खोज

बुटवल,२९ असार । नेपाल बैंकर्स एसोसिएसनले बिहीबार निक्षेपको ब्याजदरमा प्रतिस्पर्धा गर्न सकिने गरी खुला छाडेको छ।
बैंकहरूले २०७८ पुसदेखि सहमतिमा निक्षेपको ब्याजदर निर्धारण गर्दै आइरहेका थिए।
अहिले बैंकहरूले परीक्षणका रूपमा ब्याजदरमा प्रतिस्पर्धा गर्ने भएका हुन्।

संघका अध्यक्ष तथा एनएमबी बैंकका प्रमुख कार्यकारी अधिकृत सुनील केसीले अहिले बैंकिङ प्रणालीमा तरलता सहज अवस्थामा भकाले सहमतिमा ब्याजदर निर्धारण प्रक्रियाबारे धेरैले असन्तोषजनक टिप्पणी गरिरहेका हुंदा तत्काललाई खुला छाड्ने निर्णय भएको बताए ।

बिहीबार सहमति तोडिएसँगै बैंकहरूले साउनदेखि राष्ट्र बैंकले तोकेको सीमामा रहेर प्रतिस्पर्धात्मक ब्याजदर निर्धारण गर्ने भएका छन्।

हालको अवस्थामा बैंकहरूले व्यक्तिगत निक्षेपमा दिने ब्याजदर ८.९९ देखि १०.९८ प्रतिशतसम्म बनाउन सक्नेछन्। राष्ट्र बैंकको नियमअनुसार व्यक्तिगत निक्षेपको ब्याजदर योभन्दा घटबढ हुन नसक्ने अवस्था छ।

सबै वाणिज्य बैंकहरूले निक्षेपमा दिइरहेको ब्याजदरमा अघिल्लो महिनाभन्दा औसत १० प्रतिशत विन्दुले मात्रै घटबढ हुने गरी नयाँ ब्याजदर तोक्न सक्ने व्यवस्था छ। बैंकहरूले जेठदेखि व्यक्तिगत निक्षेपको ब्याजदर परिर्वतन गरेका छैनन्। जेठमा यस्तो ब्याजदर अधिकतम ९.९९ प्रतिशत थियो।

असारमा बैंकहरूले साधारण निक्षेपमा ५.४ देखि ७.४ प्रतिशतसम्म दिएका थिए। यो ब्याजदर पनि अब ३.९९ देखि ५.९८ प्रतिशतसम्म हुनेछ। मुद्दती निक्षेप र साधारण निक्षेपको ब्याज अन्तर ५ प्रतिशत हुनुपर्ने व्यवस्था छ।

अहिले कर्जा लगानीको लागि प्रशस्त पुँजी भएकाले बैंकहरूले ब्याजदरमा प्रतिस्पर्धा गर्ने भएका हुन्। बैंकहरूसँग पर्याप्त पुँजी भएकैले राष्ट्र बैंकबाट उनीहरूले लिने सापटी स्थायी तरलता सुविधा दैनिक ३/४ करोड रूपैयाँमा सीमित भएको छ। केही महिनाअघिसम्म बैंकहरूले यस्तो दैनिक सापटी ८७ अर्ब ४६ करोड रूपैयाँसम्म चलाएका थिए।

बैंकहरूले निक्षेपको तुलनामा कर्जा लगानी गर्न सक्ने अनुपात पनि घटेको छ। निक्षेपको ९० प्रतिशतसम्म कर्जा दिनसक्ने बैंकहरूको यो अनुपात हाल ८१.६७ प्रतिशत छ। यी सबै तथ्यांक हेर्दा बैंकहरूमा हाल करिब पाँच खर्ब बराबर लगानी योग्य पुँजी छ।