खोज

दाङ, २० मंसिर।

दाङमा पछिल्लो समय इलेक्ट्रिक गाडीको प्रयोग तीव्र रूपमा बढेको छ। वातावरणमैत्री, सस्तो सञ्चालन लागत र आधुनिक प्रविधिले समर्थित सुरक्षा प्रणालीका कारण दाङका उपभोक्ता पेट्रोल–डिजेलबाट इलेक्ट्रिक गाडीमा रूपान्तरण भइरहेका छन्। दाङमै ‘इभी संस्कार’ जरो गाड्दै गएको अनुभूति उपभोक्ताले नै गराइरहेका छन्।

घोराही उपमहानगरपालिका–१५ का बिबेक अधिकारी गत जेठदेखि बीवाईडी डल्फिन प्रयोग गर्दै आएका छन्। पेट्रोल गाडीभन्दा सहज र भरपर्दो महसुस भएकाले उनी अहिले पूर्ण रूपमा इलेक्ट्रिकमा निर्भर छन्। गाडीमा प्रयोग हुने सेन्सरले सानोतिनो छुँदा पनि चेतावनी दिने भएकाले दुर्घटना रोकथाममा मद्दत पुग्ने उनको अनुभव छ। घरमै चार्ज गर्न सकिने, तेलको झन्झट नहुने र वातावरणमैत्री यात्राले उनलाई इभीप्रति झनै आकर्षित बनाएको छ।

यस्तै, घोराहीकै माधव आचार्य पनि पेट्रोल गाडीबाट इलेक्ट्रिकतर्फ आकर्षित भएका उपभोक्ता हुन्। उनी गत दशैंमा इभी किनेपछि यात्रामा लाग्ने खर्च आधा घटेको बताउँछन्। धुवाँरहित, आवाजरहित र सफा यात्राले उनलाई मात्र होइन, उनलाई देखेर उनका साथीहरू समेत इलेक्ट्रिक गाडीप्रति लोभिएको उनले बताए।

दाङमा इभी बजारको विस्तार तिब्र गतिमा भइरहेको छ। बीवाईडी टिम ११ इभी ओल्ड दाङका प्रबन्ध निर्देशक बिमल पौडेलका अनुसार, गएको दशैं–तिहारमा मात्र घोराहीबाट ४५ वटा इलेक्ट्रिक गाडी बिक्री भएका छन्। उपभोक्ताहरूको साझा धारणा एउटै रहेको उनी बताउँछन्—इलेक्ट्रिक गाडी सजिलो, सस्तो र सुरक्षित छ।

त्यसैगरी, कंपनीका सेल्स म्यानेजर भुवन धितालले दाङमा इभी बिक्रीको वृद्धिदरलाई उल्लेखनीय भन्दै, २०८० सालमा ४० वटा, २०८१ मा ७३ वटा र २०८२ मा १०० वटा गाडी बिक्री भएको जानकारी दिए। अगाडि र पछाडि दुवैतर्फ सेन्सर रहने भएकाले दुर्घटना न्यून हुने र दुर्घटना भैहाले पनि मानवीय क्षति कम हुने उनले बताए। घरमै चार्ज स्टेसन जडान गर्न सकिने, घोराहीलगायत अन्य स्थानमा पनि चार्जिङ सुविधा उपलब्ध भएकाले चार्जिङको समस्या दाङमा नदेखिएको उनको भनाइ छ।

दाङमा इलेक्ट्रिक गाडीको बढ्दो प्रयोग केवल सवारी साधनको परिवर्तन मात्र होइन, उपभोक्ताको जीवनशैलीमै आएको नयाँधारको संकेत मानिएको छ। सजिलो, सफा र आर्थिक रूपमा फाइदाजनक भएकैले इलेक्ट्रिक गाडी दाङमा दैनिकीको हिस्सा बन्दै गएको छ। यसले दाङलाई निकट भविष्यमा ‘ग्रीन मोबिलिटी’को प्रमुख केन्द्र बनाउने अपेक्षा बढ्न थालेको छ।