खोज

गुल्मी, फागुन-  गुल्मीको मुसिकोट नगरपालिका अन्र्तगत बढीघाट खोलामा निर्माणाधिन अबस्थामा भाँचिएर अलपत्र परेको पक्की पुलको निर्माण कार्य चार वर्षपछि पुनः शुरु गरिएको छ । मुुसिकोट नगरपालिका ७ देखि मुसिकोटकै २, ३ र ४ नम्बर वडालाई जोड्ने उक्त पक्की पुल निर्माणकै क्रममा दुई पटकसम्म भाँचिएर वर्षौसम्म अलपत्र परेको थियो ।
दुईदुई पटकसम्म भाँचिएको पुल निर्माणका लागि अहिले डिजाईन परिवर्तन गरि नयाँ निर्माण व्यवसायी जलप नेपाल प्रालीले निर्माण कार्यको जिम्मा लिएपछि काम शुरु भएको हो । स्वीस सरकारको आर्थिक तथा प्राविधिक सहयोगमा निर्माण हुन लागेको उक्त पुलको लागत दुई करोड ५० लाख रुपैंया रहेको छ ।
पुल निर्माणको लागि दुबैतिर फाउण्डेशनको काम पुरा भैससकेको हुँदा अहिले पुल निर्माण स्थलसम्म पुग्न सडक विस्तारको काम भैरहेको निर्माण व्यावसायी प्रतिनिधि अनिष पौडेलले जानकारी दिएका छन । पौडेलका अनुसार दुई पटकसम्म भाँचिएको पुलको अहिले डिजाईन परिवर्तन गरि काम शुरु गरिएको भन्दै आउँदो असोजसम्म पुल निर्माण सम्पन्न गरिने बताए ।

तत्कालिन अबस्थामा निर्माणाधिन पक्की पुल पहिलो पटक २०७६ बैशाखमा निर्माण कार्य अन्तिम चरणमा पुग्दै गर्दा खोलामा बाँढी आएपछि पुलको टेका भासिँदा पुल भाँचिएको थियो । भाँचिएको उक्त पुलको दोश्रो पटक पनि निर्माण शुरु भएको एक वर्षपछि सोही प्रकृति दोहोरीएका कारण पुनः पुल भाँचिएपछि लामो समय अलपत्र बनेको थियो । ढलाई गर्दा गर्दै अचानक पुल भाँचिदा पाँच जना व्यक्तिहरु समेत घाईते बनेका थिए । उक्त पुल निर्माण गर्दै गर्दाको समयमा दुइ पटकसम्म भाँचिएपछि कतिबेला पुल निर्माण होला र वारीपारी गर्न सहज होला भनेर पर्खिरहेका त्यस क्षेत्रका नागरिकहरुकोे सपनामा अधुरै रहेको थियो ।
दुइ पटकसम्म भाँचिएको पुलको निर्माण कार्य तत्कालै शुरु गर्न नगरपालिकाको तर्फबाट पटक पटक सम्बन्धित निकायहरुमा पहलकदमी गरेपछि काम शुरु हुन लागेको मुसिकोट नगरपालिका प्रमुख जीवन खरेलले बताए । नगर प्रमुख खरेलले ढीलै भएपनि काम शुरु हुन लागेको हुँदा यो पटक तोकिएकै मितीमा पुल निर्माण हुने कुरामा आफुहरु आशावादी रहेको बताए । प्राकृतिक प्रकोपका कारण लामो समय नगरपालिका जोड्ने पुल निर्माण कार्य अलपत्र हुँदा त्यसले नगरको विकास निर्माणमा ठूलो क्षती पुगेको खरेलको भनाई छ ।

अलपत्र परेको पुलको निर्माण कार्य शुरु भएपछि यतिबेला त्यस क्षेत्रका नागरिकहरुमा केही खुसि थपिएको छ । पहिलो पटक पुल भत्किँदा निराश बनेका र दोश्रो पटक पनि पुनःभत्किएपछि झनै आशा मारेका स्थानीयहरुका लागि तेश्रो पटक निर्माण कार्यले गति लिन शुरु गरेपछि स्थानीयहरुमा खुसि र आशा थपिएको स्थानीय प्रेम शाक्यले बताए ।

मुसिकोट नगरपालिकाको बढीगाढ खोला माथि निर्माण हुन लागेको ट्रस बोर्डर प्रबिधिमा आधारित उक्त पुलको लम्बाई ५५ मिटर रहेको छ । पुल निर्माणका लागि जलप नेपाल कम्पनीले निर्माणको जिम्मा पाएको छ । पुल निर्माण भएपछि मुसिकोट नगरपालिका लगायत छिमेकी बाग्लुङ्ग जिल्लाका नागरिकहरुलाई समेत सदरमुकाम तम्घास आवतजावतमा थप सहजता मिल्ने भएकोे छ ।