खोज

गुल्मी, १ साउन ।  आकाशे पानीको भरमा मौसमी तथा बेमौसी खेती गर्दै आएका सेउघावासीलाई गाउँमा सिँचाई सुबिधा पुगेपछि उनीहरूको लामो समयदेखिको अधुरो सपना पुरा भएको छ । रैदी सेउघा सिंचाई आयोजना मार्फत घरघरमा सिँचाई सुबिधा पुगेपछि त्यहाँका कृषकहरू झनै खुसि बनेका छन् ।

जलस्रोत तथा सिँचाइ विकास डिभिजन कार्यालय गुल्मीको सहयोगमा जिल्लाको रेसुङ्गा नगरपालिकाको वडानम्बर ४ स्थित सेउघामा सिंचाई आयोजना पुगेको हो । सिँचाई सुविधाको अभावमा उक्त क्षेत्रमा वषौंदेखि आकाशे पानीको भरमा कृषकले खेती गर्दै आएका थिए । उक्त ठाउमा अहिले जलश्रोत तथा सिंचाई विकास डिभिजन कार्यालय गुल्मीले सिंचाई योजनाको काम सम्पन्न गरेपछि त्यहाँका कृषकलाई सहज भएको हो । सिंचाई अभावमा निकै कष्टपूर्ण अवस्थामा तरकारी खेती गर्दै आएका कृषकहरूले सिंचाई सुबिधाको माग गरेका थिए ।

चार वर्ष पहिलेबाट भगवती कृषि दर्ता गरेर कृषि गर्दै आएका झबि पाण्डेले सिंचाई सुबिधा नहुँदा खानेपानी मध्येबाट निकै कष्टपूर्ण अवस्थामा तरकारी खेती गर्दै आएको बताए । उनले अहिले मौसी र बेमौसी तरकारी खेती उत्पादन गर्दै आएका छन् । पानीको अभावमा सेउघामा व्यवसायीक रूपमा तरकारी खेती गर्नेको संख्या निकै कम थियो । अहिले त्यस स्थानमा सिंचाई योजना सम्पन्न भएपछि एक कार्यक्रमका रेसुङ्गा नगरपालिकाका नगर प्रमुख खिलध्वज पन्थी र वडाअध्यक्ष लिलाधर आचार्यले काम सम्पन्न भएको सम्झौता पत्र उपभोक्ता समिति र जलश्रोत तथा सिंचाई विकास डिभिजन कार्यालय गुल्मीलाई हस्तान्तरण गरेका हुन् ।

सिंचाई योजना सम्पन्न भएपछि त्यस स्थानका कृषकहरूलाई मौसमी र बेमौसी तरकारी खेती उत्पादन गर्न आकाशे पानी कुर्नु पर्ने बाध्यता अत्य भएको छ । रैदीखोलाबाट करिब ३० वर्ष पहिले कुलो बनाएर पानी ल्याएर स्थानीयले सिंचाई गर्ने गर्दथे । तर त्यो कुलो तम्घास सिमलटारी सडक बिस्तारको क्रममा क्षतीभएपछि त्यहाँका कृषकहरू निराश थिए। अहिले करिब ३० वर्ष पछि पानीआएपछि कृषक उत्साहित भएका छन् ।

सिंचाई आयोजना हस्तातरण गर्दै रेसुङ्गा नगरपालिकाका नगरप्रमुख खिलध्वज पन्थीले आयोजनाबाट अधिकत्तम फाइदा लिन कृषकलाई आग्रह गरे । यस क्षेत्रका कृषकले यो सिंचाई आयोजनाबाट मौसमी र बेमौसमी तरकारी खेती उत्पादन गर्न तर्फ जोड दिए । अहिले नगरपालिकाको नीति उत्पादन तर्फ बढि ध्यान केन्द्रीत रहेको पन्थीले बताए । कृषकले उत्पादन गरेका तरकारी लगायतका बाली बेच्नका लगि नगरपालिकामा हाटबजार रहेकाले कुनै समस्या नहुने बताए । रैदि सेउघा सिंचाई आयोजना २०७९ साल फागुन ११ गते असार मसान्त सम्म काम सम्पन्न गर्नेगरि सम्झौता गरिएको थियो । निर्माण व्यवसायिले तोकिएकै मितिमा उक्त योजना सम्पन्न गरेका छन् ।

सेउघामा सिंचाई सुबिधा पुगेपछि २ सय रोपनी क्षेत्रफलमा सिंचाई सुबिधा हुनेभएको जलश्रोत तथा सिंचाई विकास डिभिजन कार्यालय गुल्मीका प्रमुख भरतप्रसाद सापकोटाले बताए । रैदी खोलाको पानी कल्पना समेत नगरेको स्थानमा सिंचाई सुबिधा पुर्याउन सफल भएको सापकोटाले बताए । रैदी खोलामा सानो टंकी निर्माण गरेर पाइप मार्फत पानी सेउघामा लगिएको हो । २ हजार ४ सय मिटर परबाट साठी एमएमको पाइप मार्फत पानी पुगेको हो ।

सिंचाई सुबिधाका लागि त्यसका लागि २ वटा टंकी निर्माण गरिएको छ । जसमा १ सय २० घन मिटरको र अर्को १९ घनमिटरको टंकी निर्मँण भएको सापकोटाको भनाई छ । रैदी सेउघा सिंचाई आयोजना ३८ लाख ३८ हजार ३ सय २२ रूपैयाँको लागतमा सम्पन्न भएको उपभोक्ता समितिका अध्यक्ष नवराज कुँवरले बताए । छोटो अबधिमा काम सम्पन्न गरेर अहिले कृषकका घर घरमा सिंचाई पानी पुगेको उनले बताए ।
उब्जाउ योग्य जमीन भएको स्थानमा सिंचाई सुबिधा पुगेपछि त्यहाँका कृषकहरू कृषि कर्म तर्फ लाग्न उत्साहित बनाएको स्थानीय कृषक कुँवरले बताइन् । पहिले खाना खाएर हात चुठेको पानी संकलन गरेर लसुन लगायत तरकारी लगाउने गरेको स्मरण गराइन ।