खोज

कपिलवस्तु(बुटवल टुडे) २४ चैत– नेपाल नेत्र ज्योती संघ कपिलवस्तु शाखाको १९ औं शाखा सभा तौलिहवामा सम्पन्न भएको छ । २०५३ मा स्थापित शाखाको शाखा सभामा शाखा सचिव मनोज कुमार श्रीवास्तवले बार्षिक प्रगती प्रतिवेदन पेश गरेका थिए । प्रगती प्रतिवेदन प्रस्तुतीका क्रममा बिरामीलाई छिटो छरितो सेवा प्रवाह तथा बिरामीको आखाँ जाँचका लागि आधुनिक मेसिनको व्यवस्था भएको उनले जानकारी दिए । त्यसै गरि बर्तमान कार्य समितीको कार्यकालमा बाणगंगा नगरपालिका र मायादेवी गाउँपालिकामा आँखा उपचार केन्द्र सञ्चालनमा ल्याईएको बताए । अस्पताल तर्फ ओपीडी जाँच र मोतियाबिन्दुको अप्रेशनमा बृद्धि भएको जनाईएको थियो । आगामी दिनमा नाक, कान, घाटीको सेवा पनि सञ्चालन गर्ने, फेको प्रबिधी सेवा बिस्तार गर्ने र आँखा उपचार केन्द्रहरु बिस्तार गर्ने योजना रहेको सचिव श्रीवास्तवले प्रष्ट्याए । सो अवसरमा संघका सहकोषाध्यक्ष जनार्दन पराजुलीले गत आर्थिक बर्ष २०७८/७९ को ३० लाख ८५ हजार ३५ रुपैया बराबरको आय व्यय र चालु आवको १५ लाख ५६ हजार बराबरको अनुमानित आय व्यय बिवरण पेश गरे ।

कार्यक्रममा बोल्दै कपिलवस्तु नगरपालिकाका प्रमुख सुदिप पौडेलले संघको बृहत्तर बिकासका लागी सहयोग गर्न आफुहरु तत्पर रहेको बताए । २०५३ सालमा रेडक्रसको एउटा कोठामा सञ्चालित संघ संघका अगुवा र दाताको सहयोगमा पुर्वाधारयुक्त बन्दै गएको र थप सुबिधा सम्पन्न बनाउन सबै लाग्नु पर्नेमा उनले जोड दिए । संघको् कपिलवस्तु शाखाका् आखाँ उपचार केन्द्रले आखाँ अस्पतालको स्विकृती पाएकोले अब थप पुर्वाधार, जनशक्ति र प्रबिधी सम्पन्न बनाएर अघि बढ्ने अवस्था आएको संघका केन्द्रिय उपाध्यक्ष तथा लुम्बिनी प्रदेश अध्यक्ष सागर प्रताप राणाले सुझाव दिए । संघले युनिटबाट शुरु गरेको आँखा उपचार सेवा अस्पताल सम्म आई पुगेको र यसलाई थप प्रबिधी सम्पन्न बनाउनु अहिलेको आवश्यकता भएको पुर्व शाखा अध्यक्ष गोपाल बहादुर सिंहले बताए । लुम्बिनी बिश्व बिद्यालयका प्राध्यापक गुणाखर गैह्रे, कपिलवस्तु बचत तथा ऋण सहकारीका अध्यक्ष राजु प्रसाद अर्याल, पत्रकार महासंघ शाखा अध्यक्ष किरणमान बज्राचार्य लगायतले संघलाई थप पुर्वाधार र प्रबिधीयुक्र बनाउन सहकार्यका साथ अगाडी बढ्नु पर्नेमा जोड् दिए । अझै पनि पुर्वाधार पुरा हुन नपाए पनि अस्पतालले कोभिडका बेला समेत निरन्तर सेवा दिएको शाखा अध्यक्ष रमेश शर्माले स्मरण गराए । शाखाको अस्पताल बिस्तारका लागी जग्गाको व्यवस्थापन भई भवनका लागी आवश्यक पहल हुदै आएको उनले स्पष्ट पारे ।