खोज

सुर्खेत, ८ भदौ ।

गएको आइतवार राति जाजरकोटको नलगाड नगरपालिका स्थित वडा नं. २ को माझगाउँका लालबहादुर परियारको अस्थायी टहरा पहिरोले पुरियो । पहिरोले पुरिँदा एकै घरका तीनजनाको ज्यान गयो । बेलुका सबै परिवार सँगै खाना खाएर सुतेका उनीहरु बिहान भने जिवित रहेनन् ।

पहिरोमा पुरिदा ४२ वर्षीय लालबहादुर परियार, ३४ वर्षीया मनिसा परियार र दुई वर्षीय शिभम परियारको ज्यान गयो । उनीहरू गतवर्ष गएको भूकम्पका कारण विस्थापित भएर अस्थायी टहरामा बस्दै आएका थिए ।

विशेष गरी भारत गएर रोजगार गर्दै आएको यो परिवार घटना हुनु भन्दा केहीदिन अघि मात्र गाउँ फर्किएको जाजरकोट प्रहरीले जनाएको छ । घर माथि ढिस्को रहेको र निरन्तर पानी पर्दा उक्त ढिस्को खसेपछि टहरा भत्किन पुगेको जिल्ला प्रहरी कार्यालय जाजरकोटका डिएसपी पुरुषोत्तम पाण्डेले बताए । उनका अनुसार अस्थायी टहरामा बस्दै आएका भुकम्प पीडितहरु त्रसित अवस्थामा रहेका थिए । पहिरोकोे यो घटनासँगै अस्थायी टहरामा बसिरहेका भूकम्पपीडितहरू अहिले त्रसित बनेका छन् । अधिकांश भूकम्पपीडितका अस्थायी टहरामा बसोबास गर्दछन् ।

अस्थायी टहरामा बस्दै आएकी मनकुमारी शाहीले पहिरोको घटनापछि पानी परेको बेलामा डर लाग्ने गरेको बताइन् । ‘पानी पर्दा डर लाग्छ, पहिरो जाने हो कि भन्ने हुन्छ’ उनी भन्छिन्, ‘यहाँ बस्न डर लागेर पनि के गर्नु कता जाने हो ।’ पहिरोले एकै परिवारका तीनजनाको ज्यान गएको घटनापछि लामो समयसम्म पानी परिरहेको बेला अन्य आफन्तको घरमा बस्न जाने गरेको उनले बताइन् ।

नलगाड नगरपालिकाका प्रमुख डम्मरबहादुर रावतले पालिकाका केही वडाहरु पहिरोको जोखिममा रहेको जनाए । उनका अनुसार पालिकाका १ देखि १३ वटै वडा जोखिममा रहेका छन् । सबैभन्दा बढी १, २, ३, ४ र ५ रहेको उनले जानकारी दिए ।

गतवर्ष कात्तिक १७ गतेको भूकम्पका कारण घर क्षति भएपछि यहाँका नागरिक अस्थायी आवासका लागि बनाएका टहरामा बस्दै आएका छन् । तिनै टहराहरू पहिरोको जोखिममा परेपछि मानवीय तथा अन्य क्षतिको त्रास बढेको छ ।

मौसमी मनसुन सुरु भएसँगै कर्णालीमा तीन सय ७४ वटा विपद्का घटना भएका छन् । प्रदेशभर विपद्का घटनामा १३ जनाको मृत्यु भएको छ भने एक जना बेपत्ता छन् । ५८ जना घाइते भएका छन् ।