खोज

बुटवलं, ९ कात्तिक ।

रुपन्देही क्षेत्र नम्बर २ मा जनमुक्ति पार्टीबाट उम्मेदवारी दिएका केशवबहादुर थापालाई सत्तारुढ गठबन्धनले समर्थन गर्ने निर्णय गरेको छ । आफ्नो उम्मेदवारी सर्वोच्च अदालतले खारेज गरेसँगै उम्मेदवारबिहीन बनेको सत्ता गठबन्धनले जनमुक्तिका थापालाई समर्थन गर्ने निर्णय गरेको हो ।

गठबन्धनका उम्मेदवार बनेका नेकपा एसका राजु गुरुङको उम्मेदवारी खारेज भएको थियो । बुधवार गठबन्धन दलका शीर्ष नेताहरू नेपाली कांग्रेसका सभापति शेरबहादुर देउवा, नेकपा (माओवादी केन्द्र) का अध्यक्ष पुष्पकमल दाहाल प्रचण्ड, एकीकृत समाजवादीका अध्यक्ष माधवकुमार नेपाल र राष्ट्रिय जनमोर्चाका अध्यक्ष चित्रबहादुर केसीले संयुक्त विज्ञप्ति प्रकाशित गरी गठबन्धनको तर्फबाट थापालाई समर्थन गर्ने निर्णय गरिएको जानकारी दिएका छन् ।

गुरुङलाई बैंकिङ कालोसूचीमा परेको भेटाएपछि निर्वाचन आयोगले उम्मेदवारी खारेज गरेको थियो तर उनी सर्वोच्च गएका थिए । तर सर्वोच्चले पनि आयोगको निर्णय सदर गरिदिएपछि बिलखबन्धनमा परेका गठबन्धन दलका शीर्ष नेताले जनमुक्तिका उम्मेदवारलाई सघाउने निर्णय गरेका हुन् ।
नेपाली कांग्रेसले केही दिनदेखि यो विषयलाई चलाखीपूर्वक अगाडि बढाएको थियो । रुपन्देही ३ मा उम्मेदवार बनेका कांग्रेस नेता तथा गृहमन्त्री बालकृष्ण खाडको क्षेत्रमा जनमुक्तिका मत करिब ४ हजार हाराहारीमा भएकाले पनि त्यो क्षेत्र सुरक्षित बनाउन २ नं मा जनमुक्तिलाई समर्थन गरेको कांग्रेस नेताले बताएका छन् ।

रुपन्देही २ मा उम्मेदवारी दिएका जनमुक्तिका थापा सो पार्टीको केन्द्रीय कार्यकारी उपाध्यक्ष हुन् । यो क्षेत्रमा नेकपा एमालेका उपाध्यक्ष विष्णु पौडेल उम्मेदवार छन् । लगातार तीन पटक फराकिलो मतान्तरले चुनाव जितेका पौडेलको अब प्रमुख प्रतिस्पर्धी थापा हुनेछन् ।

२०७४ सालको संसदीय चुनावमा रुपन्देही २ मा राष्ट्रिय जनमुक्ति पार्टी तेस्रो स्थानमा आएको थियो । एमालेका विष्णु पौडेल ४४ हजार ९ मत ल्याउँदा कांग्रेसका युवराज गिरीले २१ हजार ९४६ मत ल्याएका थिए। राष्ट्रिय जनमुक्ति पार्टीका उम्मेदवार रुकबहादुर पुनले ३ हजार ६८८ मत पाएका थिए ।

त्यसबेला एमाले र माओवादी एक भएर चुनाव लडेका थिए। गत वैशाखमा भएको स्थानीय निर्वाचनमा बुटवल उपमहानगरपालिकामा जनमुक्तिले ११ जना वडा सदस्य लिएर नेकपा एमालेसँग तालमेल गरेको थियो। तर एउटा वडा सदस्य मात्र जित्न सक्यो ।

यहाँ अब एमाले उपाध्यक्ष पौडेलसँग गठबन्धनको समर्थन लिएका राष्ट्रिय जनमुक्ति पार्टीका अध्यक्ष केशबहादुर थापासहित केही साना पार्टी र स्वतन्त्र उम्मेदवार चुनावी मैदानमा हुनेछन् ।

जसमा नेपाल मजदुर किसान पार्टीका हरिसुन्दर बासी, नेपाल दलित पार्टीका राजु शाही, नेपाली कांग्रेस बिपीकी नमादेवी गौतम जैसी, मंगोल नेशनल अर्गनाइजेशनका दीपक थापा र राष्ट्रिय स्वतन्त्र पार्टीका गणेश पौडेल उम्मेदवार रहेका छन् ।

यस्तै रुपसिंह थापा, केशव बस्याल, टोपनारायण पौडेल, तारा घिमिरे, तुलसीराम यादव, सुरेन्द्र भारी, प्रदीप ज्ञवाली र विष्णु विक स्वतन्त्र उम्मेदवार रहेका छन् । यो क्षेत्रमा १८ जनाको उम्मेदवारी दर्ता भएकोमा राजु गुरुङ, हाम्रो नेपाली पार्टीका डा. निकोलस भनिने कमल भुसाल र स्वतन्त्र उम्मेदवार हिमाल बस्याल उम्मेदवार बन्न अयोग्य भएको ठहर गर्दै निर्वाचन अधिकृतको कार्यालयले उम्मेदवारी खारेज गरेको थियो । कमल भुसाल उम्मेदवारी खारेजविरुद्ध सर्वोच्च गएका छन् । उनको मुद्दाको पेशी कात्तिक १५ गते छ । यदि उनको उम्मेदवारी कायम भए १६ जना हुनेछन् ।