खोज

केही दिन अघि रूपन्देही प्रहरीले जिल्लाका विभिन्न स्थानमा बम विष्फोटमा संलग्न भएको अभियोगमा तीनजनालाई पक्राउ गर्याे । त्यसैक्रममा भारतको गोरखपुर आसपास क्षेत्रमा चोरी र डकैतीमा संलग्न कुख्यात महिला अपराधीलाई भैरहवाबाटै प्रहरीले पक्राउ गर्यो ।

विगत एक महिनाको अवधीमा रूपन्देही प्रहरीलाई अपराधजन्य घटना नियन्त्रणमा सफलता मिलेको छ । यी घटनाले अर्को के कुराको संकेत गर्दछ भने रूपन्देही विभिन्न अपराधजन्य घटना श्रृंखलाको ट्रान्जिट पोइन्ट बन्दैछ । यो खतराको अवस्थामा प्रहरी प्रशासनको ध्यान अपराधजन्य घटना नियन्त्रणमा ध्यान जाओस् । बम विष्फोट आरोपमा पक्राउ परेका तीनैजनालाई मुलुकी अपराध संहिता, २०७४ को परिच्छेद–७ ‘विष्फोटक पदार्थ सम्बन्धी कसुर’ शीर्षकमा मुद्दा दर्ता गरिएको छ ।

घरमै बम बिष्फोट गराउने कुरालाई सामान्य भन्नै मिल्दैछ । तसर्थ उनीहरूलाई कमजोर मुद्दा दर्ता गरेर छिटो रिहा गराउने काममा कसैको पनि संलग्नता नहोस् भन्नेतर्फ प्रहरी प्रशासनको ध्यानाकर्षण होस् । रूपन्देही प्रहरीका अनुसार २०८० वैशाख १ गते रूपन्देहीको सियारी गाउँपालिका–४ स्थित सियारी गाउँपालिकाका अध्यक्ष थानेश्वर घिमिरेको घरपछाडीको पर्खाल नजिकै विष्फोटक पदार्थ जस्तो देखिने पदार्थ (प्रेसर कुकर बम) भेटिएको थियो । नेपाली सेनाको विष्फोटक टोलीबाट उक्त बम डिष्पोज गरिएको थियो ।

त्यस्तै, गत असार १ गते बिहान साढे २ बजे सिद्धार्थनगर नगरपालिका–४ स्थित भैरव प्रसाद कलवारको शिवम इम्पेक्सको (दाना फ्याक्ट्री गोदाम) कम्पाउण्डमा पर्खाल बाहिर विस्फोटक पदार्थ (प्रेसर कुकुर बम) विष्फोट भएको प्रहरीले जनाएको छ । त्यसैगरी, गत असार १ गते बिहान ६ः१० बजे मायादेवी गाउँपालिका–८ स्थित सिद्धार्थनगर सिटी हस्पिटलको पछाडि रहेको खाली जग्गामा प्रेसर कुकुर बम विष्फोट भएको थियो । यसले त्रास बढाउने काम गरेको छ ।

अर्कोतर्फ पछिल्लो दिनहरूमा अपराधमा प्रयोग हुँदै आएका हतियारसहित पक्राउ पर्ने क्रम पनि बढेको छ । यसले के बुझिन्छ भने अपराध गर्नेक्रम पनि बढेको छ । अपराधमा संलग्नहरू नेपाल भारत सिमावर्ती क्षेत्रमा नै बसोबास गर्छन र उनीहरू पैसाको लोभ तथा आफ्नै रिसइवीमा हत्यामा संलग्न हुन्छन । सन्दर्भ के हो भने विषय, स्थान र गंभीरता र अपराधका श्रृंखला कुन क्षेत्रमा बढी छ भन्ने कुरा पनि हो ।

यस्ता घटना भैरहवा, बाँके, परासी र पूर्र्वी क्षेत्रमा बढी हुने गरेको छ । यद्यपि पछिल्लो समय देशका विभिन्न क्षेत्रमा यस्ता घटना बढ्दै गएका छन । साना साना हतियारले बढाएको अपराधको त्रासलाई कम गर्नेतर्फ अव ध्यान दिनु जरुरी छ । अहिले देशभरि अपराधजन्य घटनाका समाचार बढेको छ । पछिल्लोसमय मानिसमा अपराधको मानसिकता नै तयार भएको देखिन्छ । सामान्य घटनामा पनि मानिसको हत्या भएका घटना सुन्नमा आएका छन । खासगरी तराईका जिल्लामा अहिले अपराधका घटनाले जनजीवनमा सन्त्रासको अवस्था उत्पन्न भएको छ ।

तराईका विभिन्न स्थानमा भएका अपराधजन्य घटनाले जनजीवनमा पनि गंभीर असर परेको छ । पछिल्लो समय भैरहेका अपराधजन्य श्रृंखलाका घटनाले मुलुकको शान्ति सुरक्षाको अवस्था कमजोर वनेको देखिएको छ । यद्यपी रूपन्देहीको प्रहरी प्रशासनले अपराध नियन्त्रणमा जुन प्रयास गरेको छ, त्यो सराहनीय छ । अपराधजन्य घटना बढ्नु भनेको सुरक्षाको अवस्था सुढृढ नहुनु पनि हो । तसर्थ पछिल्लोपटक जुन अपराधको त्रास देखिएको छ, यस्तो अवस्था तत्काल निराकरणका लागि प्रशासन गंभीर हुनु जरुरी छ ।