खोज

लुम्बिनी, ७ पुस । विकट भौगोलिक अवस्था । निर्जन पहाड । सुनसान बस्ती । छिनछिनमा परिवर्तन हुने कठिन मौषम । निक्कै जोखिम र कठिन यात्रा गर्दै पैदल गाउँ पुग्दा सबै थकित र आलस्य मान्छन् । राम्रो बाटो न, घर । कष्टकर जीवनयापनले थातथलो छोड्दै गाउँले । ३५/४० घरबाट पातलिँदै तीन घरको गाउँ । तर, कष्टकर यात्राको पीडा भोग्दै गाउँ पुग्नेहरू भने स्वागत गर्न तम्तयार बसेको हिमश्रृंखला देख्दा सबै दुःख पीडा भुल्छन् ।

यो गाउँ हो कर्णाली चिसापानीदेखि ४ घण्टा पैदल उकालो हिँडेर पुगिने सुर्खेतको वराहाताल गाउँपालिका वडा नं. ३ राजकाडा । राजकाडा स्थित रणबहादुर बुढाको चुरे होमस्टे नं. २ को उत्तर पूर्व लहरैदेखिने मनमोहक हिमश्रृंखलाले सबै आल्हादित बन्छन् । बिहानै सूर्योदयको किरण हिमालमा पर्दा देखिने लातित्यमय दृष्यले सबै रोमाञ्चित बन्छन् । पर क्षितिजमा हिमाल र आँखा नजिकै बादल र पहाडको लुकामारीको प्राकृतिक मनमोहकताको सुन्दरताले सबै लोभिन्छन् । संसाझ पुग्नेले जुनेली रातमा टल्किरहेको हिमश्रृंखला देख्दा उस्तै रोमाञ्चित बन्छन् ।

उकालोमा हिँड्नुको दुःख, थोपा थोपा पानीको लागि तड्पिनुको पीडा र पहाडी भेगको चिसो सिरेटोले हानेको सबै दुःख बिर्साउने दृश्य राजकाडामा लुकेर बसेकोछ । भिरोलो गाउँ । अग्ला–अग्ला पत्थर र चट्टानले गाउँको रौनकता थपेको थियो । भिरका गहमा पहेलपुर तोरी र हरियो गहँुको बाली लहलहाउँदै गरेको देख्दा अर्को मोहकता थपिएको छ । बालीनाली, रुखबिरुवा र फलफूलका बोटविरुवा नजिकबाट देखिने सेताम्य हिमश्रृंखलाका लहरैले जो कोहीपनि रमाउँछन् । राजकाँडाको वैभव र सुन्दरता शब्दमा जति बखान गरेपनि कमै हुन्छ । तर, प्राकृतिक छटाको मनोरम दृष्यसँग रमाउन भने राजकाडा पुग्नै पर्छ ।