खोज

दाङ, ३० जेठ ।

नेपाल कम्युनिष्ट पार्र्टी मसालका महामन्त्री मोहन विक्रम सिंहले लामो त्याग तपस्या र बलिदानबाट प्राप्त भएको उपलब्धी गुम्ने खतरा बढेको बताएका छन् । राष्ट्रिय जनमोर्चा दाङले मंगलबार घोराहीमा आयोजना गरेको पत्रकार सम्मेलनमा महामन्त्री सिंहले जनताको साथ समर्थन र सहयोगमा ल्याएको अहिलेको लोकतान्त्रिक व्यवस्थामाथि वाह्य हस्तक्षेप अस्वाभाविक रुपमा बढ्दै गएकाले आम नेपाली जनता जागरुक हुनुपर्ने बेला आएको टिप्पणी गरे ।

“व्यवस्थाका बारेमा भ्रम पैदा गरेर देशमा अमेरिका साम्राज्यवाद भित्र्याउने, मरिसकेको राजतन्त्र व्यूँताउने, अराजकता फैलाउने र मुलुकलाई फेरि पनि विदेशी हस्तक्षेपको पकडमा राख्ने खालको गम्भीर षडयन्त्र भईरहेको छ”, उनले भने, “व्यवस्थामाथि जनतामा भ्रमको खेती गरेर वितृष्णा पैदा गर्ने अनि मुलुकलाई आफ्नो नियन्त्रणमा लिने विदेशी शक्तिको चलखेल निकै बढेको छ । यस प्रकारको गलत गतिविधिको प्रतिवाद गर्न र मुलुकलाई विदेशी हस्तक्षेत्रबाट बचाउन देशभक्त जनता जाग्नुपर्ने बेला आएको छ ।”

उनले प्रमुख दलहरुको गलत कार्यशैलीका कारण जनताले फरक दललाई दिएको मतका आधारमा सिंगो व्यवस्था नै खराब हो भन्ने खालको प्रचारबाजी गरेर सय वर्षभन्दा लामो संघर्षपछि आएको व्यवस्था नै उल्ट्याउने खालको षडयन्त्र सुरु भएको तर्क गरे । उनले देशभित्रका विभिन्न भ्रष्टाचारका काण्ड, अमेरिकी चासोको एमसीसी घटना, हालसालै प्रधानमन्त्री पुष्पकमल दाहालको भारत भ्रमणले दिएको सन्देश, नागरिकता विधेयक जस्ता काण्डले देशको राष्ट्रियतामाथि नै प्रश्न उठ्ने काम भएको हुँदा प्रमुख दलहरु सच्चिएर स्वाधिन नेपालको पक्षमा गम्भीर बन्नुपर्ने बताए ।

उनले हालै निर्वाचनमा होमिएर जनमतका साथ संसदमा प्रवेश गरेको राष्ट्रिय स्वतन्त्र पार्टी अमेरिकी साम्राज्यवाद र विचार बोकेको पार्टी देशका लागि घातक रहेको बताए । उनले आफुहरुले पनि वर्तमान सरकारलाई समर्थन गरेपनि मुलुकको अहित हुने जुनसुकै घटना वा काममा फरक विचार व्यक्त गर्दै समर्थन नगरेको जानकारी गराए । देश बचाउन र जनताको सर्वोपरी हितका पक्षमा सबै दलहरु एक ठाउँमा नउभिने हो भने अमेरिकाको अदृष्य चलखेलमा संसदमा प्रवेश गरेको नयाँ दलबाट थप खतरा रहेको दावी गरे ।