खोज

चन्द्रौटा (कपिलवस्तु), १७ कात्तिक ।

चन्द्रौटा उद्योग बाणिज्य संघ कपिलवस्तुले बैंक तथा वित्तीय संस्थाले वृद्धि गरेको चर्को ब्याजदर विरुद्ध चन्द्रौटामा विरोध प्रदर्शन गरेको छ । बिहीबार चन्द्रौटा बजार क्षेत्र र्‍याली परिक्रमा गरी विरोध गरिएको संघले जनाएको छ ।

व्यवसायीहरुले बैंकको ब्याज एक अंकमा हुनुपर्ने, वेस्ट रेटमा २ प्रतिशत मात्र प्रिमियम थपेर कर्जा प्रवाह गर्नुपर्ने, छिटै विशेष आर्थिक नीति ल्याई राष्ट्रको अर्थतन्त्र चलायमान गर्नुपर्ने लगायतका माग राखेर प्रर्दशन गरेको संघका अध्यक्ष ईश्वरी प्रसाद पाण्डेले बताए । चन्द्रौटा बजार प्रदर्शनपछि संघले शिवराज नगरपालिका र ईलाका प्रशासन कार्यालयमा ज्ञापन पत्र समेत बुझाइएको समेत अध्यक्ष पाण्डे जानकारी दिए ।

बैंक तथा वित्तीय संस्थाले बढाएको चर्को ब्याजदरले पछिल्लो केही समय यता उद्योग र व्यापारीहरु मारमा परेका बताउँछन् । बैंकहरुले प्रिमीयम र सेवा शुल्क बढि लिएमा संघको कार्यालयमा जानकारी गराउन समेत संघले आग्रह गरेको छ ।

व्यवसायीहरु यतिबेला कठिन मोडमा रहेकाले व्याज वृद्धि गरि दुख दिने काम बन्द गर्न व्यावसायीले आग्रह गरेका छन । व्यापार, व्यवसाय प्रभावित भएको बेला चर्को ब्याजले झनै सास्ती थपिएकोले विरोधमा उत्रिन बाध्य भएको जनाइएको छ ।

अध्यक्ष पाण्डेका अनुसार अर्थतन्त्र सुधार भएपछि पनि बैंककहरुले उद्योगीसँग सहकार्य गर्नुपर्ने भएकाले आफ्नो निणर्य सच्याउन अनुरोध गरिएको छ । विरोध प्रर्दशनमा वाणगंगा यातायात व्यवसायी समिति र ब्युटी पार्लर तथा कस्मेटिक व्यवसायी संघले समेत एक्यावद्धता जनाएको छन । आफ्ना मागप्रति सरकार, बैंक तथा वित्तीय संस्थाहरु गम्भिर नभए थप आन्दोलनका कार्यक्रम गर्ने समेत वाणिज्य संघले चेतावनी समेत दिएको छ ।