खोज

पाल्पा, १९ साउन ।  व्यबसायिक पशुपालनमा लागेका व्यवसायीहरू लम्की स्किन रोगबाट छटपटाइ रहेको अवस्थामा भेटेरिनरी अस्पताल तथा पशुसेवा विज्ञ केन्द्र पाल्पाले पशुचौपायाहरूमा खोप लगाउन थालेको छ । पाल्पामा २०७९ फागुन महिना देखी हाल सम्म लम्की स्किन रोग बाट करीव ६ हजार ५ सय पशु चौपायाहरू विरामी भएका छन भने करीव ३ सय पशुहरूको मृत्यु भईसकेको छ ।

पहिलो चरणमा कार्यालयले दुई हजार गाई भैसी, गोरु रागाहरूमा यो खोप लगाउदै आएको छ । कार्यालयले स्थानीयतहका पशु शाखा कार्यालय मार्फत पशु प्राविधिकहरूको सहयोगमा उन्नत जातका गाई, भैसीहरूमा खोप लगाउँदै आएकोे पशुसेवा विज्ञ केन्द्र पाल्पाका प्रमुख दुर्गा प्रसाद खनालले बताए । पाल्पामा लम्की स्किन विरुद्धको खोप बढी मात्रामा माग गरेपनि देशभरी वितरण गर्नुपर्ने अवस्था रहेकोले अर्काे चरणमा आवश्यक मात्रामा खोप आउने कार्यालय प्रमुख खनालले बताए ।

पाल्पामा अहिले लम्की स्किन रोग पूर्ण रूपमा नियन्त्रण आएको भएपनि भोलीका दिनमा महामारीको रूपमा फैलिन नपाओस भनी खोप अभियान लाई तिव्रता दिएको कार्यालयका पशु चिकित्सक डा. नविन बस्यालले बताए । पाल्पामा स्थानीय गाई गोरु बाट व्यबसायिक फार्मका उन्नत जाताका गाईहरूमा सक्रमण फैलिएको थियो । पाल्पामा सबै पशुचौपायामाको लागी करीव ३० हजार खोपको आवश्यकता पर्ने पशु चिकित्सक डा. बस्यालले बताए ।

पाल्पामा लम्की स्किन रोग पहिलो पटक देखा परेको हो । यो रोग भाइरस मार्फत सर्छ । यसको औषधि र उपचार छैन् । यो रोगका लक्षणहरू साधारण र हल्का रूपदेखि निकै कडा खालको पनि देखिन सक्छ । साना पशुहरूमा यो रोग कडारूपमा लाग्दछ भने वयस्क पशुहरूमा साधारण लक्षणहरू देखिन्छ । रोगी पशुहरूमा ज्वरो १०४ – १०५ डिग्री फरेनहाईटसम्म आउने, घास नखाने र झोक्राउने लक्षण देखिन्छ । त्यसको २–३ दिनमा पशुको शरीरभरी नै छालामा गिर्खा र गाँठाहरू देखिन सुरु गर्ने पिप जम्मा भएर घाउ बन्ने, भित्री अङ्गहरू पेट, फोक्सो, श्वासनलीमा पनि यस्ता गिर्खा र गाँठाहरू बढ्न गई निमोनिया समेत हुने पशु चिकित्सक डा. बस्यालले बताए । यो रोग लामखुट्टे, किर्ना र भुसुना जस्ता कीराहरू बाट एक पशु बाट अर्काे पशुमा सार्ने गर्छन् । पाल्पामा २०७९ श्रावण देखी २०८० असार सम्म ५२ हजार ८ सय ७२ मेट्रिक टन दुध र १० हजार ३ सय ३१ मेट्रिक टन मासु उत्पादन भएको छ । दुध र मासुमा गत बर्ष भन्दा केही रूपमा उत्पादन बृद्धि भएको छ । गत बर्ष ५२ हजार ५ सय ९८ दुध र १० हजार १ सय ६७ मेट्रिक टन मासु उत्पादन भएको थियो ।