खोज

बुटवल, ३२ साउन । रुपन्देहीको क्षेत्र नं. ५ मा नेपाली कांग्रेसभित्रको आन्तरिक विवाद चुलिंदै जांदा दुई गुटबीच पार्टीकै कार्यक्रममा हात हालाहालको अवस्था आएको छ । उक्त क्षेत्रबाट पटक पटक प्रतिनिधि सभा सदस्यमा निर्वाचित हुंदै आएका पुर्व अर्थ राज्यमन्त्री एवं सार्वजनिक लेखा समिति सभापति भरतकुमार शाह गत मंसिर ४ को आम निर्वाचनमा नेकपा एमालेका नयां उम्मेदवार बासुदेव घिमिरेसंग पराजित भएसंगै क्षेत्रमा विवाद शुरु भएको थियो ।
विगतमा वाम गठबन्धन हंदा समेत देशभरमै फराकिलो अन्तरले कांग्रेसले जितेको क्षेत्रमा गएको चुनावमा १० हजार मतान्तरले पराजय ब्यहोरेपछि शाह पक्षले कांग्रेस युवा नेता विष्णु पोखरेल लगायतका कारण हार भएको आरोप लगाएपछि विवाद झांगिंदै गएको हो । प्रदेश सभा सदस्य पदमा टिकट पाएर पनि खोसिएका डा. शेखर कोइराला निकटका पोखरेल लगायतले असहयोग गरेका कारण हार भएको आरोप लगाउंदै पोखरेललाई कारवाहीको सिफारिस गरेपछि पार्टीभित्र विवाद बढ्दै गएको हो ।
सैनामैना नगर सभापति रणबहादुर खनालले शाहको निर्देशनमा पोखरेललाई कारवाही सिफारिस गरेका थिए । तर सैनामैनासहित रुपन्देही ५ मा पर्ने ३२ वटा वडाका सभापति र २७ जना महाधिवेशन प्रतिनिधि मध्ये झण्डै दुई तिहाईले पोखरेललाई कारवाही सिफारिशको विपक्षमा उभिएका पोखरेल पक्षको दावी छ । शाहको क्षेत्रमा उनलाई बलियो साथ दिंदै आएका कांग्रेस प्रदेश समिति सदस्य एवं लुम्बिनी प्रदेश सभामा पार्टीका प्रमुख सचेतक फखरुद्दिन खानले पनि शाहको साथ छाडेपछि शाह एक्लिंदै गएका छन् । शाह पार्टी सभापति शेरबहादुर देउवा पक्षका हुन् भने खान र पोखरेल शेखर कोइराला समूहका हुन् ।
केही दिन अघि पार्टीको अान्तरिक विशेष अभियानमा नेता शाहले खानलाई लक्षित गरी ‘खान जस्ता नेता कांग्रेसमा थुप्रै रहेका’ भन्दै होच्याएपछि खानले उठेर प्रतिवाद गरेपछि झडपको स्थिति उत्पन्न भएको थियो ।
‘निर्वाचनमा जित हार स्वभाविक प्रकृया भएपनि शाहले निरंकुश शैलीले फरक समूहका नेतामाथि पुर्वाग्रही हिसाबले कारवाहीको सिफारिस गराउने र युवा नेतालाई होच्याउने, अपमान गर्ने भूमिका खेलेपछि उहां नै एक्लिंदै र कमजोर बन्दै जानुभएको हो’–महाधिवेशन प्रतिनिधि खिमानन्द खनालले बताए ।
खनालले भने–‘समयको माग र कार्यकर्ताको भावना अनुसार चल्नुपर्नेमा उहां हुकुमी शैलीमा चल्न खोज्दा उहां मात्र हैन क्षेत्रमा पार्टी नै कमजोर भएको छ ।’
शाहले आफुलाई निर्वाचनमा असहयोग गरेको भन्दै विगतका आफ्नै निकट सहयोगी पोखरेल लगायतका नेताहरुलाई कारवाही सिफारिस गरेपनि अल्पमतमा परेको पोखरेल निकट नेताहरु बताउंछन् । विना आधार र प्रमाण पोखरेलमाथिको जबरजस्ती कारवाहीको सिफारिस भएकै कारण क्षेत्रका ३२ वडा मध्ये दुई तिहाई भन्दा धेरै वडा सभापतिले कारवाहीको सिफारिस पुर्वाग्रही र गलत भएको बताउंदै पोखरेलको पक्षमा उभिएका खनालको दावी छ ।
नेता पोखरेलले भने, ‘पार्टीको एक पक्ष बसेर पुरानो मितिमा मलाई कारबाहीको निर्णय गरेको रहेछ, हस्ताक्षर दुरुपयोग भएको साथीहरुले संकेत पाएपछि विरोध भयो र त्यो निर्णय दुईतिहाईले उल्टिएको छ, यस्ता विषयले पार्टीलाई कमजोर बनाउने चिन्ता कार्यकर्तामा बढेको छ, पार्टीको बफादार सिफाईलाई आधारबिहीन आरोप लगाएर पार्टी बलियो बन्दैन ।’

नेता पोखरेलमाथि कारवाही सिफारिश भएपनि प्रदेश समितिले भने पोखरेललाई आन्तरिक विशेष अभियानमा पाल्पामा प्रतिनिधि खटाएको थियो । पोखरेल क्षेत्रका अधिकांश वडाका कार्यक्रमहरुमा पार्टीबाट प्रमुख अतिथि भएर निम्ताइएका हुन्छन् ।
पोखरेल निकट नेताहरुले स्वयं शाहले नै फखरुद्दिन खानलाई प्रदेश सभा सदस्य निर्वाचनमा हराउन भूमिका खेलेका प्रमाण आफूसंग रहेको भन्दै उल्टो पोखरेलमाथि अन्यापूर्वक कारवाही सिफारिश गरिएको दावी गर्छन् ।