खोज

बुटवल, २३ फागुन ।

नेपाली चलचित्र ‘द्रौपदी’ डोल्पाको सामाजिक कथामा आधारित नेपाली चलचित्र द्रौपदी आउँदो चैत ८ गतेदेखि देशभर प्रदर्शनमा आउँदैछ। प्रचार-प्रसारलाई तीव्र बनाउँदै निर्माण टिम देश दौडाहामा निस्किएको छ।

डोल्पाको ग्रामीण परिवेशलाई केन्द्रमा राखेर निर्माण गरिएको यो चलचित्रले महिला संवेदनासँग सम्बन्धित कथावस्तुलाई उठान गर्दै कर्णालीको मौलिक र विशिष्ट कथालाई उजागर गर्ने प्रयास गरेको छ। शुक्रबार सार्वजनिक भएको चलचित्रको ट्रेलरले द्रौपदी नेपाली ग्रामीण बस्तीको अवस्था र जनजीवनको कथा बोकेको संकेत गर्छ।

चलचित्रमा स्थानीय समुदायले भोग्नुपरेका विभिन्न चुनौतीहरूको यथार्थ चित्रण गरिएको छ। प्रचार-प्रसारको क्रममा निर्माण टिम शुक्रबार बुटवल पुगेको थियो। चलचित्रका निर्देशक तथा कलाकार प्रकाश ज्ञवालीका अनुसार द्रौपदी बहुप्रतीक्षित फिल्म हो, जसको छायांकन डोल्पाको प्रसिद्ध शे-फोक्सुण्डो ताललगायत कर्णालीका विभिन्न रमणीय स्थानमा गरिएको छ। यो फिल्म ऋषिराज आचार्यको निर्देशनमा तयार भएको हो।

“चलचित्रको नाम द्रौपदी धार्मिक जस्तो सुनिए पनि, यसको कथा महाभारतको पात्रसँग सम्बन्धित नभई हाम्रो गाउँ र परिवेशकै एक महिला पात्रको जीवनसँग जोडिएको छ,” निर्देशक आचार्य भन्छन्। उनका अनुसार चलचित्रले नेपाली समाजको यथार्थ कथा प्रस्तुत गर्नुका साथै नेपालको प्राकृतिक सौन्दर्यलाई पनि दर्शाउनेछ। सामाजिक कथावस्तुमा आधारित द्रौपदी गम्भीर विषय उठान गर्ने महिला संवेदनासँग जोडिएको चलचित्र हो।

अन्तर्राष्ट्रिय दर्शकलाई समेत लक्षित गरी निर्माण गरिएको यस फिल्ममा आश्विनी शाही, रवि ओड, कविराज भाम, जेएलसन अधिकारी, सुजाता तिमल्सिना, विष्णु ठडराई, प्रकाश ज्ञवाली, सीता बौडेल, सुरज अधिकारी तथा निर्देशक ऋषिराज आचार्य स्वयंको अभिनय रहेको छ। फिल्मको छायांकन कर्णालीका विभिन्न आकर्षक स्थानहरूमा गरिएको छ, जहाँ सदरमुकामबाट तीन दिन पैदल यात्रा गरेर पुग्नुपर्ने शे-फोक्सुण्डो ताल मुख्य छ।

यी दृश्यहरूले दर्शकलाई नेपालका दुर्गम तर अनुपम प्राकृतिक सौन्दर्यको अनुभूति गराउने विश्वास गरिएको छ। निर्माण टिमका अनुसार द्रौपदी ले नेपालको ग्रामीण जीवनलाई वास्तविक रूपमा प्रस्तुत गर्नेछ। निर्देशक आचार्य भन्छन्, “नेपाल काठमाडौँ मात्रै होइन, फिल्म हेर्दा दर्शकले वास्तविक नेपालका दुर्गम भेगहरू देख्न पाउनेछन्।”

यही कारण फिल्ममा नयाँ कलाकारलाई प्रमुख भूमिका दिइएको छ, ताकि पात्रहरूको प्रस्तुति यथार्थपरक देखियोस्। चलचित्रलाई अझ प्रभावशाली बनाउन दुई महिनाको कार्यशाला आयोजना गरेर छायांकन गरिएको हो। “फिल्म हेर्दा दर्शकले बुझ्नेछन् कि, यदि चिनिएका अनुहार समावेश गरिएको भए कथाले न्याय पाउने थिएन,” निर्देशक बताउँछन्।