खोज

बुटवल, १४ माघ ।

पत्रकार रामकृष्ण भण्डारीको ‘सत्ता संघर्ष’ नामक पुस्तकको बुटवलमा परिचर्चा गरिएको छ । नेपाल पत्रकार महासंघ रुपन्देहीको आयोजनामा लुम्बिनी प्रदेशका मुख्यमन्त्री लिला गिरी, विभिन्न राजनीतिक दलका नेता, विश्लेषक, विभिन्न क्षेत्रका व्यक्तिहरु, सञ्चारकर्मीलगायतको सहभागितामा पुस्तकको परिचर्चा गरिएको हो ।

पुस्तकमा ३० वर्षमा २८ सरकार गठन र विघटनसम्बन्धी प्रमुख राजनीतिक घटनाको नालीबेली समेटिएको छ । यसबीचमा सरकार बदल्नमै नेताको चासो देखिए पनि राष्ट्रहित र जनताको पक्षमा काम गर्छाैँ भन्ने कसैमा पनि सोच नभएका कारण सबैजसो सरकार टिक्न नसकेको विषयमा पुस्तक केन्द्रित छ । ०४६ को राजनीतिक परिवर्तनदेखि ०७४ को निर्वाचनबाट बनेका सरकार, राजनीतिक दाउपेच र सत्तासंघर्षमा केन्द्रित रहेको विषयवस्तु कृतिमा समेटिएको छ ।

कार्यक्रममा बोल्दै लुम्बिनी प्रदेशका मुख्यमन्त्री लिला गिरीले पुस्तकले सत्ता केन्द्रित राजनीतिलाई उजागर गरेपनि यसको कारणबारे भने मौन रहेको टिप्पणी गरे । “यो पुस्तकलाई गोरेटो मानेर सत्ता केन्द्रित राजनीतिका कारणहरु खोतलेर अव अर्को कृति प्रकाश गर्न म आग्रह गर्दछु”–उनले भने ।

संसदीय व्यवस्थामा सरकार बनाउने र गिराउने खेल दुनियाँमा हुने भन्दै उनले तर बहुमतको सरकार किन गराउने खेल भयो ? किन सरकारहरु टिक्न सकेनन् ? यसमा भू राजनीतिको प्रभाव छ कि छैन ? जस्ता विषयलाई समेटेर अर्को पुस्तक ल्याउन सुझाव दिए ।

मुख्यमन्त्री गिरीले सबै कुराको दोष राजनीतिक दल र नेतालाई मात्र दिनुभन्दा यसो हुनुको भित्री कारणहरु पहिल्याउनु जरुरी रहेको औंल्याए । फरक प्रसंगमा उनले आफूले लुम्बिनी प्रदेशको मुख्यमन्त्रीको हैसियतमा सकेसम्म राम्रो गर्न प्रयास गर्ने भन्दै राम्रो काम गर्न नसके नराम्रो काम भने गर्दै नगर्ने जिकिर गरे । आफू कामप्रति इमान्दार भएर लाग्ने प्रतिवद्धता पनि उनले व्यक्त गरे ।

त्यस अवसरमा बोल्दै बुटवल उपमहानगरपालिकाका प्रमुख खेलराज पाण्डे, नेकपा माओवादी केन्द्रकी नेतृ सोनिया यादव, नेकपा एकीकृत समाजवादीका केन्द्रीय सदस्य सिद्धिचरण भट्टराईलगायतले सत्ता संघर्ष नामक पुस्तकले सत्ता राजनीतिको खेललाई उदाङ्गो पारिदिएको बताए ।

पुस्तकमाथि समीक्षा गर्दै विश्लेषक आरसी आचार्यले अर्कोपटक प्रकाशनमा ल्याउँदा यसको अझ गहिराइमा पुग्न सुझाव दिंदै तर पुस्तकले समेटेका अधिकांश विषयवस्तु यथार्थपरक रहेको बताए । कार्यक्रममा पुस्तकका लेखक रामकृष्ण भण्डारीले १० वर्षको मेहनेत लगाएर आफूले पुस्तक प्रकाशन गरेको भन्दै आफूले पत्रकारिताका दौरानमा देखेका, भोगेका, महशुस गरेका, अनुभव गरेका र विभिन्न नेता एवं व्यक्तिसँगको कुराकानीका आधारमा पुस्तक प्रकाशन गरेको जानकारी दिए ।

लेखक भण्डारीले दुई दशकभन्दा लामो पत्रकारिताका दौरानमा देखे, भोगेका घटना, समाचार संकलनका बेला भएका कुराकानी, टिपोट, फोन संवाद, प्रकाशित पुस्तक, प्रतिवेदन, अन्तर्वार्ता तथा स्वअध्ययन पुस्तकका आधार भएको बताए । कार्यक्रममा पत्रकार महासंघ रुपन्देहीका अध्यक्ष रामराज पोखरेल, सचिव विनोद परियारले पनि पुस्तकका बारेमा आ–आफ्नो धारणा राखेका थिए ।

यसबीचमा सरकार बदल्नेमै नेताको चासो देखिए पनि राष्ट्रहित र जनताको पक्षमा काम गर्छौं भन्ने कसैमा पनि सोच नभएका कारण सबैजसो सरकार टिक्न नसकेको विषयमा पुस्तक केन्द्रित छ ।

मध्यरातमा बहुदल, प्रारम्भमै विग्रह, दासढुङ्गा, आफ्नैमाथि अन्तरघात, संसद् विघटन, निर्णय उल्टिएको रात, कम्युनिष्टको काँधमा पञ्चायतको रजाइँ, कांग्रेसको काँधमा सूर्यबहादुर थापा, किसुनजीमाथि अर्को घात, विन्तिपत्रले बदनाम, नयाँ खेतालाको खोजी, संविधानसभा निर्वाचन, गणतन्त्र घोषणा, प्रधानन्यायाधीशलाई सत्ता, सत्ता स्वार्थको पुनरावृत्तिलगायत शीर्षकमा लेखकले तत्कालीन घटनाक्रमलाई उजागर गरेका छन् ।