खोज

बुटवल, २१ कात्तिक ।

नेकपा एमाले परित्याग गरी रुपन्देही १ मा स्वतन्त्र उम्मेदवार बनेका घनश्याम भुसालले संविधानको रक्षाका लागि आगामी निर्वाचन कोशेढुंगा सावित हुने बताएका छन् । जितेर गएपछि पटकपटक संविधान कुल्चिनेहरु विरुद्ध संयुक्त वाम लोकतान्त्रिक गठबन्धन र अन्य दलहरु एकतृत भएर अघि बढ्नु आजको आवश्यक्ता हो भन्दै स्वतन्त्र उम्मेदवार भुसालले समग्र मुलुकको हितका लागि आगामी निर्वाचन वर्तमान पाँचदलीय गठबन्धनले जित्नु पर्ने धारणा ब्यक्त गरे ।

तिलोत्तमा ८ स्थित रुपन्देही क्षेत्र नम्बर १ को चार नम्बर चोकमा घरदैलो कार्यक्रमपछि आयोजित कोण सभालाई सम्बोधन गर्दै नेता भुसालले गौतम बुद्धको मावली देवदह क्षेत्रको बृहत्तर विकास गरी लुम्बिनीसँग प्रत्यक्ष जोडेर आगामी केही बर्षमै समृद्ध क्षेत्र बनाउने उद्घोष समेत गरे । कोण सभामा नेता भुसालले शिक्षा, स्वास्थ्य, रोजगार र पूर्वाधार विकासलाई प्राथमिकतामा राखेर योजना तर्जुमा गरिने र सुशासन पक्षलाई सवल बनाउदै नीति तथा कार्यक्रमहरुको कार्यान्वयनको पक्षलाई मजबुत बनाउने प्रतिबद्धता समेत ब्यक्त गरेका थिए ।

नेपाल र नेपाली जनतालाई पटक पटक झुक्याउने खेल भैरहेको स्मरण गर्दै नेता भुसालले अवको निर्वाचनमा कोही पनि मतदाता भुक्किन नहुने सुझाव पनि आम मतदातालाई दिएका छन् । जनतामा भ्रमको खेती गरेर पटकपटक चुनाव जित्ने, चुनाव जितेपछि अकुत धनसम्पत्ती आर्जन गर्ने, तर जनताको हितमा पटक्कै काम नगर्ने नेतालाई अवको दिनमा भोट दिएर जिताउन नहुने जिकिर गर्दै नेता भुसालले गफाडी र चाकडीवाजहरुको जमाना गैसकेको पनि उल्लेख गरेका छन् ।

प्रदेश सभा उम्मेदवार अब्दुल रज्जाकले कृषि, पर्यटन, उद्योग ब्यवसायलाई योजनाबद्ध विकास गरी जनताको समृद्धिको सपना पुरा गर्न आफु दत्तचित्त भएर लाग्ने प्रतिबद्धता ब्यक्त गरेका छन् । बिगतमा आफुले सोही क्षेत्रको जनप्रतिनिधिको रुपमा काम गर्दा थुप्रै विकास निर्माण योजनाहरु कार्यान्वयनको चरणमा रहेको उल्लेख गर्दै नेपाली काँग्रेसका केन्द्रीय सदस्य समेत रहेका उम्मेदवार रज्जाकले कतिपय अधुरा योजनाहरु पुरा गर्न र नयाँ योजना तर्जुमा गर्न आफुलाई जिताउन आग्रह समेत गरेका छन् ।

नेपाली काँग्रेसका क्षेत्रिय सभापति हिराबहादुर खत्रीले रुपन्देही क्षेत्र नम्बर १ मा लोकतान्त्रिक गठबन्धनको जीत सुनिश्चित रहेको दावी गर्दै नेकपा एमालेका पुर्वनेता, माक्र्सवादका ब्याख्याता घनश्याम भुसाल नेतृत्वको टिमले जितेमा यस क्षेत्रको विकास र समृद्धिको यात्रा सफल हुने बिश्वास ब्यक्त गरेका छन् ।

प्रतिनिधि सभा सदस्य पदका लागि रुपन्देही क्षेत्र नम्बर १ मा बिगतमा एउटै पार्टीमा सँगसँगै काम गरेका ३ जना नेताहरु चुनावी मैदानमा छन् । नेपाली काँग्रेस नेतृत्वको सत्ता गठबन्धनको सहयोग र समर्थनमा उम्मेदवार बनेका एमालेका पुर्वनेता भुसालसहित एमाले नेता छविलाल बिश्वकर्मा र एमाले केन्द्रीय सदस्य टिकाराम चापागाईं पनि चुनावी मैदानमा छन् ।