खोज

बुटवल, फागुन ।

विश्वमा नै चर्चित लनटेनिस खेलप्रतिको नेपालमा पनि आर्कषण बढ्दो छ । विभिन्न उमेर समुहको खेलाडी उत्पादन र पूर्वाधारमा पछिल्लो समय निक्कै लगानी बढेको छ । देशभरमा बनेका कुल ८० वटा लनटेनिस कोर्टमध्ये बुटवलको कोर्ट उत्कृष्टमा पर्दछ । देविनगरस्थित लनटेनिस कोर्ट मर्मत र रंगरोगन गरी चिटिक्क पारिएको छ । फागुन ६ गते शिवरात्रीको दिनमा सुरु हुने प्रथम मेयर कप तथा पाचौ राष्ट्रिय खुला लन टेनिस प्रतियोगिता २०७९ को तयारी रुपन्देही जिल्ला लन टेनिस संघको देविनगर टेनिस कम्प्लेक्स तयार गरिएको हो । करीब एक महिनादेखि नियमित मर्मतको काम गरिएको संघका अध्यक्ष गोपाल ज्ञवालीले बताए । ‘काठमाडौबाट ईट्टाको धुलो (सुर्खी) र नियमित पानीले भिजाएर रोल गरि मैदान तयार गरेका छौ’– उनले भने ।

अन्य समय खेल चल्दा दैनिक खेलपछि पानी हाल्ने र रोलर गरेर ब्यवस्थापन गरिदै आएको कोर्ट पछिल्लो एक महिनामा भने विशेष मर्मतको काम गरिएको उनले बताए । बुटवल उपमहानगरपालिकाको २ लाख रुपैया र खेलाडीहरुबाट २ लाख रुपैयाँ जुटाएर मैदान तयार गरिएको संघका अध्यक्ष गोपाल ज्ञवालीले बताए । प्रतियोगितालाई लक्षित गरी मर्मत कोर्टलाई मर्मत तथा रंगरोगन गरिएको उनले बताए । करीब ७ कठ्ठा क्षेत्रफलमा ४ वटा कोर्ट तयार भएको छ । २ वटा कोर्टसहित एक सय क्षमताको दर्शक बस्ने प्याराफिट राखेपको ८० लाख रुपैया र थप खेलाडीहरुबाट सहयोग जुटाएर कुल १ करोड १७ लाख रुपैयाँमा बि.सं २०७५ सालमा निर्माण भएको हो । जग्गा उपलब्ध र आर्थिक सहयोग मिले थप एक कोर्ट बनाएर अन्तर्राष्ट्रिय स्तरको प्रतियोगिता खेलाउन मिल्ने गरी पूर्वाधार बढाउने लक्ष्य रहेको उनको भनाई छ ।

बुटवलमा तयार भएको ४ वटा कोर्ट खेलाडीमैत्री बनेको नेपालका टेनिस खेलका वरिष्ठ कोच कृष्णराज घलेले बताए । करीब १५ वर्ष जुनियर टेनिस ईनिसेटिभ (जेटिआई) मा प्रशिक्षक रहेका र सयौ जुनियर खेलाडीहरु तयार गरेको बताउँदै उनले लनटेनिस खेलको विकासमा बुटवलले फड्को मारेको बताए । देशभर कोर्ट निमार्णमा प्राविधिक ज्ञान दिने, प्रतियोगिता आयोजना गर्न आवश्यक प्राविधिक सहयोग गर्दै आएका उनी प्रतियोगिताकै लागि बुटवल आएका छन् । विश्वमा लन टेनिसमा हार्ड, ग्रास र क्ले कोर्ट ३ प्रकारको कोर्ट प्रचलनमा रहेको उनी बताउँछन् । ‘नेपालमा भने सबैभन्दा बढी क्ले कोर्टमा खेल्ने गरिन्छ’–उनले भने । ग्रास कोर्टको निर्माणमात्र नभई ब्यवस्थापन गर्न खर्च बढी लाग्ने हँुदा यस्तो कोर्ट नेपालमै नभएको उनले बताए । ‘नेपालमा ग्रास कोर्ट नै छैन’–उनले भने । काठमाडौ, पोखरा र बुटवलमा गरी नेपालभरमा हाल ८० कोर्ट हार्ड र क्ले कोर्ट बनेको उनी बताउँछन् । अझ खेलाडीको सुरक्षाको दृष्टिकोणबाट क्ले कोर्ट धेरै उपयोगी भएको उनले बताए । ‘९० प्रतिशत क्ले कोर्ट छन’–उनले भने ।

यो कोर्टमा खेल्दा चोटपटकको सम्भावना कम हुने र खेलाडीहरुको र्याकेट, किटहरुमा खर्च कटौती हुने उनको दाबी छ । क्ले कोर्ट निर्माण गर्दा शुरुवातमा कम लाग्ने भएपनि निरन्तर ब्यवस्थापन र मर्मतमा भने निरन्तर खर्च हुने उनले बताए । हार्ड कोर्ट निर्माण गर्दा बढी हुने तर त्यसबाहेक मर्मतमा अन्य कोर्टको तुलनामा कम खर्च हुने उनले बताए । खुडा दुख्ने, जुत्ता च्यातिने, चोटपटक समेत लाग्ने सम्भावना बढी हँुदा यसप्रति कम रहेको उनले बताए । सातदोबाटोमा रहेको हार्ड कोर्टसहित बढीमा एक दर्जन कोर्ट हार्ड भएको उनले बताए । खेलाडीलाई क्ले कोर्ट धेरै उपयोगी हुने उनले बताए । प्रतियोगिताको लागि मैदान, टाईसिट निकाल्ने काम सकिएको खेल संयोजक सन्जय प्रकाश श्रेष्ठले बताए ।

प्रतियोगिताको अधिकांश खेलाडीहरु बुटवल आईसकेको उनले बताए । पाँच दिनसम्म चल्ने प्रतियोगितामा १ सय बढी खेलाडी विभिन्न समूहमा प्रतिष्पर्धा गर्दैछन् ।