खोज

बुटवल, २१ कात्तिक ।

लुम्बिनी प्रदेशमा क्रियाशिल राजनीतिक दलहरुले निर्वाचन आचारसंहिता पूर्ण रुपमा पालना गर्ने गराउने प्रतिवद्धता जनाएका छन् । निर्वाचन आचारसंहिता नैतिक र कानुनी बन्धन भएकाले त्यसमा आमसंचार पनि संवेदनशील रहेको उनीहरुले बताएका हुन् ।

संवाद समूह लुम्बिनीले बुटवलमा आयोजना गरेको आसन्न निर्वाचनमा जारी आचारसंहिता पालनमा राजनीतिक दलहरुको प्रतिवद्धता विषयक कार्यक्रममा सहभागी नेताहरुले स्वतन्त्र र निश्पक्ष चुनाव र आचार संहिता पालनामा प्रतिवद्ध हुने बताए ।

दलका नेताहरुले दलले आचार संहिता मिचेका बारेमा निर्वाचन आयोग, प्रशासन र संचारमाध्ययमले पनि निगरानी राख्न र गलतलाई कारबाही प्रक्रियामा लैजान सघाउन आग्रह गरे । कार्यक्रममा बोल्दै नेपाली कांग्रेसका लुम्बिनी प्रदेश सदस्य विष्णुप्रसाद पोखरेलले कांग्रेस सत्ताधारी पाटी भएपनि आचारसंहिता मिच्ने र जनतालाई अनावश्यक रुपमा प्रभावित पार्ने काममा नलागेको बताए ।

‘हामी र हाम्रा समर्थकहरुबाट कहीं कतै आचार संहिता विपरित काम भएको भए निश्पक्ष छानविन होस्,’ उनले भने । एमाले नेता नन्दीकिशोर ढकालले निर्वाचनमा सबै दल र उमेदवारको एउटै हैसियत हुने भन्दै जनता प्रभावित पार्ने र आचारसंहिता मिच्नेलाई कानुनी कारबाहीमा लैजान आग्रह गरे ।

माओवादी केन्द्रका निर्दोष अलीले प्रशासन, निर्वाचन आयोग र नागरिक समाज निष्पक्ष भएर अनुगमन गरे दलहरु सच्चिने बताए । नेकपा एकीकृत समाजवादीका सरीता श्रीसले आचारसंहिता कार्यान्वयन भए नभएको अनुगमन गर्न नागरिक समाज र संचारकर्मीलाई आग्रह गरिन् । जसपाका मनिकर कार्कीले आचारसंहिता मिच्ने, निर्वाचन विथोलिने र समुदायमा भ्रम छर्ने काम आफ्नो पार्टीबाट नहुने बताए ।

राष्ट्रिय जनमुक्ति पार्टीका महासचिब टोप अस्लामीले आचारसंहिता पालनामा सबै दलहरुले जस्तै एक्यवद्धता जनाए । राप्रपाका प्रदेश अध्यक्ष प्रदिप उदयले पनि निर्वाचन आयोगद्वारा जारी आचारसंहिता पालना गर्ने प्रतिवद्धता जनाए । राष्ट्रिय जनमोर्चाका टान बहादुर केसीले साना दललाई ऐन ठुला दललाई चैन हुन नहुने बताए ।

निर्वाचन कार्यालय लुम्बिनी प्रदेशका प्रतिनिधि टेकराज पन्थीले सबै नीतिको मूल नीति राजनीति भएकाले दलहरुले आफू र आफ्ना समर्थकलाई आचारसंहिता पालनामा प्रतिवद्ध बनाउने हो भने समस्या नहुने बताए । कतै स्वतःस्फूर्त अनुगमन गरेर त कतै उजुरी परेका आधारमा आयोगले आचारसंहिता पालना नगर्नेलाई कारबाहीको दायरामा ल्याएको उनले जनाए ।

संवाद समूह लुम्बिनीका सहजकर्ता बिक्रम खड्का, आन्तरिक मामिला, कानून तथा संचार मन्त्रालयका प्रतिनिधि माधव शर्मा, राष्ट्रिय मानव अधिकार आयोग बुटवलका अधिकृत दीपक ठाकुर, इलाका प्रहरी कार्यालय बुटवलका प्रमुख ठग बहादुर केसी, नेपाल पत्रकार महासंघ रुपन्देहीका अध्यक्ष रामराज पोखरेल, अधिवक्ता महेन्द्र प्रसाद पाण्डे, मानवअधिकारकर्मी रीमा बिसी लगायतले आ आफ्नो भनाई राखेका थिए ।