खोज

देवदह, १६ कात्तिक ।

सत्तारूढ पाँच दलीय गठबन्धनले रुपन्देही क्षेत्र नं. १ का ३३ वटै वडामा संयुक्त सम्पर्क कार्यालय उदघाटन गरेको छ । चारदिन अघि कात्तिक १२ गते रोहिणी गाउँपालिका वडा नं. १ दुगौलीबाट सुरू भएको कार्यालय उदघाटन कार्यक्रम बुधबार देवदह वडा नं. ३ को सुर्यपुरामा कार्यालय उदघाटनसंगै सकिएको हो ।

सम्पर्क कार्यालय उदघाटन गर्दै पाँच दलीय गठबन्धनको समर्थनमा प्रतिनिधि सभा सदस्य पदमा स्वतन्त्र उम्मेदवारी दिएका नेता घनश्याम भुसालले संविधानको रक्षा र यस क्षेत्रको विकासका लागि गठबन्धनले जित्नुपर्ने बताए ।

तत्कालीन प्रधानमन्त्री केपी शर्मा ओलीले संविधानमाथि आक्रमण गरेपछि पाँच दलीय गठबन्धन बनेको उल्लेख गर्दै भुसालले परिवर्तनलाई संस्थागत गर्न र देशलाई आर्थिक विकासको दिशामा अगाडि बढाउन संविधानको रक्षा अनिवार्य शर्त रहेको धारणा व्यक्त गरे ।

देवदहलाई युनेस्कोमा दर्ता गर्नका लागि पहल गर्ने र बुद्ध मावलीको रूपमा त्यसको संभावना पनि रहेको उल्लेख गर्दै उनले रूपन्देही–१ को विकासका लागि स्रोत र साधनको कमी हुन नदिईने प्रतिबद्धता व्यक्त गरे ।

त्यसैगरी रुपन्देही क्षेत्र नं. १ (२) का प्रदेश सभा सदस्य पदका उम्मेदवार अब्दुल रज्जाकले मतदातालाई कुनै पनि प्रलोभनमा नपरी मतदान गर्न आग्रह गरे । मासु र रक्सीसँ भोट साट्ने उम्मेदवारले देश विकास भन्दा पनि विनासको बाटोमा लैजाने भन्दै त्यस्ता उम्मेदवारसँग सजक रहन अनुरोध गरे ।

आन्दोलन, त्याग र बलिदानबाट बनाइएको संविधान विपरीत कार्य गर्नेले जनताको काम गर्न नसक्ने बताउदै उनले जनताको हरेक सुखदुःख र विकास निर्माणमा नेपाली काङ्ग्रेस सदैब जनताको साथमा रहेको बताए । अहिलेको निर्वाचन विकासवादी र गफ मात्र गर्नेको बीचमा भएको तर्क गर्दै उनले जनताको मर्म बुझ्ने र जनताको साथमा रहने नेतालाई चुन्ने कि चुनावको बेलामा भोट माग्न आउने र अरु बेला सम्पर्कबिहीन हुने नेतालाई चुन्ने भनेर विचार मतदाताले विचार गर्नुपर्ने बताए ।

सोही क्रममा रुपन्देही क्षेत्र नं १ (१) प्रदेश सभा सदस्य पदका उम्मेदवार बिश्वनाथ यादवले भूमिहिनको समस्या समाधान र क्षेत्र नं १ को भौतिक विकासका लागि गठबन्धनका उम्मेदवारहरु अग्रपंक्तिमा रहेर काम गर्ने बताए । गठबन्धनको एकतामा इमानदारिता रहेको बताउँदै उनले गठबन्धनका उम्मेदवारहरुलाइ जनताले निर्धक्क साथ बिस्वास गर्न र मतदान गर्न जनतालाइ आग्रह गरे ।