खोज

बुटवल, २७ कात्तिक ।

पाँच दलीय सत्ता गठबन्धनको समर्थन पाएका राष्ट्रिय जनमुक्ति पार्टीका प्रतिनिधि सभा उम्मेदवार केशव सुर्यवंशीले आफु विजयी बनेर संसदमा पुगेको दिन भ्रष्टाचार विरुद्धको संकल्प प्रस्ताव दर्ता गर्ने बताएका छन् । मुलुकमा भ्रष्टाचारको अन्त्य र सुशासन कायम नगरी दिगो शान्ति र समृद्धि संभव नहुने उल्लेख गर्दै उम्मेदवार सुर्यवंशीले यसअघि जितेर जाने नेताहरु भ्रष्टाचारमा लिप्त भएकै कारण मुलुक अधोगति तर्फ उन्मुख गएको दावी गरेका छन् ।

उनले भने–‘मैले जितेर संसद भवन पुगें भने मेरो पहिलो कदम पहिलो दिनमै भ्रष्टाचार विरुद्धको संकल्प प्रस्ताव दर्ता गर्नेछु र चुनाव जितेर संसदमा पुग्नेहरुले भ्रष्टाचार बिरुद्धको कसम खाएर मात्र बैठकमा बस्ने ब्यवस्था मिलाउन प्रयास गर्ने छु । मेरो दोश्रो प्रयास बेरोजगारीको अन्त्यका लागि हुने छ । तेश्रो कदम कृषि क्रान्तिका लागि पनि संकल्प प्रस्ताव दर्ता गर्ने छु । कृषि क्षेत्रको प्रभावकारी विकासबिना सवल अर्थतन्त्रको बिकास नहुने उम्मेदवार सुर्यबंशीको जिकिर रहेको छ ।

रुपन्देही २ बाट प्रतिनिधिसभामा उम्मेदवार बनेका सूर्यवंशीले बुटवल–१२ तामनगरमा घरदैलो कार्यक्रमपछि आयोजित कोणसभालाई सम्बोधन गर्दै मुलुकलाई औद्योगिक क्रान्तिमार्फत आर्थिक विकास गरी बेराजगारीको अन्त्य गरेर मात्र दिगो विकास र समृद्धि संभव भएको उल्लेख गरेका छन् । देशको युवाशक्ति पलायन भैरहेकोबारे यसअघि सत्तामा बस्नेहरुले यसलाई रोक्न कुनै प्रयास नगरेको भन्दै सुर्यवंशीले श्रमशक्ति बेचेर कुनैपनि देश धनी नहुने ठोकुवा समेत गरेका छन् । यी तमाम समस्याको समाधानका लागि गठबन्धनका उम्मेदवारहरुलाई जिताउन उनले आग्रह समेत गरेका छन् ।

प्रदेश सभा सदस्य पदका उम्मेदवार बामदेव क्षेत्री घिमिरेले उत्पादकत्व वृद्धि गरी आर्थिक विकास र कृषि क्रान्तिबाट नै समृद्धिको मार्गदिशा तय गर्न सकिने बताएका छन् । उद्योग र पर्यटनको बिकासबाट नै लुम्बिनी प्रदेश समृद्धिको दिशातर्फ अग्रसर हुने कुरामा जोड दिंदै प्रदेश योजना आयोगका पुर्व उपाध्यक्ष समेत रहेका क्षेत्रीले दीर्घकालीन सोंचसहित गरिबी निवारण र बेरोजगारीको अन्त्य गर्ने कार्यक्रम ल्याउनु पर्ने बताए । यसका लागि नेपाली काँग्रेस नेतृत्वको गठबन्धनका उम्मेदवारहरुलाई जिताउनु पर्ने उनको भनाई थियो ।

सो अवसरमा नेपाली काँग्रेस क्षेत्रिय सचिव परमानन्द भट्टराई, नगर उपसभापति ज्योती भण्डारी, सचिव गंगा पन्थी, बुटवल–१२ का सभापति धर्म आचार्य लगायतले दिगो शान्ति, राजनैतिक स्थिरता र विकासका लागि गठबन्धन दलका उम्मेदवारहरुलाई जिताउन आग्रह गर्दै भ्रष्टाचार र कुशासनका मतियारहरुलाई मंसिर ४ गतेको निर्वाचन मार्फत जरैदेखि उचालेर फाल्नु पर्ने आवश्यकता रहेको बताएका थिए ।