खोज

गुल्मी, ५ कात्तिक ।

गुल्मीमा नमुना मतदान सम्पन्न भएको छ । जिल्लाको रेसुंगा नगरपालिका र मुसिकोट नगरपालिकामा शनिबार नमुना मतदान सम्पन्न भएको जिल्ला निर्वाचन कार्यालय गुल्मीले जनाएको छ ।
निर्वाचन कार्यालयले आगामी ४ मंसिरमा हुने प्रतिनिधि सभा तथा प्रदेश सभा निर्वाचनमा बदर मत कम गर्ने उद्देश्यले शनिबार नमुना मतदान गरेको हो । रेसुङ्गा नगरपालिका १४ को पराल्मी र मुसिकोट नगरपालिका ७ को वामीमा नमुना मतदान गरिएको जिल्ला निर्वाचन कार्यालय गुल्मीकी निर्वाचन अधिकारी मायाँ कुँवरले जानकारी दिएकी छन् ।

रेसुङ्गा नगरपालिकाको पराल्मीमा ८० बर्षीय तुल्सीराम पोख्रेल र मुसिकोट नगरपालिकामा ७५ बर्षीय धनिश्वर घिमिरेले पहिलो मतदान गरेका थिए । नमुना मतदानमा पराल्मीमा २५ मत र मुसिकोटमा ६५ मत खसेको थियो । खसेको मतमा १९ मत बदर भएको जिल्ला निर्वाचन कार्यालय गुल्मीका सूचना अधिकारी मेघलाल पाण्डेयले बताए ।

मतदान प्रकुयामा स्थानीय सवै उमेर समुहका राजनीतिक दल, नागरिक समाज, विद्यार्थी र क्लवका प्रतिनिधिहरु सहभागी बनेका थिए । नमुना मतदान कार्यक्रममा मुख्य निर्वाचन अधिकृत वसन्तराज पौडेल, प्रमुख जिल्ला अधिकारी पुण्यविक्रम पौडेल, निर्वाचन अधिकृत मायाँ कुँवर, सुरक्षा निकायका प्रमुख तथा स्थानीय तहका प्रमुख एवं प्रतिनिधिहरुको सहभागिता रहेको थियो ।

जिल्लामा कुल दुई लाख २३ हजार छ सय १५ मतदाता रहेका छन् । दुई नगरपालिका र १० गाउँपालिका रहेको जिल्लामा कुल एक सय ४२ मतदान स्थल रहेका छन् भने दुई सय ७८ मतदान केन्द्र रहेको जिल्ला निर्वाचन कार्यालय गुल्मीले जनाएको छ ।