खोज

बुटवल, २१ कात्तिक ।

रुपन्देही सुनचाँदी व्यबसायी संघले सुनकोे अभाव र कालोबजारी रोक्न माग गर्दै नेपाल सुनचाँदी व्यबसायी महासंघलाई ज्ञापनपत्र बुझाएको छ ।

संघको नेतृत्वमा बजारमा भएको छापावाला सुनको चरम अभाव तथा कालोबजारी, बजारमा कच्चा सुनको अभाव देखिएपछि तत्काल आपूर्ति वृद्धि गर्न माग गर्दै नेपाल सुनचाँदी व्यवसायी महासंघलाई ५ बुँदे ज्ञापनपत्र बुझाएको हो ।

रुपन्देही सुनचाँदी व्यवसायी संघको नेतृत्वमा सोमबार जिल्लाका सुनचाँदी व्यबसायीहरुका समस्याहरु सम्बन्धमा नेपाल सुनचाँदी व्यबसायी महासंघलाई जानकारी गराई समस्या समाधानको लागि ध्यानाकर्षण गराउने उद्देश्यले ज्ञापनपत्र बुझाइएको महासचिव सिताराम रसाइलीले बताए ।

जिल्लाका व्यवसायीले व्यवसाय मैत्री करोबार सञ्चालन ऐन लागु गर्न, एशोसिएट सदस्यता खारेज गर्न तथा कालोबजारी अन्त्य गर्न नेपाल सुनचाँदी व्यवसायी महासंघले खाका तयार गर्नुपर्ने संघको माग छ । बजारमा सुन अभाव भएकाले व्यवसाय बचाउन विचौलियाहरुसँग महंगोमा सुन खरीद गरेको रुपन्देहीका सुन व्यवसायीहरुले बताएका छन् ।

ज्ञापनपत्रमा सुनको आपूर्ति वृद्धि गर्न र त्यसको आपूर्ति न्यायोचित र पारदर्शी वितरणको लागि महासंघ तत्काल लाग्नुपर्ने, राज्यका सम्बन्धित निकायसंग समन्वय गरी सुनको कालोबजारी अन्त्य गर्न अविलम्ब लाग्नुपर्ने, एशोसिएट सदस्यहरुबाट कोटाको सुन निकासीमा अनियमितता गरी कालोबजारी गरेको भन्ने गुनासो आएको हुँदा त्यसको छानबिन गरी दोषीलाई कारबाही गर्ने र सदस्यता समेत खारेज गर्नुपर्ने, सुनको आपूर्तिको दीर्घकालिन समाधानको लागि कोटा प्रणलीको अन्त्य र व्यवसायीहरुको आवश्यकता अनुसार सहज रुपमा सुन किन्न सक्ने व्यवस्था मिलाउन राज्यसंग अबिलम्ब पहल गर्ने र लामो समयदेखि थाती रहेको सुनचाँदी व्यवसाय सम्बन्धी नियमावली तथा निर्देशिका पारित गर्ने कुरामा गम्भीर रुपमा लाग्नुपर्ने ज्ञापनपत्र मार्फत आग्रह गरिएको छ ।

ज्ञापनपत्र बुझाउँदै रुपन्देही सुनचाँदी व्यबसायी संघका अध्यक्ष रामकिसन विश्वकर्माले बिभिन्न बहानामा व्यवसायीले सुनचाँदी व्यवसायका लागि आवश्यक पर्ने कच्चा सुन र चाँदी बजारमा प्रयाप्त नहुँदा कालोबजारी गर्ने गिरोहले मौकाको फाइदा उठाइरहेको कालोबजारीको रुपमा अधिक मूल्य तिरेर सुन खरिद गर्न वाध्य हुनु नै अहिलेको मुख्य समस्या भएको बताउदै यस्ता किसिमका व्यावसायिक समस्या अन्त्यका लागि संस्थाहरुले उठाएका मागलाई महासंघले नेतृत्वदायी भूमिका खेल्न आग्रह गरे । नेपाल सुनचाँदी व्यवसायी महासंघका विज्ञ परामर्श समिति संयोजक प्रेम कुमार सेन्चुरीले सरकार, व्यवसायी र उपभोक्ता सबैलाई सहज हुनेगरी आपूर्तिको विकल्प खोजिनु पर्ने बताए । नेपाल सुनचाँदी व्यवसायी महासंघका अध्यक्ष माणिकरत्न शाक्यले व्यवसायीको हकहितको लागि महासंघ सदैव तत्पर रहेको बताए । बजारमा सुनचाँदीका गरगहना बनाउने कच्चा पदार्थ अभाव र माग अनुसार आपूर्ति नहुँदा ग्राहकहरूको माग अनुसार बजारमा सुनचाँदी दिन सक्ने अवस्था नभएको बताउदै उनले ६ महिनादेखि सरकारले विदेशी मुद्रा सञ्चितिको कमी भएको भन्दै सुन आयातमा कटौती गर्दा व्यवसायीहरू मारमा परेको बताए । नेपाल सरकारले गत वैशाखदेखि दैनिक २५ किलोसम्म आयात हुने गरेको कोटामा कटौती गरी १० किलोमा झारेकाले अहिले बजारमा सुनको अभाव देखिएको व्यवसायीहरूको गुनासो छ ।

कार्यक्रममा महासंघका उपाध्यक्ष जोगलाल बिश्वकर्मा, दिएस रत्न शाक्य, पवन सोमानी, महेन्द्ररत्न शाक्य, महासचिव धर्म सुन्दर बज्राचार्य, सचिव किरणभाइ बज्राचार्य, कोषाध्यक्ष सुदिप क्षेष्ठ, संस्थापक अध्यक्ष मणिरत्न शाक्य, सल्लाहकार विक्रम सुनार, डिल बहादुर खाती, गोकुल कालिराज दिपक कौशल, सिताराम रसाइली लगायतले बोलेका थिए ।