खोज

कञ्चनपुर भीमदत्त नगरपालिकाकी १३ वर्षीया निर्मला पन्तको बलात्कारपछि हत्या भएको पाँच वर्ष पूरा भएको छ । २०७५ साउन १० गते साथीको घर जान भनी घरबाट निस्किएकी उनको ११ साउनमा उखुबारीमा शव फेला परेको थियो । निर्मला पन्तको हत्या भएको पाँच वर्ष बित्दा पनि अझै हत्याको अनुसन्धान टुङ्गोमा पुग्न सकेको छैन । पाँच बर्षको बीचमा धेरै सरकार परिवर्तन भए । धेरै गृहमन्त्रीले निर्मला हत्याको अनुसन्धान निष्कर्षमा पु¥याउने प्रतिवद्धता जनाए । धेरै प्रहरी महानिरिक्षकले पदबहाली गर्दैगर्दा हत्याको अनुसन्धान गहनरूपमा गर्ने भन्दै पद तथा गोपनियताको सपथ लिए । तर, अहिलेसम्म निर्मला पन्तको हत्याको रहस्य गर्भमै छ । निर्मला पन्तको हत्याको सन्दर्भ आउँदै गर्दा नेपालमा ४२ बर्षअघि भएको नमिता सुनिता हत्याकाण्डको घटनापनि छानबीन हुनुपर्दछ । त्यतिबेलाको नमिता सुनिता हत्याकाण्ड सुनेकाहरू त्यो दुःखद हत्याकाण्डको छानबीन भएको हेर्न र हत्यारा पत्ता लागेको सुन्न र देख्न चाहन्छन् ।

आजभन्दा ४२ बर्ष अघिको त्यो पाशविक र क्रुर हत्याकाण्डको प्रसंग सामाजिक सञ्जालमा अहिले जोडिएको छ । पत्रकार तथा लेखक चन्द्रमणि अधिकारीले त्यो हत्याकाण्डको बिषयको केही तथ्य फेसबुकमार्फत सार्वजनिक गर्नुभएको छ । अहिलेको युवा पुस्तालाई त्यो क्रुर हत्याको बिषय जानकारीमा छैन । तसर्थ अधिकारीले सार्वजनिक गर्नुभएको त्यो घटना बुझ्न ४२ बर्षअघि पुग्नुपर्ने हुन्छ । उहाँकै शब्दमा– ‘अन्याय बुढो हुँदैन, न्याय मर्नु हुँदैन । कोलकाताको प्रतिष्ठित विद्यालयमा अध्ययनरत काठमाडौँका दुई किशोरी १६ वर्षीया नमिता र १८ वर्षे सुनिता गर्मीको छुट्टीमा घर आएको बेला पोखरा घुम्न जाने भए र २०३८ जेठ अन्त्यतिर बसबाट पोखरा पुगे । पोखरा विन्ध्यवासिनी निवासी नातेदार दिदी निरा पराजुली गाईडको रूपमा उनीहरूसँग उतै सामेल भईन् । प्रधानमन्त्रीको सरकारी निवास (बालुवाटार) कै छेउछाउमा घर छ निजामति सेवाको तत्कालीन प्रतिष्ठित राष्ट्रसेवक, उद्योग वाणिज्य विभागका महानिर्देशक र कोलकातामा नेपालका महावाणिज्यदूत भईसकेका माधवराज भण्डारीको । उनैका तीनमध्ये माहिली र कान्छी छोरी हुन् नमिता सुनिता । जेठी छोरी प्रख्यात अर्थशास्त्री तथा पूर्वमन्त्री डा. यादबप्रसाद पन्तका छोरासँग विहाबारी भयो । उनीहरू घुम्दै सेती नदीको बगरमा पुगे । सेतीकै बगर पछाडि नेपाली सेनाको फूलबारी ब्यारेक छ । सेती बगरमा केही अपरिचित युवाहरूले उनीहरूलाई जिस्क्याए । छेडखानी अन्ततः भनाभनमा पुग्यो । त्यसैको भोलीपल्ट जेठ २९ गते नमिताको लाश र सुनिताको लास असार ६ गते सेती नदीमा भेटियो । सँगै भएकी नीरा चाहिं बेपत्तै भईन् ।

यो सबै घटनाक्रम नजिकबाट देखिरहेका एउटै पात्र थिए बनपाले चुडामणि अधिकारी । बलात्कारपछि हत्या भएको यो घटना देशभरि फैलियो । कन्चनपुरकी १३ वर्षे किशोरी निर्मलाको बलात्कार र हत्याको आजजस्तै सनसनी मच्चिएको थियो । चुडामणिले सब घटना विवरण थाहा पाएका छन् भनेपछि स्थानीय प्रहरीले उनलाई बयानका लागि लग्यो । उनी दिनभर प्रहरी कार्यालयमा वयानका लागि पर्खेर बसे तर वयान गराईएन । ५ बजेतिर ‘भोली आउनु’ भनी पठाईयो । भोलीपल्ट उनको पनि लाश सेतीमा फालिएको अवस्थामा पाईयो । जनमत संग्रह सकिएर बालिग मताधिकारको आधारमा राष्ट्रिय पञ्चायतको निर्वाचन भएको एक महिना जति पुगेको हुँदो हो । प्रधानमन्त्री सूर्यबहादुर थापा र गृहमन्त्री थिए नैनबहादुर स्वाँर । राष्ट्रिय पञ्चायतमा यो बहसले उग्ररूप लिएको बेला थियो । गृहमन्त्रीको मौनता अत्यन्त रहस्यमय र सरकारी सल्लाह अनुरूपको हो भन्ने विवाद पनि त्यहींभित्र सुनिन्थ्यो । एक दिन गृहमन्त्री स्वाँरले राष्ट्रिय पञ्चायतमा उठेका प्रश्नको जवाफ दिनेक्रममा “केनेडीको हत्यारा त पत्ता लागेको थिएन, हत्या हुनेबित्तिकै हत्यारा पत्ता लागिहाल्छ ? क्याऽऽऽ….” भनिदिएर तातो बहसको आगोमा घ्यू खन्याउने काम गरेका थिए । अनुसन्धान चल्न थाल्दा भदौतिर तत्कालीन कास्कीका सीडीओ सूर्यबहादुर सेन ओली, लगायत एसपी, डीएसपी, प्रहरी अधिकृत सबैलाई राजधानीमा ल्याएर हाजिर गराईयो । ज्ञानेन्द्र शाह राजा भएको १० दिनमै उक्त काण्डको फाइल मगाएर सम्पूर्ण अनुसन्धान तथा अभिलेख नष्ट गराए ।’

निरंकुश पञ्चायती व्यवस्था भएकोले कसैले नमिता सुनिता काण्ड छानवीनको लागि दवाव दिन सकेनन् । अहिले त्यो प्रसंग संयोगबस निर्मला पन्तसंगै जोडिएको छ । नेपालका ती तीन चेलीका परिवारमाथि न्याय होस् । कम्तीमा पनि उनीहरूको परिवारले दोषीमाथि कारवाही भएको देख्न सुन्न पाउन् । प्रधानमन्त्री प्रचण्डले भ्रष्टाचारका पुराना फाईल खोल्छु भन्नुभएको छ । सरकारले भ्रष्टाचारको मात्र होइन अव ४२ बर्ष अघिको त्यो पाशविक र क्रुर हत्या र पाँच बर्षअघिको निर्मला पन्त हत्याको पनि फाईल खोलोस् । घटनाको निष्पक्ष छानवीन गरि दोषीमाथ कडा कारवाही होस् ।