खोज

तानसेन, १५ कात्तिक ।

वाङमय प्रज्ञा—प्रतिष्ठान, पाल्पाको आयोजनामा ११५ औं महाकवि लक्ष्मी प्रसाद देवकोटा जयन्ती तथा ७३ औं प्रतिभा संगम कार्यक्रम तानसेनको जनता माध्यमिक विद्यालयमा आज सम्पन्न भएको छ ।

कार्यक्रममा उपप्राध्यापक डा. टंक पन्थले महाकवि देवकोटाले नेपाली साहित्यमा पु¥याएको योगदानको चर्चा गर्दै राष्ट्रकवि माधव प्रसाद घिमिरेले भानुभक्त आचार्यको आदिकवि र देवकोटाको महाकवि सम्मान जनअनुमोदित भएको बताएको उल्लेख गरे । त्यसैगरी नाटककार बालकृष्ण समका शब्दमा महाकवि देवकोटा तीन पटक जन्मिएका छन् ः मुनामदन, शाकुन्तल र पागल कवितामा । डा. पन्थले देवकोटाको बहुआयामिक दृष्टिकोण उनका विभिन्न कृतिमा पाइने तथ्य उदाहरणसहित प्रस्तुत गर्दै देवकोटा मानवतावादी, भौतिकवादी, प्रगतिवादी र मूलतः सामाजिक एवम् मानवीय विकृतिहरूमाथि प्रहार गर्ने ब्यक्ति भएको बताए ।

महाकवि देवकोटाका जीवनका रोचक प्रसंगहरू कोट्याउँदै प्रतिष्ठानका अध्यक्ष गोपालप्रसाद वश्यालले देवकोटा नेपाली साहित्यका अतुलनीय, सर्वमान्य र विलक्षण प्रतिभाका धनी ब्यक्तित्व मात्र होइनन् उनको जीवन चाखलाग्दा घटनाहरूले भरिएको बताए । देवकोटामा भएको आँसुकवि प्रतिभा, नेपाली र अंग्रेजी दुवै भाषामा अत्यन्तै उत्कृष्ट कृतिहरू सिर्जना गरेका, स्वच्छन्दवादी कविता, निबन्ध, नाटक, कथा लगायत विधामा उत्कृष्टता देखाएका देवकोटाको विराट प्रतिभा नेपालले पाउनु सौभाग्य भएको अध्यक्ष वश्यालले बताए ।

कार्यक्रममा साहित्यकारहरू डा. टंक पन्थले देवकोटासम्बन्धी कविता, डा. शंकर गैरेले गजल, कवि आर बि निश्चलले प्रदेशबाट फर्कन आह्वानसहितको गद्य कविता, प्रगतिशील लेखक संघका अध्यक्ष रामप्रसाद अर्यालले मुक्तकहरू, पाल्पा साहित्य समाजका अध्यक्ष पुष्कर राज रेग्मीले वीर तथा श्रृंगारिक रसका शीतहरू, साहित्यकारहरू धातानन्द शर्माले देवकोटाको अन्तिम कविता वाचन र लक्ष्मी माविको सम्झना कविता, गोम विक्रमले चाडपर्व विशेष मुक्तक र लघुकथा, रोहित ज्ञवालीले गुलेली कविता, युवाकवि शंकर ढकालले संस्कृत भाषामा देशप्रेम कविता, धवल पुस्तकालयका अध्यक्ष युवराज पौडेल, जनतामा. वि.का प्रधानाध्यापक हरि प्रसाद घिमिरे र राम ज्ञवालीले कविता वाचन गरे भने प्रतिष्ठानका सचिव गणेश नेपालीले गजल प्रस्तुत गरेका थिए ।

कार्यक्रममा प्रस्तुत रचनाहरूको डा टंक पन्थले समिक्षा गरे । उनले प्रस्तुत रचनाहरूको छुट्टाछुट्टै टिप्पणी गर्दै प्रस्तुतिहरू लक्ष्मी जयन्तीसँग सान्दर्भिक, छन्द एवम् गद्यलयमा र कविताका विभिन्न विधामा संरचित, विविधभाव, रस र चेतनाले भरिएका रहेको बताए । रचनाहरूमा स्व—मूल्यांकन, राष्ट्रप्रेम, आर्थिक एवम् सामाजिक अवस्था, अभाव, प्रकृति र मानवीय क्रियाहरूको विमर्श, माता र मातृभूमिप्रति सद्भाव र श्रृंगार झल्किएका थिए ।

प्रतिष्ठानका अध्यक्ष गोपालप्रसाद वश्याल, सचिव गणेश ज्ञवालीलगायतले समेत दोवकोटाबारे चर्चा गरेको कार्यक्रममा जनता माविका प्रधानाध्यापक हरि प्रसाद घिमिरे र शिक्षक राम प्रसाद ढकालले शुभकामना ब्यक्त गरे । कार्यक्रममा सबै साहित्यकारहरूले तिहार, नेपाल सम्बत् र छठ पर्वका उपलक्ष्यमा शुभकामना आदानप्रदान गरेका थिए ।