खोज

भैरहवा, २ कात्तिक ।

गृहमन्त्री बालकृष्ण खाँणले सिद्धार्थनगरलाई स्मार्ट सिटी बनाइने बताएका छन् । उनले सिद्धार्थनगरले अन्तर्राष्ट्रियस्तरमै पहिचान बनाएकाले यसलाई व्यवस्थित, विकसित र स्मार्ट बनाउनुपर्नेमा जोड दिए ।

काँग्रेस केन्द्रीय सदस्य एवं रुपन्देही ३ का प्रतिनिधिसभा उम्मेदवार खाणले भैरहवामा आयोजित कार्यक्रममा ‘स्मार्ट सिद्धार्थनगर’ को सुरुवात ‘सिद्धार्थ रिङरोड’ बनाएर गरिने बताए ।

‘निर्वाचन सकिएलगत्तै सबै वडा, गाउँबस्तीलाई समेटेर सुरुमा रिङरोड निर्माणको काम अघि बढाइने छ’, उनले भने, ‘यसले सिद्धार्थनगरलाई विकसित सहरका रुपमा पहिचान दिनेछ ।’ निर्वाचन पछि रिङरोड बनाउन डीपीआर बनाउने र त्यसपछि निर्माणको काम सुरु गर्ने उनको भनाई छ । विकसित देशहरुमा सहरको पहिचान रिङरोड पनि भएको जनाउँदै गृहमन्त्री खाँणले ती देशहरुका जस्तै भैरहवालाई पनि सफा, सुन्दर, व्यवस्थित र विकसित गर्ने आफ्नो र पाँच दलीय गठबन्धनको लक्ष्य रहेको बताए ।

उनले रिङरोडले सहर र सहरभित्रैका बस्तीलाई जोड्दा स्थानीय उत्पादनको बजारीकरण, भित्री बस्तीहरुको सहरीकरण हुने र यसले सहरलाई थप उचाईमा पु¥याउने बताए । गौतमबुद्ध अन्तर्राष्ट्रिय विमानस्थल, विशेष आर्थिक क्षेत्र (सेज), नेपालकै दोस्रो ठूलो भन्सार नाका जस्ता कारण पनि रिङरोड आवश्यक भएको र स्मार्ट सिद्धार्थनगर जरुरी रहेको खाँणले प्रष्ट्याए । ‘यहाँ धेरै स्वदेशी तथा विदेशी पाहुनाहरु आउनुहुन्छ, यहाँ आउनेले आहा, सिद्धार्थनगर भन्ने वातावरण सिर्जना गर्छौं, त्यसका लागि नगरपालिकालाई आवश्यक पर्ने बजेट प्रदेश र संघ सरकारको समन्वयमा उपलब्ध गराउन मैले पहल गर्छु । यहाँ हुने कुनै पनि काममा बजेट अभाव हुन दिँदैन’–उनले भने ।

गौतमबुद्ध विमानस्थललाई पूर्ण क्षमतामा चलाउन सरकार लागि परेको जनाउँदै उनले विमानस्थल पूर्ण क्षमतामा चल्दा सबैभन्दा बढी लाभ भैरहवाबासीले पाउने भएकाले त्यहीअनुसार योजना बनाएर काम गर्न आफूले पहल गरिरहेको प्रष्ट पारे ।

रुपन्देही क्षेत्र नम्बर ३ प्रदेश सभा (१) का सत्ता गठबन्धनका उम्मेदवार सन्तोषकुमार पाण्डेयले विपक्षी गठबन्धनका प्रतिनिधि सभा उम्मेदवार दीपक बोहरा सत्ता र शक्तिमा हुँदा भैरहवामा कुनै ठूला आयोजना ल्याउन नसकेको आरोप लगाए ।

गठबन्धनले जिते यस क्षेत्रको समग्र विकास हुने उनको भनाई छ । पाँच दलीय गठबन्धनले बुधबार क्षेत्र नम्बर ३ अन्तर्गत सिद्धार्थनगरको वडा नम्बर २, ३ र ५ मा कार्यकर्ता भेला गरेको हो । कार्यकर्ता भेलामा बोल्ने उम्मेदवार तथा गठबन्धनका नेताहरुले यो निर्वाचन मुलुकलाई सही दिशामा लैजानका लागि गठबन्धनलाई जिताउन आग्रह गरेका थिए ।