खोज

बुटवल, २८ फागुन ।

१३ औ जिल्लास्तरीय राष्ट्रपति रनिङशिल्ड प्रतियोगिता २०७९ रुपन्देहीमा शुरु भएको छ ।
रुपन्देही जिल्ला खेलकुद विकास समितिको आयोजनामा सिद्धेश्वरी स्कुल खेलमैदानमा भएको पहिलो दिनको खेलमा एथ्लेटिक्सतर्फ ८ स्वर्णको टुंगो लागेको छ । प्रतियोगितामा तालिकामा तिलोत्तमा नगरपालिका ५ स्वर्ण, २ रजत, १ कास्य पदक सहित अगाडि रहेको छ । यसैगरी बुटवल उपमहानगरपालिका ३ रजत र ३ कास्य सहित दोस्रो तथा सिद्धार्थनगर नगरपालिका र सियारी गाउँपालिका १ स्वर्ण १ रजत र १ कास्यसहित तेस्रो स्थानमा रहेका छन् ।

एथ्लेटिक्स छात्र १५ सय मिटर दौडमा गैडहवा गाउँपालिकाका उमेश बरईले ४ मिनेट ४४.२८ सेकेण्डमा दुरी पार गर्दै स्वर्ण चुमेका छन् । यसैगरी तिलोत्तमाका सुजन किशन द्वितीय र बुटवल उपमहानगरपालिकाका बेल बहादुर मगर तृतीय भए । छात्रातर्फ सिद्धार्थ नगरपालिकाका कुसुम ठगुन्नाले ५ मिनेट ५२.१३ सेकेण्डमा दुरी पार गर्दै स्वर्ण चुमे ।

यसैगरी छात्र १ सय मिटर दौडमा तिलोत्तमाका राजन थापाले स्वर्ण जिते । बुटवलका विकास कार्की दोस्रो र शुद्धोधनका सुरज खत्री तेस्रो भए । छात्रातर्फ तिलोत्तमाका रोजी थापाले स्वर्ण जिते । सिद्धार्थनगरकी प्रगति ज्ञवालीले दोस्रो र कन्चनकी आरती क्षेत्री तेस्रो भए । यसैगरी छात्र ४ बाई ४ सय मिटर रिलेमा तिलोत्तमाका युवराज थारु, राजन थापा, हिमाल पाण्डे र प्रविण कुँवरको टिमले स्वर्ण जितेको छ । बुटवलका दिपक बिक, दर्शन बिक, मेघराज कंडेल र सुशिल चौधरीको टिम दोस्रो भए भने सिद्धार्थनगरका राज परियार, रोशन आलेमगर, सचिन चौधरी र कमल थापाको टिम तेस्रो भए ।

छात्रातर्फ पनि तिलोत्तका रोजी थापा, रजनी थारु, रिया थापा र एलिना थारुले स्वर्ण जिते । बुटवलका कृति पराजुली, लक्ष्मी भुषाल, रक्षा थापा र अनिशा कँुवरको टिम दोस्रो भए भने सियारीका आरती केवट, पवित्रा चौधरी, स्नेहा चौधरी र दिब्या थारुको टिम तेस्रो भए ।
छात्र लङजम्पमा सियारीका विजय कुमार यादव प्रथम, तिलोत्तमाका कुलप्रसाद कँुवर दोस्रो तथा बुटवलका संगम सोमरे तेस्रो भए । छात्रातर्फ तिलोत्तमाका रजनी थारु प्रथम, सियारीका निशा चौधरी दोस्रो र बुटवलकी लक्ष्मी बलामी तेस्रो भईन् ।

एक समारोहकाबीच लुम्बिनी प्रदेशका मुख्यमन्त्री लिला गिरीले उद्घाटन गर्दै खेल पर्यटनबाट प्रदेशको आर्थिक समृद्धि सम्भव रहेको बताए । प्रदेश सरकार खेल पूर्वाधार विकासमा सधै सकारात्मक रहेको दाबी गर्दै ब्यावसायिक खेलाडी उत्पादनको आधारका रुपमा रहेको विद्यालय खेलकुदमा जोड दिने बताए ।

कार्यक्रममा प्रदेश खेलकुद विकास परिषदका सदस्यसचिव जयप्रकाश भट्टराई, रुपन्देही जिल्ला खेलकुद विकास समितिका अध्यक्ष भुपेन्द्र क्षेत्री (हरि), बुटवल उपमहानगरपालिका वडा नं. ५ का वडाअध्यक्ष हरि प्रसाद श्रेष्ठले यो केवल प्रतियोगिता मात्र नभएर क्षमतावान खेलाडीहरुलाई सुनौलो अवसर भएको बताए ।

प्रतियोगिता ५ ईभेन्ट अन्तर्गत मार्शल आर्टको तेक्वान्दो, कराँतेका, भलिबल र कबड्डीमा, एथलेटिक्समा २२ र रिले २ स्वर्णका लागि खेलमा खेलाडीहरु प्रतिस्पर्धा गर्ने जिल्ला खेलकुद विकास समितिका सदस्य आवेश पौडेलले बताए । खेल र खेलाडीको कुम्भ मेलाका रुपमा आयोजना हुने प्रतियोगितामा उत्कृष्ट प्रदर्शन गर्ने खेलाडीहरु छनौट भएर प्रदेश हुँदै राष्ट्रपति प्रतियोगितामा भाग लिनेछन ।

मार्शल आर्टमा कराँते र तेक्वान्दो

यसैगरी मार्शल आर्ट अन्तर्गत कराँते प्रतियोगितामा बुटवलले ३ स्वर्ण, १ रजत र २ कास्य पदक जितेको छ । तिलोत्तमाले १ स्वर्ण, १ रजत र २ कास्य पदक जितेको छ । देवदहले १ रजत र १ कास्य जितेको छ ।

छात्र ४२ केजी तौल समूहमा तिलोत्तमाका आदित्य अर्यालले स्वर्ण जितेका छन् । बुटवलका पवन बुद्ध थापा रजत र बुटलकै सुशान्त खत्री तथा तिलोत्तमाका दिप्सन थापा कास्य पदक जितेका छन् । ४७ केजीमा बुटवलका अभिनाश जिएमले स्वर्ण जितेका छन् । देवदहका प्राईम गुरुङले रजत तथा बुटवलका सिजन गुरुङ र तिलोत्तमाका अंकित बस्नेत कास्यमा चित्त बुझाए । ५२ केजी छात्रमा बुटवलका राहुल चौधरीले स्वर्ण जिते । तिलोत्तमाका मन्दिप जिएमले जत र कंचनका कुनाल भण्डारी र रोहिणीका अमन घर्तीले कास्य जितेका छन् ।

यसैगरी तेक्वादोतर्फ छात्र ४५ केजी तौलमा सिद्धार्थनगरका मोहम्मद सोयबले स्वर्ण जितेका छन् । बुटवलका अर्जुन मगरले रजत जिते । ४८ केजी तौलमा बुटवलका सपन थापाले स्वर्ण जिते भने कंचनका सम्बिधान पुनले रजत जिते । ५१ केजी तौल समूहमा सैनामैनाका असिम पोखरेलले स्वर्ण जिते भने कंचनका सिजन थापाले रजत पदक जिते ।

छात्रातर्फ ४२ केजी तौल समूहमा बुटवलकी अनुष्का तामाङले स्वर्ण जिते । सैनामैनाकी मनिका सुनारले रजत पदक जिते । ४४ केजीमा बुटवलकी रोशनी तामाङले स्वर्ण जितिन भने कंचनका एन्जल तामाङले रजत जिते । ४६ केजी तौल समुहमा बुटवलकी रुपा बुढाथोकीले स्वर्ण जित्दै प्रदेशमा छनौट हुन सफल भईन् ।