खोज

चन्द्रौटा(कपिलवस्तु), ५ फागुन ।

कपिलवस्तुको चन्द्रौटामा चर्काे बैंक व्याजदर, लघुवित्त र मिटर व्याजको विरुद्ध विरोध प्रदर्शन गरिएको छ । नेकपा (विप्लव) नेतृत्व पश्चिम कपिलवस्तुको जिल्ला समितिको आयोजनामा शुक्रबार विरोध प्रदर्शन गरिएको हो ।

बैंकको चर्काे ब्याजदर नियन्त्रण गर, मिटर व्याजीलाई कारवाही गर, लघु वित्तीय शोषण अन्त्य गर, १ अंकको व्याजदर लागू गर, लघु वित्तीय ज्यादति अन्त्य गर र राष्ट्रिय उद्योगी व्यवसायीलाई राहत दे भन्दै नाराबाजी गरिएको नेकपाका जिल्ला सचिव बिनोद लुइटेलले जनाए ।

पोलिटव्युरो सदस्य सञ्जिब झाँक्रीले चन्द्रौटामा कोणसभालाई सम्बोधन गर्दै उद्योग कलकारखाना विस्थापित भएका कारणले मजदुरहरुको रोजगारी गुमेको बखत चर्काे ब्याजले समस्या निम्ताएको बताए ।

हातमुख जोड्न समस्या भइरहेको अवस्थामा लघुवित्तयले आत्महत्या गर्न बाध्य बनाइरहेको बताए । विदेशी दलालहरुले खोक्रो बनाएको जनाउँदै सर्वसाधारणलाई सडकमा ल्याउन उनीहरुको मुख्य भूमिका रहेको बताए ।

सामान्य कार्यक्रम गर्न पनि विदेशी शक्तिका दलालहरुले करोडौँ खर्च गरिरहेको उनले उल्लेख गरे । एमसीसीले चालेको कदम नेपाल र नेपालीको हितमा नरहेको समेत सदस्य झाँक्रीको भनाइ छ ।

यसैबीच पार्टीका केन्द्रीय सदस्य हेमन्त चौधरीले आम नागरिकको हकहितका लागि बैंक, लघु वित्तीय लगायत संस्थाले व्याजदर सुधार गर्नुपर्ने चेतावनी दिए । यदि सम्बन्धित निकायले नियमन नगरे थप आन्दोलनको कार्यक्रम अघि सार्ने बताउँदै ज्यादती गरेको पाइए कानुनी कठघरामा ल्याउन समेत पछि नपर्ने उनले दावी गरे ।

पार्टीका जिल्ला सचिव लुइटेलले स्वतन्त्रपूर्वक जिउने अधिकार सबैलाई रहेकोले आत्मसम्मानजनक तरिकाले बाँच्न पाउनुपर्ने बताए । कुनै पनि बैंक, वित्तीय संस्थाले ज्यादती गरेको छ भने सो व्यक्ति नेकपाको सम्पर्कमा आउन आग्रह समेत उनले गरे ।