खोज

सुर्खेत, ११ असार ।

कर्णाली प्रदेशमा लागुऔषध कारोबार बढ्दो क्रममा रहेको पाइएको छ । प्रदेश प्रहरी कार्यालयको तथ्यांक अनुसार वर्सेनि कारोबार गर्नेहरु बढेको पाइएको हो । पछिल्लो चार वर्षको अवधिमा भण्डै चार सयवटा लागुऔषधका मुद्दाहरु दर्ता भएका छन् । प्रहरीको तथ्यांक अनुसार पछिल्लो चार वर्षको अवधिमा तीन सय ८७ वटा लागुऔषध कारोवार सम्बन्धीका मुद्दा दर्ता भएका छन् । उक्त मुद्दामा ६ सय ७२ जना पक्राउ परेका छन् । जसमध्ये ४५ जना महिला रहेका छन् ।

प्रदेश प्रहरी कार्यालयको तथ्यांक अनुसार आर्थिक वर्ष २०७७÷०७८ मा ८४ वटा लागुऔषध सम्बन्धीका मुद्दा दर्ता भएका थिए । उक्त वर्ष एक सय २१ पुरुष र १५ महिला पक्राउ परेका थिए ।

यस्तै, आर्थिक वर्ष २०७८÷०७९ मा ९५ वटा लागुऔषध सम्बन्धीका मुद्दा दर्ता भए । उक्त वर्षमा एक सय ६४ पुरुष र आठ महिलापक्राउ परेका थिए । आर्थिक वर्ष २०७९÷०८० मा एक सय १४ वटा लागुऔषध सम्बन्धीका मुद्दा दर्ता भए । उक्त वर्षमा एक सय ९९ पुरुष र १६ जना महिला पक्राउ परेको प्रदेश प्रहरी कार्यालय सुर्खेको तथ्यांकमा उल्लेख छ ।

प्रदेशभर चालु आर्थिक वर्षको हालसम्म ९४ वटा लागुऔषध सम्बन्धीका मुद्दा दर्ता भएका छन् । जसमा एक सय ४३ पुरुष र ६ जना महिला पक्राउ परेका छन् ।

लागुऔषधको कारोबारमा विशेषगरी १५ देखि ३५ वर्ष उमेर समूहका युवायुवतीको संलग्न रहेको प्रहरीले जनाएको छ । गरिवी, बेरोजगारी, असफल प्रेम, साथीको लहैलहैमा लागेर, छिटो पैसा कमाउने चाहना लगायतका कारणले गर्दा लागुऔषधको कारोबार र प्रयोगकर्ता बढेको प्रहरीको अनुसन्धानले देखाएको छ । कतिपय लागुऔषधको कारोबार मात्रै गर्ने भेटिएका छन् भने केही भारत गएर लागुऔषध सेवन गर्ने र आफूलाई खानका लागि उतैबाट बोकेर ल्याउने गरेका छन् । खासगरी भारतीय सिमा नाकाहरुबाट यसको कारोबार हुने गरेको पाइएको छ ।

प्रदेशका १० जिल्लामध्ये सबैभन्दा बढी प्रदेश राजधानी वीरेन्द्रनगरमा लागुऔषधको कारोबार र लागुऔषध प्रयोगकर्ता भेटिएका छन् । वीरेन्द्रनगरमा लागुऔषधको ओसारपसार हुने गरेको प्रहरीको भनाई छ ।

कर्णाली प्रदेश प्रहरी कार्यालयका प्रवक्ता एसपी वीरबहादुर ओलीले साथीहरुको लहैलहैमा लागेर युवाहरु यसको लतमा लाग्ने गरेको पाइएको बताए । उनले यसको नियन्त्रण गर्न चुनौती रहेको बताए ।

‘पहिले सुर्खेत तथा वीरेन्द्रनगरका आसपासमा मात्र कारोबार गरिएको भेटिन्थ्यो भने आजभोली प्रदेशका सबै जिल्लामा यो भेटिएको छ’ उनले भने, ‘यसको प्रयोगकर्ताहरु बढ्दै गएको पाइएको छ ।’ पछिल्लो समय फेसन जस्तो रुपमा अगाडी बढेको उनले बताए ।

‘पारिवारिक तनाव, आर्थिक समस्या र साथीहरूको संगतमा लागेर यसमा फस्ने गरेको पाइएको छ,’ एसपी ओलीले भने, ‘प्रयोगकर्तालाई नियन्त्रण गर्न विशेष प्रहरी परिचालन गरेका छौं र जनचेतनामूलक कार्यक्रमहरु पनि सञ्चालन गर्दै आएका छौ ।’

लागुऔषधमा फस्न सक्ने सम्भावना खासगरी ८ देखि १२ कक्षाका बढी हुने भएकाले पनि यसमा प्रहरीले विशेष जोड दिँदै आएको छ । लागु औषधका कारण समाजमा अन्य आपराधिक घटनाहरु पनि हुनसक्ने भएकाले यस्ता आपराधिक गतिविधिका घटना बारेमा पनि सचेत हुनुपर्ने वलीको भनाई छ । लागुऔषधका साथै सामाजमा हुने आपराधिक घटना न्यूनिकरण गर्नको लागि कर्णालीमा सामुदायिक प्रहरी साझेदारी कार्यक्रम, लाल्टीन अभियानलगायतका अभियान सञ्चालन गरिरहेको छ ।

कर्णाली प्रदेशको राजधानी सुर्खेतमा लागूऔषधको अवस्था चिन्ताजनक अवस्थामा रहेको छ । लागूऔषध कारोबारको अवस्था अत्यन्त नाजुक अवस्थामा रहेको पाइएको हो । पछिल्ला केहीवर्षको तथ्यांकले समेत सुर्खेतमा लागुऔषधको कारोबार बढेको देखिन्छ ।