खोज

दाङ, २९ कात्तिक ।

आगामी मंसिर ४ गते हुन गइरहेको आम निर्वाचनका लागि आचारसंहिता पालनाको अवस्था तथा निर्वाचन सुरक्षाको विषयमा राष्ट्रिय मानवअधिकार आयोगको टोलीले दाङमा छलफल गरेको छ । घोराहीमा मंगलवार एक कार्यक्रमको आयोजना गरी जिल्लास्थितअ धिकारकर्मी, नागरिक समाज, पत्रकार र सरोकार नियकायसँग जिल्लाको निर्वाचनको पछिल्लो अवस्था तथा आचारसंहिता पालनाका बारेमा आयोगले जानकारी लिएको हो ।

कार्यक्रममा राष्ट्रिय मानव अधिकार आयोगका सदस्य मनोज दुवाडीले निर्वाचनको समयमा हुने गतिबिधिलाई सम्बन्धित स्थानमा पुगेर अध्ययन गर्ने गरेको बताए । सोही कार्यक्रममा थारु आयोगका सदस्य सुवोधसिंह थारुले सबै नागरिकले सहज रुपमा मतदान गर्न पाउनुपर्ने बताए । निर्वाचन आयोगसँग हालसम्म गरिएको समन्वयात्मक कामका बारेमा जानकारी गराउँदै दाङबाट आएका सुझावलाई सम्बन्धित निकायमा पुर्याउन सहयोग हुने बताए ।

छलफलमा नेपाल पत्रकार महासंघका केन्द्रीय अध्यक्ष विपुल पोख्रेलले निर्वाचन गराउने मात्रै नभई निर्वाचनको समग्र प्रकृया र यसका आयामबारे आयोगले सोँच्न जरुरी रहेको बताए । अहिले राजनीतिक दल, नागरिक समाज, सुरक्षा अंगबाट निर्वाचनको प्रकृयामा धेरै कुराको अभाव देखिएकाले मतदान केन्द्रसम्म मतदाताको अधिकतम उपस्थिति बढाउन विशेष ध्यान दिनुपर्ने बताए ।

प्रेस काउन्सिल सदस्य शरद अधिकारीले निर्वाचनको प्रकृयामा नै पुनर्विचार गर्नुपर्ने बेला आएको बताए । मतदाता शिक्षादेखि मतदान गर्ने प्रकृया बोझिलो र झन्झटिलो बन्दै गएकाले कागजी प्रकृयाबाट डिजिटल बनाउन सुझाव दिए । मतदान केन्द्रमा हुनुपर्ने आधारभुत सुविधाका बारेमा सम्वेदनशील नहुँदा विगतमा मतदाताले धेरै दुख पाएकाले आयोग यो विषयमा गम्भीर हुनुपर्ने उनले बताए ।

नागरिक समाज दाङका निवर्तमान संयोजक चन्द्रराज पन्तले निर्वाचन प्रणाली विगतभन्दा सुधारको अवस्था बन्दै गएपनि सबै पूर्ण भई नसकेको बताए । निर्वाचनकै कारण हुने भवितव्यमा निगरानी तथा सुरक्षामा सुधारका संकेत देखा पर्दै गएको बताउँदै नीति निर्माण, लोकतन्त्र बलियो बनाउन उम्मेदवारको भूमिका के हुने भन्ने बारेमा भने आम मतदाताको चासो कम देखिएको हुँदा सचेतना बढाउन राजनीतिक दल र निर्वाचन आयोग गम्भीर बन्नुपर्ने बताए ।