खोज

बुटवल, २० कात्तिक ।

नेकपा एमालेका उपाध्यक्ष तथा पुर्वमन्त्री बिष्णु प्रसाद पौडेलले मुलुकको समृद्धि र भौतिक पुर्वाधार विकासका लागि एमाले नेतृत्वको सरकार आवश्यक रहेको बताएका छन् । सडक यातायात, उर्जा, कृषि, सिंचाईलगायत क्षेत्रको पूर्वाधार विकासबाट मात्रै मुलुकको समृद्धि संभव भएको कुरामा जोड दिँदै बिगतमा एमाले सरकारले अघि सारेका योजनाहरु पुरा गर्न तथा स्थायी सरकारका लागि एमालेलाई बिजयी बनाउनु पर्ने नेता पौडेलको भनाई छ ।

रुपन्देहीको निर्वाचन क्षेत्र नम्बर २ बाट प्रतिनिधी सभा सदस्य पदका लागि उम्मेदवार समेत रहेका नेता पौडेलले रुपन्देही जिल्लालाई विकासको रोल मोडलका रुपमा अघि बढाउने कुरा उल्लेख गर्दै एमालेको सरकार गठन भएपछि बुटवलको सुकुम्बासी समस्या समाधान गरिने पनि बाचा गरेका छन् । बुटवल १२ को तामनगर लगायतका विभिन्न स्थानमा आयोजना गरिएका कोण सभाहरुलाई सम्बोधन गर्दै पुर्व अर्थमन्त्री समेत रहेका नेता पौडेलले मुलुकको आर्थिक विकासका लागि नेकपा एमालेसँग मात्र स्पष्ट भिजन रहेकोले पनि एमालेलाई जिताउन आग्रह गरेका छन् ।

सिद्धार्थ राजमार्गको बुटवल–पाल्पा खण्डको सिद्धबाबा क्षेत्रमा सुरुङ्ग मार्ग निर्माण गरिने, तिनाउ नदीमा सिग्नेचर पुल बनाउने, तिनाउ कोरिडोरको निर्माण गर्ने, बुटवल–नारायणगढ सडक यथाशीघ्र सम्पन्न गर्ने, बुटवल–पोखरा सिद्धार्थ राजमार्गको स्तरोन्नती गर्ने र कालीगण्डकी–तिनाउ डाईभर्सन योजना अघि बढाउने लगायतका कार्य सम्पन्न गर्नका लागि आफुले जित्नु पर्ने दावी समेत उनले गरेका छन् ।

त्यस अवसरमा रुपन्देही २ (२) बाट प्रदेशसभाका लागि उम्मेदवार लुम्बिनी प्रदेशका पुर्वमन्त्री भोजप्रसाद श्रेष्ठले परमादेशी गठबन्धन सरकारका कारण मुलुकमा अन्यौलता र अस्थिरता उत्पन्न भएको आरोप लगाए । राप्रपाका नेता मृगेन्द्रकुमार शेरचनले मुलुकलाई राजनैतिक निकास दिन र विकास दिन एमाले नेतृत्वको विपक्षी गठबन्धनले जित्नु पर्ने तर्क अघि सारेका थिए ।