टीका भोलानाथ योगी, नेमकिपाका आशाराम वैद्य, मंगोल नेशनल अर्गनाइजेशनका खड्कबहादुर बुढा मगर, राष्ट्रिय स्वतन्त्र पार्टीका इन्जिनियर विशाल अधिकारी, मौलिक जरो किलो पार्टीका रामचन्द्र खड्का, हाम्रो नेपाली पार्टीका शशिराम चौधरी, नेपाल आमा पार्टीका गीता रावत र नागरिक उन्मुक्ति पार्टीका रेशम चौधरी छन् । यसैगरी यमलाल जिसी, भुपनाथ अर्जेल र कृष्णबहादुर डाँगी पनि चुनावी प्रतिष्पर्धामा छन् ।

यसैगरी निर्वाचन क्षेत्र नं. २ को १ बाट प्रदेशसभाका लागि नेकपा एमालेबाट बलिभद्र राना र नेपाली कांग्रेसबाट राजु खनाल बीचमा प्रतिष्पर्धा रहेको छ । यसैगरी निर्वाचन क्षेत्र नं. २ को २ बाट प्रदेशसभाका लागि नेकपा एमालेका गिरिराज केसी, नेपाली कांग्रेसका प्रचण्डविक्रम न्यौपाने बीचमा प्रतिष्पर्धा रहेको छ ।

क्षेत्र न २ को (१) मा ६३ हजार ३२२ मतदाता छन् भने (२) मा ७० हजार ४२६ जना मतदाता रहेको प्रदेश निर्वाचन कार्यालय दाङले जनाएको छ । क्षेत्र नम्बर २ को (१) मा २५ मतदान स्थल र ६८ मतदान केन्द्र, क्षेत्र नम्बर २ को (२) मा २३ मतदान स्थल र ७८ मतदान केन्द्र तोकिएको प्रदेश निर्वाचन कार्यालय दाङले जनाएको छ ।

दाङ क्षेत्र न २ मा घोराही उपमहानगरपालिकाका १९ वटै वडा, तुलसीपुर उपमहानगरपालिकाको वडा नं. १६, १७, १८ र १९ वडा र वंगलाचुली गाउँपालिका यही क्षेत्रमा पर्दछन् ।

गत बैशाखमा भएको स्थानीय तह निर्वाचनमा घोराही र तुलसीपुरका अधिकांश वडा नेकपा एमालेका उम्मेदवारले जितेका छन् । वंगलाचुली गाउँपालिकाको अधक्ष्य र उपाध्यक्ष गठबन्धनका उम्मेदवारले जितेका थिए ।

क्षेत्र नं. ३ मा प्रतिनिधिसभा सदस्यका लागि नेकपा एमालेका केन्द्रीय सदस्य कोमल ओली र सत्तारुढ गठबन्धनको तर्फबाट नेपाली कांग्रेसका केन्द्रीय सदस्य दीपक गिरी बीचमा प्रतिष्पर्धा रहेको छ । कोमल वली २०७४ सालमा राष्ट्रिय सभा सदस्यमा मनोनित भएकी थिइन् । दीपक गिरी पूर्व सिँचाइ मन्त्री छन् । दुवैजना आ–आफ्नो पक्षमा मतदाता रहेको दाबी गर्छन् ।

यस्तै प्रदेशसभातर्फ ३ (१)मा नेकपा एमालेका तर्फबाट घनश्याम पाण्डे, सत्तारुढ गठबन्धनका तर्फबाट नेपाली कांग्रेसका डिल्लीबहादुर चौधरीबीचमा प्रतिष्पर्धा रहेको छ । यसैगरी निर्वाचन क्षेत्र नं. ३ (२)मा नेकपा एमालेका हुकुमबहादुर बस्नेत र सत्तारुढ गठबन्धनका तर्फबाट नेकपा माओवादी केन्द्रका धनबहादुर मास्कीको बीचमा कडा प्रतिष्पर्धा रहेको छ । त्यसैगरी क्षेत्र नम्बर ३ को १ मा २१ मतदान स्थल, ७४ मतदान केन्द्र, क्षेत्र नम्बर ३ को २ मा ३३ मतदान स्थल र ९३ वटा मतदान केन्द्र कायम भएको प्रदेश निर्वाचन अधिकारी नारायणप्रसाद भण्डारीले जानकारी दिए ।

प्रदेश निर्वाचन कार्यालय दाङले आगामी मंसिर ४ गते हुने प्रतिनिधि तथा प्रदेशसभा सदस्य निर्वाचनका लागि दाङमा ४ लाख १९ हजार ९ सय २४ जना मतदाता रहेका छन् । प्रदेश निर्वाचन कार्यालय दाङका अनुसार १५३ मतदान स्थलमा ४६५ मतदान केन्द्र तोकिएको छ ।