खोज

गुल्मी, २५ असार   गुल्मीको रेसुङ्गा नगरपालिका ५ अन्तरगत भुवनपानीका नागरिकलाई विद्युतीय चुल्हो वितरण गरिएको छ । आर्थिक वर्ष २०७९/०८० को संघीय मन्त्रालयबाट प्राप्त सशर्त बजेटबाट वातावरणीय सरसफाइ तथा जनचेतनामूलक कार्यक्रम अन्तर्गत उक्त ठाउँका नागरिकलाई विद्युतीय चुल्हो वितरण गरिएको हो ।

भुवनपानीमा रहेको अर्खले स्वास्थ्य कार्यालयको आयोजनामा एक औपचारीक कार्यक्रमका बीच रेसुङ्गा नगरपालिकाका नगर प्रमुख खिलध्वज पन्थीले ज्येष्ठ नागरिक रुक्मागत खनाल, नारायण प्रसाद उपाध्याय खनाल र बालकुमारी पाण्डेलाई विद्युतीय चुल्हो हस्तान्तरण गरेर कार्यक्रको शुभारम्भ गरेका हुन ।

सोही अवसरमा नगरप्रमुख पन्थीले सबै स्वस्थ रहन आवश्यक रहेको भन्दै नागरिकको स्वास्थ्यप्रति रेसुङ्गा नगरपालिका निकै सजग र गम्भीर रहेको बताए । उनले परम्परागत चुल्होको माध्यमबाट आम नागरिकलाई आधुनिक प्रविधिको चुल्होसंग जोड्ने कार्यको शुभारम्भ भएको बताए । नगरप्रमुख पन्थीले रेसुंगा नगरपालिका नागरिकको स्वास्थ्य प्रती गम्भीर रहेको भन्दै स्वस्थ नागरिक तयार भए मात्र संमृद्ध नगरपालिका निर्माण गर्न सकिने बताएका छन ।

जेष्ठ नागरिक लगायतको खानपानसंगै सरसफाइमा पनि विशेष ख्याल पुर्याउनुपर्ने बताउँदै सबै उत्पादनशील कार्यमा लागे मात्र संमृद्ध र सबल नगरपालिका निर्माणको लक्ष्य पुरा हुने बताए । एलपी ग्यासभन्दा निकै कम खर्चिलो हुने र वातावरणीय हिसाबले पनि अनुकुल हुने भएकाले विद्युतीय चुल्होको अधिकत्तम प्रयोगमा जोड दिन नगर प्रमुख पन्थीले आग्रह गरेका छन ।

रेसुंगा नगरपालिकाले ५ नम्बर वडामा हाल ३ सय ३१ थान विद्युतीय चुल्हो वितरण गरिएको वडाध्यक्ष दुर्गाप्रसाद खनालले जानकारी दिएका छन । उनले विद्युतीय चुल्हो प्राप्त गर्न बाँकी रहेकाहरुका लागि आगामी आर्थिक वर्षको पहिलो चौमासिक भित्रे वितरण गरिने बताएका छन ।