खोज

काठमाडौं, १ भदौ ।

नेकपा एमालेको दोस्रो विधान महाधिवेशन आगामी भदौ २० देखि २२ गतेसम्म काठमाडौंको गोदावरीस्थित सनराइज हलमा हुने भएको छ । महाधिवेशनमा कुल २ हजार ३९२ जना सहभागी हुने भएका छन्, जसमा २ हजार १२८ जना प्रतिनिधि र २६४ जना आयोजक रहनेछन् ।

शनिबार पार्टी केन्द्रीय कार्यालय, च्यासलमा बसेको महाधिवेशन मूल व्यवस्थापन समितिको बैठकमा संगठन विभागले प्रस्तुत गरेको प्रतिवेदनअनुसार २०७८ सालमा चितवनमा सम्पन्न १०औं राष्ट्रिय महाधिवेशनका प्रतिनिधि मात्र यस विधान महाधिवेशनका प्रतिनिधि हुने व्यवस्था गरिएको छ । त्यसअनुसार केही केन्द्रीय सदस्यसमेत आयोजकको भूमिकामा रहनेछन् । महाधिवेशनका प्रतिनिधिहरूलाई डिजिटल परिचयपत्र उपलब्ध गराइनेछ ।

महाधिवेशनलाई भव्य र व्यवस्थित बनाउन सातदोबाटोदेखि गोदावरीसम्मका विभिन्न स्थानहरूमा स्वागतद्वार निर्माण गरिने निर्णय गरिएको छ । बागमती प्रदेश,ललितपुर जिल्ला,स्थानीय कमिटी र जनसंगठनहरुका तर्फबाट स्वागतद्वार राखिने छ ।

कार्यक्रमस्थलमा कम्तीमा ३०० जना स्वयंसेवक खटाइने तयारी गरिएको छ । स्वयंसेवकहरूको व्यवस्थापन युवा संघ, खेलकुद महासंघ लगायतका जनसंगठनहरूले गर्नेछन् । महाधिवेशनमा सहभागी हुने प्रतिनिधिलाई कुनै शुल्क नलिने र आवासको प्रबन्ध प्रतिनिधि आफैंले गर्नुपर्ने निर्णय छ ।

यातायातको सुविधा उपलब्ध गराउन पार्टीका विभिन्न कमिटीहरूले सातदोबाटोदेखि गोदावरीसम्म सार्वजनिक यातायातको व्यवस्था मिलाउने भएका छन् । साथै, महाधिवेशनस्थलमा तीन सिफ्टमा चिकित्सकसहितको स्वास्थ्य जाँच कक्ष स्थापना गरिने छ ।

विधान संशोधनका सन्दर्भमा एमालेले मातहतका सबै कमिटीहरूलाई भदौ १० गतेसम्म सुझाव दिन समय दिएको छ । प्राप्त सुझावलाई समेटेर राजनीतिक प्रतिवेदन तयार पारिनेछ । महाधिवेशनमा अध्यक्ष तथा प्रधानमन्त्री केपी शर्मा ओलीले राजनीतिक प्रतिवेदन, उपाध्यक्ष तथा उपप्रधानमन्त्री विष्णुप्रसाद पौडेलले विधान संशोधन प्रस्ताव, र महासचिव शंकर पोखरेलले सांगठनिक प्रतिवेदन प्रस्तुत गर्नेछन् ।

महासचिव पोखरेलले व्यवस्थापन समितिको बैठकलाई सम्बोधन गर्दै महाधिवेशनलाई एकताको उत्सवका रूपमा लिँदै सबै जिम्मेवारीप्रति गम्भीर बन्न नेताहरूलाई आह्वान गरे । उनले व्यवस्थापनमा खटिएका सबै समितिहरूलाई तीव्र गतिमा काम गर्न निर्देशनसमेत दिएका छन् ।

नेकपा एमालेले महाधिवेशनलाई सफल बनाउन विभिन्न उपसमितिहरू गठन गरी नेताहरूलाई स्पष्ट जिम्मेवारी तोकेको छ ।