खोज

दाङ, १० साउन ।

गत वर्ष साउन २० गते अर्जुन खोला र मसोट खोलाको दोभानमा पौडी खेल्ने क्रममा डुबेर घोराही उपमहानगरपालिका २ रामपुर बुकाका २६ वर्षीय निराजन पोखरेलको ज्यान गयो । साथीसँग नुहाउन दोभानमा पुगेका पोखरेलको पानीमा डुबेर ज्यान गएको हो ।

गएको असार १९ गते बबई गाउँपालिका वडा नम्बर ५ का १७ वर्षीय सीताराम खत्रीको नुहाउने क्रममा बबई नदीमा डुबेर ज्यान गयो । पानीको गहिराई र बहाव थाहा नपाउँदा खत्रीले अकालमा ज्यान गुमाउनु परेको प्रहरीले निस्कर्ष निकालेको थियो ।

घोराही ९ की १३ महिनाकी शिशुको २०७८ फागुन २२ गते घर अगाडि राखेको बाल्टीनको पानीमा डुबेर मृत्यु भएको थियो भने बंगलाचुली गाउँपालिका वडा नम्बर ७ का ८० वर्षीय दयाराम बुढामगरको २०७९ असोज २१ गते खोला तर्ने क्रममा चिप्लेर मृत्यु भएको हो ।

दाङमा पछिल्लो पाँच वर्षमा पानीमा डुबेर ज्यान गुमाउनेको संख्या अत्यधिक रहेको छ । जिल्ला आपतकालीन कार्यसंचालन केन्द्र दाङले दिएको तथ्यांक अनुसार दाङमा पानीमा डुबेर मृत्यु हुनेको संख्या २ सय २८ रहेको छ । जसमा १ सय ७४ पुरुष र ५४ जना महिला रहेका छन् । पानीमा डुबेर मृत्यु हुनेमा सबैभन्दा धेरै घोराही उपमहानगरपालिका अन्तर्गतका रहेका छन् । तथ्यांक अनुसार पछिल्लो पाँच वर्षमा घोराहीका ७१ जना, तुलसीपुरका ४५ जना, लमहीका ३१ जना, राप्तीका २२ जना, गढवाका १६ जनाको मृत्यु भएको छ । यसैगरी, बबईका ९ जना, दंगीशरणका ८ जना, शान्तिनगर र राजपुरका समान ५–५ जना, बंगलाचुलीका ३ जना तथा जिल्ला बाहिरका १६ जना गरी कुल २ सय २८ जना व्यक्तिको पानीमा डुबेरै मृत्यु भएको छ ।

जिल्ला विपद व्यवस्थापन समिति संयोजक एवम् प्रमुख जिल्ला अधिकारी सुशील वैद्यका अनुसार, जिल्लामा आर्थिक वर्ष २०७९–०८० मा ४५ जनाको जिल्लाका विभिन्न स्थानमा पानीमा डुबेर मृत्यु भएको छ । आर्थिक वर्ष २०७८–०७९ मा ६३ जनाको, आर्थिक वर्ष २०७७–०७८ मा ५५ जनाको, आर्थिक वर्ष २०७६–०७७ मा ३७ जनाको र आर्थिक वर्ष २०७५–०७६ मा २९ जनाको पानीमा डुबेर मृत्यु भएको तथ्यांक छ । पानीमा डुबेर ज्यान गुमाउनेहरुमा २० वर्ष मुनिका ८५ जना रहेका छन् । प्रमुख जिल्ला अधिकारी वैद्यले १३ महिनाकी शिशुदेखि ८० वर्षका वृद्धसम्म रहेका जानकारी दिए ।

जिल्ला प्रहरी कार्यालय दाङले पानीमा डुबेर भएका मृत्युमध्ये अधिकांश लापरवाहीका कारण भएको बताइएको छ । पानीसँगको खेलवाड गर्दा कतिपय घटना बगाएर, कतिपय घटना पौडिन नजान्दा तथा कतिपय घटना भवितव्यका कारण भएको जिल्ला प्रहरी कार्यालय दाङका प्रहरी प्रमुख प्रहरी उपरीक्षक वीरबहादुर वलीले जानकारी दिए । ‘केही घटना पानीमा हामफालेर आत्महत्या गरेका पनि छन् तर अधिकांश पानीमा डुबेर मरेका घटनाको अनुसन्धान गर्दा लापरवाहीका कारण भएको देखिएको छ’ उनले भने, ‘पानी र आगोसँग कहिले खेलवाड गर्नु हुँदैन भन्ने जान्दाजान्दै केही हुँदैन भनेर आफैले ज्यान गुमाएको अवस्था छ ।’

जिल्लाको भौगोलिक अवस्था तथा वर्षाको समयमा सावधानी नअपनाउँदा पनि पानीले बगाएर वा डुबेर मृत्यु भएको जिल्ला प्रहरी नायव उपरीक्षक प्रहरी प्रवक्ता राजनकुमार गौतमले बताए । साथीभाइसँग लहैलहैमा लागेर खोला नदीमा गएर नुहाउन खोज्दा धेरैजसो युवाहरुले पौडिन नजानेरै ज्यान गुमाएका छन् । उनले भने, ‘पानीमा डुबेर अकालमा ज्यान गुमाउने युवाको संख्या जिल्लामा धेरै छ । युवा जोश देखाउँदै लापरवाहीले नै अन्तिममा ज्यान फाल्न बाध्य भएका घटना छन् ।’ खोलानाला तर्दा होस् या पानीको काम गर्दा निकै सावधानी अपनाउनुपर्ने प्रहरीको भनाई छ ।