खोज

काठमाडौं,९ असार । प्रतिनिधिसभा सदस्य डा. अमरेशकुमार सिंहले निजगढ अन्तर्राष्ट्रिय विमानस्थल बनाउन आवश्यक नभएको बताएका छन्।

प्रतिनिधिसभा बैठकमा मन्त्रालयगत बजेट शीर्षमाथिको छलफलमा भाग लिँदै सिंहले निजगढ विमानस्थल बनाउने कुरामा आफ्नो आपत्ति रहेको बताए।

पोखरा अन्तर्राष्ट्रिय विमानस्थल र भैरहवा अन्तर्राष्ट्रिय विमानस्थलले काम गर्न नसकिरहेका बेला थप विमानस्थल बनाउन आवश्यक नभएको सांसद सिंहको तर्क थियो । उनले बजारमा अहिले पनि निजगढ विमानस्थल बनाउने कुरा चलिरहेको तर विदेशीको ऋण लिएर त्यो काम गर्न आवश्यक नभएको बताए।

सांसद सिंहले भैंसी चराउनका लागि विमानस्थल बनाउन लागिएको हो ? भनि सरकारलाई प्रश्न समेत गरे।

‘निजगढ एयरपोर्ट बनाउने कुरामा मेरो आपत्ति छ । किनकी निजगढ एयरपोर्ट यता दुई वटा इन्टरनेशनल एयरपोर्ट राम्रो संग सञ्चालन हुन सकेका छैनन् । निजगढ एयरपोर्टको आवश्यक्ता के का लागि ? खाली फाष्ट ट्रयाक जोडनका लागि एयरपोर्ट चाहिन्छ ? त्यो आवश्यक छैन – उनले भने, त्यसकारणले विदेशीको ऋण लिने, त्यो ऋण लिएर एयरपोर्ट बनाउने । तर, त्यसमा सोही अनुसारको व्यवस्था नहुने । र, अहिले पनि बजारमा भनिएको छ कि निजगढ एयरपोर्ट बनाउने । के त्यहाँ भैंसी चराउनका लागि एयरपोर्ट बनाउने ? मधेशमा भैंसी धेरै पाउँछ ।’

सांसद सिंहले हवाई उडानको सुरक्षामा विशेष ध्यान दिन सरकारलाई सचेत गराए।