खोज

बुटवल, ३ कात्तिक ।

राष्ट्रिय जनमोर्चाबाट विद्रोह गरेको समूहले नेकपा मशाल ब्यूँताएको छ । राष्ट्रिय जनमोर्चाको भूमिगत मोर्चा मानिने नेपाल कम्युनिष्ट पार्टी (मसाल) बाट विभाजित समूहले नेकपा मशाल ब्युँताएको हो । राष्ट्रिय जनमोर्चा हाल सत्ता गठबन्धनमा रहेको छ भने विद्रोही संगठन गठबन्धनमा छैन ।

उसले आगामी निर्वाचनमा भाग नलिने पनि बताएको छ । मसालको असन्तुष्ट समूहको लुम्बिनीमा सम्पन्न विशेष महाधिवेशनले नेकपा मशालका रुपमा पार्टीलाई अघि बढाउने निर्णय गरेको हो । महाधिवेशनले सन्तबहादुर नेपाली महासचिव र रामबहादुर बुढा प्रवक्ता रहेको २५ पूर्ण १० वैकल्पिक गरी ३५ सदस्यीय केन्द्रीय समिति निर्वाचित गरेको छ ।

महाधिवेशनबारे जानकारी गराउन बिहीबार बुटवलमा आयोजित पत्रकार सम्मेलनमा महासचिव नेपालीले मोहनविक्रम सिंह नेतृत्वको नेकपा मसाल दक्षिणपन्थी संशोधनवादी भएकाले पार्टीबाट विद्रोह गर्नुपरेको बताए । उनले मसालका महामन्त्री मोहनविक्रम सिंह र नेता चित्रबहादुर केसीलाई पार्टीबाट निष्काशन गरिएको दाबी गरे ।

नेकपा मशालले आसन्न प्रतिनिधिसभा र प्रदेशसभा निर्वाचनमा भाग नलिने महासचिव नेपालीले बताए । मशालको पार्टीको मूल संरचना भूमिगत रहने तर जिल्लास्तरका नेता खुला हुने उनले जानकारी दिए । पार्टी पोलिटब्युरो सदस्यहरु कृष्णराज पौडेलले बागलुङ, अर्घाखाँची, प्यूठानसहित ४० भन्दा बढी जिल्लामा पार्टीको संगठन बनेको बताए ।

महाधिवेशनले पार्टीको सहयोगी संगठनको रुपमा रहेको जातीय समता समाजलाई विघटन गरेको छ । स्थानीय तह निर्वाचनमा विजयी जनप्रतिनिधिहरुसमेत राष्ट्रिय जनमोर्चाका ५० प्रतिशत नेता–कार्यकर्ता आफ्नो पक्षमा रहेको महासचिव नेपालीको दाबी छ ।