खोज

दाङ, ११ मङ्सिर । चार वर्ष मलेसियामा रोजगार गरेका हरपल केसी अहिले स्वदेश फर्किएर कृषि कर्मलाई अघि बढाएका छन । घोराही उपमहानगरपालिका –९, अस्पाराका हरपल केसी ठुलो सपना बोकेर मलेसिया गएका थिए । उनको सपना जस्तो विदेशमा भएन ।

विदेशमा जत्तिको मेहनत गरे स्वदेशमा नै राम्रो हुने उनि बताउछन । मेहनत गरेर जोगाएको रकमबाट अहिले उनि कुखुरापालन र कृषिमा अग्रसर भएका छन । ‘मलेसिया बसेर फर्किएर व्यावसायीक कृषिमा लागे ।’—उनले भने । घरको आर्थिक अवस्था कमजोरी भएकै कारण विदेश जानुपरेको उनले दुखेसो सुनाए । मलेसियामा महिनाको ४०/५० हजार रुपैया कमाई हुने र त्यसैबाट केही रकम जम्मा गर्न सफल भएको उनले बताए । एकातर्फ मेहनत अर्कोतर्फ परिवारबाट टाढा बस्नुपर्ने पिडाको अन्त्यका लागि घर फर्किएको उनि बताउछन । ‘चार वर्ष बिदेश बसाईले धेरै सिकायो ।’— उनले भने । उनले आफ्नै घर छेउको एक कट्ठा जमिनमा आठ लाख रुपैया लगानी गरेर खोर निमार्ण गरेका छन । जहा एक हजार पाँच सय कुखुरा राख्न मिलेको छ । उनले शुरु गरेको कुखुरापालनबाट अहिले आम्दानी दिन शुरु गरेको छ । अण्डा उत्पादन गर्ने लक्ष्यसहित शुरु गरेको उनको कुखुरापालनले प्रतिफल दिदा उनि दंग छन । ‘व्यापारी घरमै आएर अण्डा लैजाने गरेका छन् ।’—उनले भने । अण्डा बिक्रीका लागि बजार धाउन नपर्दा उनी खुशी छन । कुखुरासंगै उनले ब्यवसायी कृषि पनि अघि बढाएका छन ।

दुई कट्ठा जमिनमा टमाटर खेती गरेका छन् । उनले लगाएका टमाटरका बोटमा लटरम्म टमाटरहरु पाकेका छन् । बेमौसमी टमाटर खेतीलाई घाम पानी र तुसारोले असरबाट बचाउन उनले आधुनिक कृषि प्रणाली अप्नाएका छन । घोराही उपमहानगरपालिका कृषि शाखाबाट अनुदानमा उनले टलेन जडान गरेका हुन । टलेनमा आधा सहुलियत प्राप्त भएको उनले बताए । अनुदानकै कारण उनि कृषि पेशालाई निरन्तरता दिने गरि हौसिएका छन । ‘स्थानिय सरकार हाम्रो साथमा भएको अनुभुती भएको छ ।’— उनले भने । घरपरिवारसंग बसेर आफनै कर्ममा उनि रमाएका छन । उनको यो पेशामा बाबा, आमा, श्रीमती र छोराछोरी सबैको साथ रहेको छ । अहिले बजारमा ८० रुपैया किलोमा टमाटर घरैबाट बिक्री गरेका उनि आगामी वर्ष अझ जमिन लिजमा लिएर खेति बताउने सोचमा छन ।

पछिल्लोसमय स्वदेशमा केही भएन भन्ने मानसिकताका साथ युवा पलायन भैरहेको बेला दाङका केसी भने आफ्नै देश मेहनत गर्दा धेरै हुन्छ भन्ने उदाहरण पेश गर्न सफल भएका छन । सरकारबाट युवाहरुलाई स्वदेशमा नै पेशा ब्यवसायमा अग्रसर हुने गरि नीतिगत सहयोग गर्न जरुरी रहेको उनले बताए ।

घोराही उपमहानगरपालिकाले उनि जस्ता धेरै पशु पालन र कृषिमा अग्रसर युवाहरुलाई अनुदान दिएको आत्मर्निभर बनाउदै आएको छ ।घोराही उपमहानगरपालिका कृषि तथा पशु व्यावसाय प्रबन्धन शाखाले २४ जना मुक्त कमलरी तालिम र ६ हप्ते कुखुराका चल्ला (मासु र अण्डाका लागि), बिदेशबाट फर्केका ६ जना युबालाई इलेक्ट्रक च्याप कटर, ७ जना पशु पालक किसानलाई मुत्र संकलन सहितको भकारो सुधार कार्यक्रम, आकस्मिक कृषि संरक्षण कार्यक्रम, सय भन्दा बढीलाइ बिषदी र तरकारीका प्याकेजिङ बिउ बितरण गरेको छ ।

साना सिचाइ कार्यक्रम अन्तरगत १५ जनालाई पानी तान्ने मोटर, साना सिचाइ कार्यक्रम पक्की कुलो, पोखरी स्यालो टिउबेल निर्माण यसैगरि लिप्ट सिचाइ अन्तरगत सिचाइका लागि मोटर र पाइप १५ जना किसानलाई बितरण गरेको छ । ५४ जना किसानलाई हरियो घास बिस्तार कार्यक्रम अन्तरगत ५० प्रतिशत अनुदान बितरण गरेको छ । कोल्ड स्टोरमा आलु तथा तरकारी राख्ने १८ कृषकलाइ ५० प्रतिसत सहुलियत दिएको घोराही उपमहानगरपालिका पशु सेवा शाखाका प्रमुख श्रीधर अधिकारीले जानकारी दिए ।