खोज

प्यूठान, असोज । प्यूठानबाट प्रतिनिधीसभा सदस्य उम्मेदवार बनेका एमालेका नेता सूर्य थापा जिल्लाका गाउँबस्तीमा पुगेर मत माग्न व्यस्त छन् । उनी वडा तहमा रहेका बुथबुथमा पुगेर मत मागिरहेका छन् । एक मात्र निर्वाचन क्षेत्र रहेको प्यूठानमा थापा पहिलोपटक जनतामाझ परिक्षण हुँदैछन् ।
०७० निर्वाचनमा तत्कालिन एमाले नेता बामदेव गौतम निर्वाचन लड्दा थापा त्यसबेला चुनावी कमाण्डर बनेर यसैगरी गाउँगाउँमा पुगेर मत मागेका थिए । प्यूठानको कुना कुनामा पुगेर त्यहाँको बस्तुस्तिथीलाई नजिकबाट बुझेका थापाले आफ्नो जित सुनिश्चित रहेको समेत दाबी गर्दै आएका छन् ।

जनतामाझ पुगेर गुनासाहरु सुन्ने र आफ्ना योजना सुनाएर मत मागेको थापाले प्रतिक्रिया दिए । एक साता लगाएर झिमरुक गाउँपालिकाका आठ वटै वडाका बस्तीबस्तीमा पुगेर आफूलाई मतदात गरिएको उनको भनाई छ । प्यूठानमा नौ पालिकाका ६४ वटा वडाहरु छन् । ती वडाका बस्तीबस्ती पुगेर मत माग्न उनलाई कम्तीमा पनि एक महिना बढी समय लाग्ने छ । प्रतिनिधीसभा सदस्यका लागि पहिले दुई निर्वाचन क्षेत्र रहेको प्यूठानमा ०७४ पछि एउटा मात्र निर्वाचन क्षेत्र कायम छ । शुक्रवारदेखि नौवहिनी गाउँपालिकाका मतदातासँग भेटघाट गर्ने कार्यक्रम थालिएको छ । झिमरुक गाउँपालिका १ सौतामारे प्यूठान निवासी थापाले आफ्नै जन्मभूमिबाट चुनावी प्रचार र घरदैलोको अभियान थालेका छन् ।

पत्रकारिता पृष्ठभूमीबाट राजनीतिमा होमिएका सूर्य थापा एमालेभित्र प्रभावशाली यूवा नेतामध्येमा पर्छन् । हाल उनी पार्टीको पोलिटब्यूरो सदस्य र प्यूठान जिल्ला इन्चार्जको जिम्मेवारीमा छन् । मनका लागेको कुरा प्रष्टसँग जनतालाई भन्ने र निडर नेताको रुपमा उनको छबी छ । तत्कालिन प्रधानमन्त्री झलनाथ खनाल र केपी शर्मा ओली प्रधानमन्त्री हुँदा उनी दुईपटक प्रेस सल्लाहकारको भूमिकामा रहेर काम गरे । प्रधानमन्त्रीको सल्लाहकार हुँदा प्यूठानको विकासमा गरेको योगदानका बारेमा पनि उनले चुनावी प्रचार प्रसारको क्रममा मतदातालाई जानकारी गराउँदै हिडेका छन् ।

प्यूठानीको प्रतिनिधी बनेर सिँहदरवार छिरेपछि विकास निर्माणमा जिल्लाको अनुहार बदल्ने सपना आफूले बोकेको उनले सुनाए । ‘सिँहदरवार छिर्ने पासको लागि मात्र म निर्वाचन लड्न आएको होइन्’,झिमरुकमा आयोजित चुनावी भेटघाटका क्रममा थापाले भने,‘प्यूठानीहरुको आवाज बुदल्न पार्न सिँहदरवार पुग्ने र जिल्लाबासीको अनुहारमा चमक ल्याउने मेरो लक्ष्य हो ।’
सूर्य थापासँग प्रतिस्पर्धामा सत्ता गठवन्धनबाट राष्ट्रिय जनमोर्चाकी दुर्गा पौडेल छिन् । पौडेलको सांसद् बन्ने यो तेस्रो प्रयास हो । उनी ०७० मा कपिलवस्तुबाट समानुपातिक सांसद् सांसद् थिइन् । ०७४ मा बामगठवन्धन (एमाले, माओवादी) सहितको सहयोगमा प्यूठानबाट चुनाव जितेकी थिइन् । अहिले नेपाली कांग्रेस र नेकपा माओवादी केन्द्रले उनलाई सघाएका छन् । तर, अघिल्लो निर्वाचनमा जस्तो सहजै चुनाव जित्न दुर्गालाई ढुंगा चपाएजस्तै हुने गठवन्धन दलकै नेताहरु प्रतिक्रिया दिन्छन् । स्थानीय तह निर्वाचनको नतिजा अनुसार राजमो प्यूठानमा चौथो शक्ति हो । एमाले पहिलो शक्ति हो । एमालेले ३९ हजार ८ सय ७७, कांग्रेसले २१ हजार ५ सय ४६, माओवादीले १७ हजार १ सय ६३, जनमोर्चाले १३ हजार ६ सय १२ र समाजवादीले १ हजार ४ सय १७ मत लिएको छ ।