खोज

दाङ, ८ चैत ।

समाजमा विभिन्न प्रकृतिका आपराधिक घटना बढ्दै गएका छन् । जिल्ला प्रहरी कार्यालय दाङमा पछिल्लो तीन वर्षको तथ्यांक हेर्ने हो भने पनि आपराधिक घटना डरलाग्दो गरी बढ्दै गएको देखिएको छ ।

फागुन २६ गते राती घोराही उपमहानगरपालिका वडा नम्बर १७ कीे २९ वर्षीया महिलामाथि सामूहिक बलात्कार भयो । जबरजस्ती करणी गरेको अभियोगमा घोराही उपमहानगरपालिका–१७ बेलभारबाट ३ जनालाई प्रहरीले पक्राउ गरेको छ ।

ती महिलालाई बेलभार चोकदेखि करिब १ सय मिटर पश्चिममा रहेको खाली जग्गामा लगी जबरजस्ती करणी गरेको भन्ने उजुरीको आधारमो प्रहरीले पक्राउ गरेको हो । बंगलाचुली गाउँपालिका ४ मुलाबारीमा चार वर्षीया बालिकालाई बलात्कार गरेको आरोपमा प्रहरीले एक जनालाई पक्राउ गरी अनुसन्धान गरिरहेको छ ।

जिल्लामा भइरहेका बलात्कार, बलात्कार प्रयास, बहुविवाह, बाल यौन हिंसा, बेखविखन, आत्महत्यालगायतका अपराधको संख्या निकै ठूलो छ । आर्थिक वर्ष २०७७–०७८ मा ८१ बलात्कारका घटनामा महिला तथा बालिका पीडित भएका छन् भने आर्थिक वर्ष २०७८–०७९ मा ८३ बलात्कारका घटना भएको प्रहरी तथ्यांक छ । त्यस्तै चालु आर्थिक वर्षको हालसम्म ४८ वटा बलात्कारका घटना भएका जिल्ला प्रहरी उपरीक्षक वीर वहादुर वलीले जानकारी दिए ।

आपराधिक घटना बढ्दै गएपनि राजनीतिक, सामाजिक, पारिवारिक प्रभाव, पीडित र जाहेरीवाला नै आर्थिक प्रलोभनमा पर्ने, होस्टाइल हुने, अदालतमा बयान फेर्ने, पीडित खुलेर बोल्न नसक्ने अवस्थाले हिंसासम्बन्धी अपराध न्यूनीकरणमा चुनौती देखिएको प्रहरी उपरीक्षक वलीले बताए ।

प्रहरी कार्यालय दाङका प्रवक्ता राजन गौतमका अनुसार आर्थिक वर्ष २०७७–०७८ मा दुई सय ७० हिंसाका निवेदन प्रहरी कार्यालयमा आएका थिए भने आर्थिक वर्ष २०७८–०७९ मा यो संख्या चार सय ३१ पुगेको थियो । चालु आर्थिक वर्ष २०७९–०८० को हालसम्म प्रहरी कार्यालयमा हिंसाकोे उजुरी संख्या चार सय २० पुगिसकेको छ । विद्यमान कानूनको अज्ञानता, झुट्ठा निवेदन दिने प्रचलन पनि बढेको उनले बताए । समुदाय, नागरिक र प्रहरीको संयुक्त प्रयासबाट समाजलाई अपराधमुक्त गर्न सकिने हुँदा सबैको सामूहिक प्रयास आवश्यक रहेको उनको भनाई छ ।

आर्थिक वर्ष २०७७–०७८ मा दाङ प्रहरीमा एक सय ४१ घरेलु हिंसाका घटनाका निवेदन परे भने आर्थिक वर्ष २०७८–०७९ मा यो संख्या एक सय २९ थियो । चालु आर्थिक वर्षको फागुन मसान्तसम्म ७४ वटा घरेलु हिंसासम्बन्धी उजुरी प्रहरीसम्म पुगेका छन् ।

चालु आर्थिक वर्षको हालसम्म सबैभन्दा बढी लैंगिक हिंसाका घटना प्रहरी कार्यालयमा दर्र्ता भएको छ । लैंगिक हिंसाका ४ सय २० वटा रहेको छ । यसपछि बलात्कार सम्बन्धी घटना रहेको छ । समाजमा मौलाउँदो अपराधले महिलाहरु सुरक्षित छैनन् भन्ने स्पष्ट संकेत देखाएको छ । प्रहरी कार्यालयको तथ्यांक अनुसार, यो आर्थिक वर्षको हालसम्म ४८ वटा बलात्कारका घटना भएका छन् । बलात्कार प्रयासका १०, बाल यौन दुरुपयोगका ६ वटा घटना दर्ता भएको छ । पछिल्लो ३ वर्षको अन्तरालको अवस्था नियाल्दा वर्षेनी बलात्कारका घटना बढ्दै गएको देखिएको छ । आर्थिक वर्ष २०७७–०७८ मा ८१ वटा बलात्कारका घटना भएकोमा आर्थिक वर्ष २०७८–०७९ मा ८३ वटा र चालु आर्थिक वर्षको हालसम्म ४८ वटा बलात्कारका घटना हुनुले समाजमा यसको प्रभाव डरलाग्दो देखिएको छ ।

यसैगरी, हिंसापीडितहरुलाई उपचार, मनोपरामर्शलगायतका सेवा दिइरहेको लैंगिक हिंसासम्बन्धी एकद्वार संकट व्यवस्थापन केन्द्र (ओसिएमसी) ले घोराहीमा पनि पछिल्लो समय बलात्कारका ४७, यौन दुव्र्यवहारका १३ र शारीरिक दुव्र्यवहारका ५८, बालविवाह तथा जबर्जस्ती विवाहका १२, स्रोत साधन र अधिकारबाट बञ्चित भएका चार, मानसिक दुव्र्यवहारका ३१ र अन्य दुई गरी एक सय ६७ जनालाई सेवा दिएको ओसिएमसी संयोजक डा. विभूति शर्माले जानकारी दिइन् ।