खोज

दाङ, ३ मंसिर ।

केही महिला सुरक्षाकर्मी डोरी बाध्नलाई खाडल खनिरहेका अरु उनीहरुलाई सहयोग गरिहेका भेटिए शुक्रवार घोराही १८ मा रहेको आधारभूत विद्यालय बेलधारीको विद्यालयमा । मतदात अधिकृतदेखि सुरक्षाकर्मीसम्म महिलाको जिम्मा दिइएको मतदान केन्द्र हो यो ।

यही मङ्सिर ४ गते हुन गइरहेको प्रतिनिधिसभा र प्रदेशसभा सदस्यहरुको निर्वाचनका लागि बेलघारी मतदान केन्द्रमा कर्मचारी देखि सुरक्षाकर्मीसम्म महिलाको जिम्मा दिइएको छ । बेलघारी जस्तै दाङका चार मतदान स्थलमा महिला कर्मचारीहरु मात्रै खटाइएको छ । मतदान अधिकृत देखि सहयोगीसम्म महिलामात्रैलाई जिम्मेवारी दिइएको छ ।

घोराही उपमहानगरपालिका १८ मा रहेको आधारभूत बिद्यालय बेलघारीको मतदान केन्द्र (क) र(ख)मतदान केन्द्र महिला कर्मचारीहरु मात्रै रहेका छन् । त्यहाँ मतदान अधिकृत, कर्मचारी र सुरक्षाकर्मी सबै महिला मात्रै रहेको निर्वाचन अधिकृत इन्दु बसेलले बताइन् । उनलाई सहयोग गर्न श्रृजना शर्मा, सावित्रादेवी शर्मा, दिपसना बिसी, हेमन्ता थापा, विना शर्मा,बालिका घिमिरे र गोमा मगर रहेका छन् । सो मतदान केन्द्रमा ९५२ मतदाता रहेका छन् । मतदान अधिकृत इन्दु बसेलले महिला मात्रैलाई जिम्मा दिइएको मतदान केन्द्र नमूना बनाउने बताइन् । सो केन्द्रमा प्रहरी सहायक निरक्षक रुपाकुमारी सार्कीको नेतृत्वमा पाँच महिला प्रहरी र आठ म्यादी प्रहरी खटाइएको छ ।

त्यसैगरी सोही विद्यालयको (ख)केन्द्रमा उर्मिला तिमल्सिना मतदान अधिकृत रहेकी छन् । उनलाई सहयोग गर्न कमला खड्का, हिरा केसी, अर्चना चौधरी, इन्दिरा बिक, गोमा योगी, तिला बिक र गीता चौधरी गरी आठ जना महिला कर्मचारी रहेका छन् । सो मतदान केन्द्रमा ९७३ मतदाता रहेका छन् ।

घोराही उपमहानगरपालिकाको वडा नम्वर १७ मा रहेका प्रवि हरिद्वारको (ग) मतदान केन्द्रमा खिमा भुसाल मतदान अधिकृत रहेकी छन् । उनलाई सघाउन वसन्ती पौडेल, विपना बर्तौला, सम्झना कार्की परियार, कृतिसा रावत, श्रीजना भण्डारी, दिला केसी र सुमन चौधरी गरी आठ जना महिला कर्मचारी रहेका छन् । सो मतदान केन्द्रमा ७४८ मतदाता रहेका छन् ।

सोही वडामा रहेको गोरक्षरत्ननाथ मावि चौघेराको (क) मतदान केन्द्रमा मोतीकुमारी बिश्वकर्मा मतदान अधिकृत रहेकी छन् । उनलाई सघाउन गुप्ताकुमारी अधिकारी, विश्णा नेपाली, अनिता बुढा, सरिता भण्डारी, मनिषा चौधरी, गोमा बस्नेत र पानमती कामी रहेका छन् । सो केन्द्रमा ८१२ जना मतदाता रहेका छन् ।

“गत बैशाखमा सम्पन्न भएको स्थानीय तह निर्वाचन महिला मात्रैले हाँकेको मतदान केन्द्र घोराही –१६ सानी अम्वापुर केन्द्रमा कर्मचारी देखि सुरक्षाकर्मीसम्म महिलाले चलाएकाले थियौं सोही अभ्यासलाई निरन्तरता दिन र स्थानीय तहमा सफल भएको कारण पुनः हामीलाई जिम्मा दिइएको छ”–गोरक्षरत्ननाथ मावि चौघेराको (क) मतदान केन्द्रका मतदान अधिकृत मोतीकुमारी बिश्वकर्माले भनिन् । स्थानीय तहको अनुभव यो निर्वाचनमा सदुपयोग गर्ने उनले बताइन् । महिला कर्मचारी मात्रै खटिएको निर्वाचन केन्द्रमा सुरक्षाकर्मी पनि महिलामात्रै भएकाले सजिलो महशुस भएको छ ।

दाङ जिल्लामा गत बैशाखमा भएको स्थानीय तह निर्वाचन महिला मात्रैले चलाएको स्थान नमूना भएको थियो । सोही कार्यलाई निरन्तरता दिन महिलामैत्री निर्वाचन केन्द्र बनाएको मुख्य मतदान अधिकृत कृपासुर कार्कीले बताए । महिलाहरु हरेक काममा सक्षम छन् भन्ने सन्देश दिने र यसप्रकारको प्रयासले समाजमा सकारात्मक सन्देश जाने उनी बताउँछन्् । “महिलाले मात्रै सञ्चालन गरेको नमूना मतदान स्थलले समाजमा सकारात्मक सन्देश प्रवाह हुने छ”–उनले भने । दाङमा एक सय ५३ मतदान स्थल र चार सय ६५ मतदान केन्द्र रहेका छन् । चार लाख १४ हजार नौ सय ५६ जना मतदाता रहेका छन् ।