खोज

बाँके, १८ मंसिर ।

२०६३ सालमा महिलाको अधिकारका लागि आवाज उठाउन उपकार मञ्च गठन भयो । गाउँ समाजमा महिलालाई परेको अन्यायका बिषयमा सशक्त आवाज उठाउँदै गर्दा महिलाको आत्मनिर्भरताका कुरा पनि उठ्न थाले । त्यसपछि मन्च आवद्ध महिला सदस्यले रु १० बचत गर्दै ऋण लिन दिन सुरु गरे ।

सानो पुँजीबाटै भए पनि मञ्चबाट महिलाहरुले ऋण लिने व्यापार व्यवसाय गर्थे । महिलाहरु आत्मनिर्भरको बाटो लागे । बाँकेको कोहलपुरमा त्यसरी सुरु भएको महिला उपकार मन्च अहिले उपकार लद्यु वित्तीय संस्थाका रुपमा लुम्बिनी प्रदेशभर कारोवार गरिरहेको छ । महिलाले स्थापना गरेको मात्र होइन उक्त लद्यु वित्तलाई महिलाले नै नेतृत्व प्रदान गरिरहेका छन् । उक्त लद्यु वित्तको अध्यक्ष शान्ती ढकाल हुन् भने प्रमुख कार्यकारी अधिकृतमा शारदा पोखरेल रहेकी छन् । लद्यु वित्त बनेको छोटो समयमै शाखा बिस्तारलाई तीब्रता दिएको छ भने बाँके र बर्दियामा सबैभन्दा कर धेरै तिर्ने निकायको सूचीमा परेर यसै आर्थिक वर्षमा आन्तरिक राजश्व कार्यालय नेपालगन्जबाट सम्मानित समेत भइसकेको छ ।

महिलाले मात्र सञ्चालन गरेको उक्त लद्युवित्तको कार्यक्षेत्र लुम्बिनी प्रदेश हो । पूर्वी रुकुम र गुल्मी बाहेक अन्य जिल्लामा ३३ वटा शाखा सन्चालनमा रहेका छन् । २ अर्व २७ करोड लगानी गरिसकेको उपकारको चुँक्ता पुँजी ६ करोड ५६ लाख रहेको छ । उपकार मन्चमा प्रदेशभर चालिस हजार महिलाहरु आवद्ध भई बचत गर्दै आएका छन्् ।

दोस्रो कार्यकालका लागि सिइओ नियुक्त पोखरेलले ३३ वटा शाखामा रहेका १ सय ८९ कर्मचारीको नेतृत्व गर्छिन् भने संस्थालाई प्रदेशकै उत्कृष्ट लघुवित्त बनाउने जिम्मेवारी पनि सम्हाल्ने छिन् । पहिलो कार्यकालमा बचत गर्न मात्र सीमित संस्था लद्युवित्त बनाउन सफल भएको बताउँँदै पोखरेलले भनिन्,–‘अन्य जिल्लामा शाखा बिस्तार गरेर संस्थाको कार्यक्षमता र कार्यक्षेत्र बिस्तार गर्न सफल भयौं । अब दोस्रो कार्यमालमा हामी भएकै जिल्लामा थप र नभएका जिल्लामा शाखा बिस्तार गर्दै उत्कृष्ट लघुवित्त बनाउने गरी काम गर्छौ ।’

२०६३ सालतिर बाँकेको कोहलपुरमा स्थापना भएको महिला उपकार मन्चले आफ्ना सदस्यबाट दश रुपैयाँ बचत उठाउँथ्यो । मन्चका अगुवाहरु गाउँ गाउँमा गएर महिलाको समूह बनाउँथे । त्यही समूहबाट संकलन भएर बनाईएको महिला मन्च आज राष्ट्र बैंकबाट अनुमती प्राप्त घ वर्गको वित्तिय क्षेत्र बन्न सफल भएको हो ।

‘थोरै पैसाको बचतबाट महिलाले मात्र सुरु गरेको संस्था घ वर्गको वित्तिय संस्था बन्न सफल भएको छ । असाध्यै खुसी छु ।’–संस्थाकी अध्यक्ष ढकालले भनिन् । सम्पूर्ण महिलाको सम्पत्तिका रुपमा महिला उपकार मन्च रहेको अध्यक्ष ढकालले बताइन् ।