खोज

गुल्मी, ६ कात्तिक ।

गुल्मी क्षेत्र नंं १ प्रदेश २ मा नेकपा एमालेका तर्फबाट उम्मेदवार बनेका फर्सुराम पाण्डेले गुल्मीका बेरोजगार युवालाई रोजगारीमा जोड्ने प्रतिवद्धता व्यक्त गरेका छन् ।

मंसिर ४ गते हुने प्रदेश सभाको निर्वाचनमा गुल्मी १ (२) बाट उम्मेदवार बनेका पाण्डेले निर्वाचन क्षेत्रमा घरदैलो गर्दैगर्दा गुल्मीका युवाको मूलभूत समस्या बेरोजगारी रहेकोले अव आफूले युवालाई रोजगारीमा जोड्ने गरी स्वावलम्वनका कार्यक्रम संचालन गर्ने प्रतिवद्धता जनाए ।

उनले घरदैलोका क्रममा युवाहरुलाई रोजगारी नै आफ्नो पहिलो प्राथमिकता रहेको बताउँदै अव युवाहरुले दिनभर क्यारेमबोर्ड खेलेर दिन बिताउनु पर्ने अवस्थाको अन्त्य गर्ने प्रतिवद्धता व्यक्त गरे ।

उम्मेदवार पाण्डेले भने– ‘गुल्मीमा युवाहरुमा बेरोजगारी ठूलो समस्या छ तसर्थ अव युवालाई उत्पादनसंग जोडने गरी काम गर्नुपर्छ । उनीहरुलाई आयआर्जनका विभिन्न माध्यममा संलग्न गराउनुपर्दछ । त्यसमा अव सवैले मिलेर काम गर्नुपर्छ ।’

पाण्डेले नेकपा एमालेले युवा बेरोजगारी समस्या समाधानका लागि ‘ग्रामीण विकासको आधार उत्पादन र बजार’ भन्ने नारा तय गरेको बताउँदै युवालाई उत्पादनसंग जोड्ने र युवाले उत्पादन गरेको वस्तुको बजार सुनिश्चित गरिदिने गरी काम गर्ने प्रतिवद्धता समेत व्यक्त गरे ।

गुल्मी जिल्लामा घरेलु तथा साना उद्योग स्थापना गरेर युवालाई रोजगारीमा जोड्ने गरी काम गर्न सकिने बताउँदै उम्मेदवार पाण्डेले त्यसका अतिरिक्त अरु संभावनाका विषय पनि खोजी गरेर गुल्मीबाट बेरोजगारी समस्या समाधानमा सिंगो नेकपा एमालेको ध्यान केन्द्रित भएको उल्लेख गरे ।

आफूपनि उद्यमशीलतासंग जोडिएको हुँदा युवालाई रोजगारीमा लगाउने कुरामा आफ्नो पहिलो ध्यान जाने बताउँदै पाण्डेले अव युवालाई कुनै न कुनै उद्यमसंग जोड्ने र बेरोजगारी समस्या समाधान गर्ने कुरामा आफू प्रतिवद्ध रहेको बताए।

उने नेकपा एमालेले राष्ट्रिय उत्पादनलाई प्राथमिकता दिने र विदेशी सामान र बस्तुको आयातमा रोक लगाएर नेपालकै उत्पादन र बजारलाई प्राथमिकता दिने नीति बनाएकोले यो नीति लागू गर्न एमालेका उम्मेदवारहरु बिजयी हुनुपर्ने बताए।

उनले नेकपा एमालेको ९ महिने सरकारको पालामा तत्कालीन प्रधानमन्त्री मनमोहन अधिकारीले एक सयबाट सुरु गरेको बृद्ध भत्ता अहिले चार हजार पुगेको बताउँदै एमालेको लोकप्रिय नीति पास गराउन एमालेमा भोट दिनुपर्ने बताए ।

अझैपनि थुप्रै राम्रा योजना र विकास निर्माणका काम गर्न सकिने बताउँदै उम्मेदवार पाण्डेले विगतमा आफ्नो गाउँ आफै बनाउँ जस्ता लोकप्रिय अभियानलाई अघि बढाउन नेकपा एमाले सरकारमा जानैपर्ने भएकोले गुल्मीका जनताले नेकपा एमालेका उमेदवारलाई बिजयी बनाउनुपर्ने बताउनु भयो ।