खोज

बुटवल, २१ कात्तिक ।

संघीय र प्रदेश तहको निर्वाचन आउन अव मात्र १४ दिन बाँकी छ । निर्वाचनको मिति नजिकिंदै जाँदा निर्वाचन आयोगले मतदाता शिक्षा भने गाउँ तहसम्म पु¥याउन सकेको छैन । ग्रामीण क्षेत्रका बासिन्दाले भोट हाल्ने तरिका सिकाउन कोही नआएको बताउँछन् ।

रुपन्देही मर्चवारका उमेश गुप्ताले भने–“राजनीतिक दलहरु चुनाव प्रचारमा आउँछन्, जान्छन्, तर भोट हाल्ने तरिका सिकाउँदैनन् ।” उनका अनुसार आयोगका कर्मचारी पनि मतदाता शिक्षा लिएर गाउँ तहसम्म आएका छैनन् ।

रुपन्देहीको सियारी गाउँपालिका–३ कि उमावती कहाँरले मतदाता शिक्षाबारे थाहा नभएको बताइन् । “पहिले पनि भोट त हालेको हो, तर कोही सिकाउन आएनन्, अहिले पनि सिकाउन आएका छैनन्”–उनल े भनिन् ।

रुपन्देही जिल्लामा १६ वटा स्थानीय तह छन् । जिल्ला निर्वाचन कार्यालय रुपन्देहीले सबै पालिकाहरुमा मतदाता शिक्षा कार्यक्रम सञ्चालन भैरहेको दावी गरेको छ । “हामीले १६ वटै स्थानीय तहमा मतदाता शिक्षा कार्यक्रम चलाइरहेका छौं, कतिपय ठाउँमा नपुगेको हुन सक्छ, हामी क्रमशः सञ्चालन गर्छौं”–जिल्ला निर्वाचन कार्यालय रुपन्देहीका प्रमुख अयोध्या भण्डारीले भने ।

कर्यालयले रुपन्देहीका १५५ वटा वडामा मतदाता शिक्षा सहजकर्ता परिचालन गरेको छ । ती सहजकर्ताहरुलाई अनुगमन अधिकृतहरुले तालिम दिइरहेको र उनीहरुले नागरिकलाई मतदाता शिक्षाबारे जानकारी गराउने भण्डारीले बताए ।

म्तदाता शिक्षाका लागि खटिने सहजकर्ताहरु ततालिमपछि मात्र कार्यस्थलमा खटिने र उनीहरुले मत बदर हुन नदिने गरी कार्यक्रम सञ्चालन गर्ने निर्वाचन कार्यालयले जानकारी दिएको छ । “निर्वाचनमा सहज रुपमा मतदान गर्ने वातावरण बनाउन र मतदान बदर हुन नदिन सहजकर्ताहरुलाई वडा स्तरमा पठाइएको छ । उनीहरूले नमुना मतपत्र, मतादाता शिक्षा हाते पुस्तिका, निर्वाचन आचार सहिंता, मतपत्रमा छाप लगाउने सही तरिका, मतदान बदर हुनसक्ने अवस्था जस्ता विषयमा तयार परिएका मतदाता शिक्षा सामग्री सहित शिक्षा दिनेछन्”–उनले भने ।

सहजकर्ताले नागरिक जम्मा हुने सार्वजनिक स्थल, पार्टी कार्यालय, गाउँटोल र बजारमा पुगेर मतदाता शिक्षाको बारेमा नागरिकहरुलाई सहजीकरण गर्नेछन् । चार वटा मतपत्रमा चार वटा चिह्नमा मतदान गर्नुपर्ने भएकाले मतदाता झुक्किन सक्ने सम्भावनालाई यो शिक्षाले सहजता प्रदान गर्ने निर्वाचन कार्यालयले जानकारी दिएको छ ।

रुपन्देहीमा २०८ वटा मतदान स्थलबाट निर्वाचन हुँदै छ, जसमा ७०२ वटा मतदान केन्द्र छन् । रुपन्देहीको हकमा प्रत्यक्ष तर्फको मतपत्रबाहेक सबै निर्वाचन सामग्रीहरू आइसकेको छ । अब यसलाई आवश्यकताअनुसार बाँडफाँट गर्ने र पठाउनुभन्दा अगाडिको अवस्थासम्मको लागि तयारी अवस्थामा राख्न कार्यालय लागेको छ ।