खोज

बुटवल, ४ साउन ।

सामान्य प्रशासन मन्त्रालयले बुधबार गरेको परिपत्रसँगै विभिन्न स्थानीय तहबाट समायोजन मिलान भई आएका कर्मचारीलाई फिर्ता पठाउने तिलोत्तमा नगरपालिकाको निर्णय उल्टिएको छ । सामान्य प्रशासन मन्त्रालयले साउन ३ गते स्थानीय तहहरुलाई परिपत्र गर्दै समायोजन भएका स्थानीय तहका कर्मचारीहरुलाई फिर्ता नगर्न निर्देशन दिएसँगै तिलोत्तमाको निर्णय उल्टिएको हो । तिलोत्तमा नगरपालिकाले साउन १ गते जुन तह र निकायबाट समायोजन भई आएको हो, सोही तह र निकायमा फिर्ता पठाउने निर्णय गरेको थियो भने यसलाई कार्यान्वयन गर्न स्वाथ्य संस्थामा नगर प्रहरी नै खटाएको थियो ।

तिलोत्तमा नगरपालिकाले दरबन्दी भन्दा बढी कर्मचारी रहेको भन्दै जुन तह र निकायबाट समायोजन भई आएको हो सोही तह र निकायमा फिर्ता गर्ने निर्णय गरेको थियो । नगरपालिकाका प्रमुख प्रशासकीय अधिकृत नारायण अर्यालले त नगरपालिकाले गरेको निर्णय फिर्ता नलिने भन्दै आवश्यक परे अदालत जान चुनौती दिएका थिए । तिलोत्तमाले स्वास्थ्य तथा जनसंख्या मन्त्रालयको गत असार २५ गतेको परिपत्रको अपव्याखा गर्दै समायोजन ऐन २०७५ बमोजिम कर्मचारी समायोजन प्रकियाबाट समायोजन मिलान र समायोजन संशोधन भइ तिलोत्तमा नगरपालिकामा समायोजन भएका कर्मचारीहरुलाइ दरबन्दी भन्दा बढी रहेको भनी फिर्ता पठाउने निर्णय गरेको थियो ।

तिलोत्तमा नगरपालिकाले फिर्ता पठाउन गरेको निर्णय उल्टिएकाले अव यही समायोजन गरी हाजिर गराउनुको विकल्प नरहेको संगठनका रुपन्देही अध्यक्ष प्रेमप्रसाद खनालले बताए ।

दरबन्दी भन्दा वढी भएका समायोजन मिलान र समायोजन संशोधन भै आएका कर्मचारीहरुलाई समेत फिर्ता गर्ने गरी तिलोत्तमा नगरपालिकाले गरेको निर्णय कार्यान्वयन गराउन नगर प्रहरी नै खटाइ स्वास्थ्यकर्मी कार्यरत स्वास्थ्य सस्थामै रमाना पठाइ कर्मचारीहरुको मनोवल नै गिर्ने गरी तल्लो स्तरको व्यवहार प्रदर्शन गरेकोमा संगठनले आपत्ति जनाएको थियो ।

संघीय मामिला तथा सामान्य प्रशासन मन्त्रालयले साउन ३ गते गरेको परिपत्रमा प्रचलित कानुनी ब्यवस्था बमोजिम समायोजन भएका कर्मचारीहरुलाई उक्त कानुनी ब्यवस्था प्रतिकुल हुनेगरी फिर्ता गर्न नमिल्ने भएकोले निजहरुलाई साबिक बमोजिम हाजिर गराइ कामकाजमा लगाउन निर्देशन दिएको छ ।

उक्त परिपत्र प्राप्त हुनुु अघि कानुन विपरित हुने गरी गरिएको उक्त निर्णयको जिल्लामा कृयाशिल ट्रेड युनियनहरुले विरोध जनाउँदै आएका थिए । नेपाल निजामती कर्मचारी संगठन रुपन्देहीका अध्यक्ष प्रेम प्रसाद खनालको नेतृत्वमा आधिकारिक ट्रेड युनियन रुपन्देहिका अध्यक्ष रमेश पसाद पाण्डे, नेपाल निजामती कर्मचारी संगठनका केन्द्रीय सदस्य नारायण प्रसाद भण्डारी सहित पेशागत महासंघ नेपाल, राष्ट्रिय स्वास्थ्यकर्मी महासंघ, लगाएतका कृयाशिल ट्रेड युनियनका जिल्ला, प्रदेश तथा केन्द्रीय स्तरका नेताहरुले तिलोत्तमा नगरपालिकाका नगर प्रमुख, नगर उपप्रमुख, र प्रमुख प्रशासकीय अधिकृतहरुलाइ भेटी हालको समस्याका बिशयमा छलफल गरेका थिए । छलफलका क्रममा नगर प्रमुख र नगर उपप्रमुखले समस्या समाधानको लागि पहल गर्न समन्वयकारी भूमिका खेल्ने वताएका थिए भने प्रमुख प्रशासकीय अधिकृत नारायण अर्यालले निर्णय फिर्ता नलिने र कर्मचारीलाई निर्णय चित्त नबुझेको भए अदालत जान सक्ने भनी जवाफ दिएका थिए ।